COVID-19
អន្តរជាតិ
ការសិក្សារបស់ Harvard៖ ការរក្សាគម្លាតសុវត្ថិភាពអាចធ្វើរហូតដល់ឆ្នាំ២០២២
× ការផ្អាកចលនាមនុស្សដែលធ្វើឡើងតែមួយពេលនោះ ប្រហែលជាមិនអាចទប់ស្កាត់ COVID -19 បានទាំងស្រុងនោះទេ។ ក្រុមអ្នកវិទ្យាសាស្ត្រនៃសកលវិទ្យាល័យ Harvard ដែលមានតួនាទីក្នុងការប៉ាន់ស្មានចលនានៃការរីករាលដាលរបស់ជំងឺបានបញ្ជាក់បែបនេះ កាលពីថ្ងៃទី១៥ ខែមេសា ដោយបន្ថែមថា ការរក្សាគម្លាតសុវត្ថិភាពនឹងត្រូវអនុវត្តឡើងជារឿយៗ រហូតទៅដល់ឆ្នាំ២០២២។
ការប៉ាន់ស្មានចលនានៃជំងឺដោយប្រើប្រាស់ការចងទិន្នន័យនានានៅក្នុងប្រព័ន្ធកំព្យូទ័រនៃក្រុមអ្នកវិទ្យាសាស្ត្រនៃសកលវិទ្យាល័យ Harvard បានបញ្ជាក់បន្ថែមថា COVID-19 នឹងអាចក្លាយទៅជាជំងឺមានឥទ្ធិពលនៅតាមរដូវកាល ស្រដៀងគ្នានឹងប្រភេទនៃក្រុមវីរុសកូរ៉ូណាផ្សេងៗទៀតដែរ ដែលឧស្សាហ៍បង្កទៅជាជំងឺផ្តាសាយធំ ជាពិសេសនៅរដូវរងា។ ទោះបីជាយ៉ាងនេះក្តី គេក៏មិនអាចសន្និដ្ឋានឲ្យបានច្បាស់លាស់ពីទិន្នន័យខាងលើបានដែរ ដូចជាកម្រិត និងរយៈពេលនៃប្រព័ន្ធស៊ាំដែលខ្លួនប្រាណរបស់មនុស្សត្រូវមានក្នុងការប្រយុទ្ធប្រឆាំងនឹងជំងឺ។
តាមការចុះផ្សាយរបស់ទីភ្នាក់ងារព័ត៌មាន AFP លោក Stephen Kissler ដែលជាអ្នកដឹកនាំក្រុមសិក្សាបានលើកឡើងថា៖«ការរក្សាគម្លាតសុវត្ថិភាពជាលក្ខណៈទ្រង់ទ្រាយធំតែមួយដងនោះប្រហែលជាមិនអាចគ្រប់គ្រងឥទ្ធិពលនៃការឆ្លងជំងឺនេះឲ្យនៅក្នុងកម្រិតដែលមន្ទីរពេទ្យនៃសហរដ្ឋអាមេរិកអាចទទួលអ្នកជំងឺធ្ងន់ធ្ងរទាន់ពេលវេលានោះទេ។ ក្រៅពីវិធីសាស្ត្រព្យាបាលផ្សេងៗ ការរក្សាគម្លាតសុវត្ថិភាពនឹងត្រូវធ្វើឡើងជារឿយៗ និងមិនជាក់លាក់បន្តទៀតដើម្បីកាត់បន្ថយឥទ្ធិពលនៃវីរុស»។
ការធ្វើតេស្តរកវត្តមាននៃវីរុសលើប្រជាជនទូទៅអាចផ្តល់ព័ត៌មានឲ្យកាន់តែច្រើនថាតើការអនុវត្តគម្លាតសុវត្ថិភាពនឹងគួរតែត្រូវធ្វើឡើងដែរឬទេ។ រយៈពេល និងកម្រិតនៃការរក្សាគម្លាតសុវត្ថិភាព ឬការផ្អាកចលនារបស់មនុស្សនៅតាមទីសាធារណៈ អាចនឹងធ្វើឡើងអាស្រ័យលើលក្ខណៈនៃការព្យាបាល និងវត្តមាននៃវ៉ាក់សាំងចាក់ការពារ។
បើមិនដូច្នេះទេ ការអនុវត្តគម្លាតសុវត្ថិភាព និងការផ្អាកចលនារបស់មនុស្សជារឿយៗ មិនជាក់លាក់ គួរតែត្រូវធ្វើឡើងដើម្បីឲ្យមន្ទីរពេទ្យនានាមានពេលវេលា និងកន្លែងគ្រប់គ្រាន់ក្នុងការមើលថែអ្នកជំងឺ។ ប៉ុន្តែការផ្អាកចលនា ឬរក្សាគម្លាតសុវត្ថិភាពក្នុងរយៈពេលយូរពេកក៏អាចឲ្យមនុស្សនានាមិនងាយនឹងផលិតប្រព័ន្ធស៊ាំរបស់ខ្លួនដើម្បីប្រយុទ្ធនឹងវីរុសបានដែរ។ យ៉ាងណាក៏ដោយ ទិន្នន័យជាច្រើនទៀតនឹងត្រូវទាមទារក្នុងការទាញសន្និដ្ឋានឲ្យបានកាន់តែច្បាស់លាស់។
សរុបជាខ្លីមកវិញ COVID-19 អាចនឹងបន្តយាយីសកម្មភាពមួយចំនួនរបស់មនុស្សនៅថ្ងៃខាងមុខ ហើយប្រព័ន្ធស៊ាំរបស់មនុស្សប្រហែលជាមិនអាចមានឥទ្ធិពលលើវីរុសភ្លាមៗបាននោះទេ។ វ៉ាក់សាំងការពារនៅតែជាវត្ថុសំខាន់មួយចំពោះព្រឹត្តិការណ៍នេះ។ ប៉ុន្តែទិន្នន័យដែលប្រមូលបានថ្មីនឹងអាចកែប្រែការប៉ាន់ស្មានចលនារបស់វីរុសនៅក្នុងពេលអនាគត៕
© រក្សាសិទ្ធិដោយ thmeythmey.com