សម្តេច ហ៊ុន សែន៖«សូមកូនក្មួយ កុំធ្វើអ្វីខុសច្បាប់ក្នុងប្រទេសគេ ដែលកំពុងដាក់ក្នុងគ្រាអាសន្នឲ្យសោះ»

COVID-19

ជាតិ

សង្គមជាតិ

សម្តេច ហ៊ុន សែន៖«សូមកូនក្មួយ កុំធ្វើអ្វីខុសច្បាប់ក្នុងប្រទេសគេ ដែលកំពុងដាក់ក្នុងគ្រាអាសន្នឲ្យសោះ»

15, Apr 2020 , 4:17 pm

រូបភាព

ដោយ: ថ្មីៗ

សម្តេចនាយករដ្ឋមន្ត្រី ហ៊ុន សែន បានអំពាវនាវដល់ប្រជាពលរដ្ឋខ្មែរនៅក្រៅប្រទេស ជាពិសេសពលករខ្មែរនៅប្រទេសថៃ ឲ្យគោរពច្បាប់ បទបញ្ញាត្តិ បម្រាមគោចរ និងបម្រាមជួបជុំគ្នា ឬជប់លៀងជាក្រុម ដែលប្រទេសគេ បានដាក់ចេញ និងកំពុងហាមឃាត់យ៉ាងតឹងរ៉ឹងបំផុត ក្នុងការទប់ស្កាត់ការចម្លងរោគកូវីដ-១៩។

តាមរយៈសារលើទំព័រហ្វេសប៊ុក នាថ្ងៃទី១៥ ខែមេសា ឆ្នាំ២០២០ ប្រមុខរដ្ឋាភិបាលកម្ពុជា សង្កត់ធ្ងន់ថា៖«សូមកូនក្មួយកុំធ្វើអ្វីខុសច្បាប់នៅក្នុងប្រទេសគេ ដែលកំពុងដាក់ក្នុងគ្រាអាសន្នឲ្យសោះ»។ ប្រមុខរដ្ឋាភិបាល បន្ថែមថា៖«សំខាន់ណាស់នៅពេលនេះ គឺសុវត្ថិភាព សុខភាពអាយុជីវិតបងប្អូនកូនក្មួយពលករ-ពលការនីផ្ទាល់»។

ជាមួយគ្នានេះ ប្រមុខរដ្ឋាភិបាល បន្តអំពាវនាវឲ្យប្រជាពលរដ្ឋខ្មែរគោរពច្បាប់ ទាំងក្នុងប្រទេស និងក្រៅប្រទេស ជាពិសេសក្នុងស្ថានភាព ដែលប្រទេសភាគច្រើនបានដាក់ចេញបទបញ្ញត្តិនិងបម្រាមដ៏តឹងរ៉ឹងក្នុងការទប់ស្កាត់ការឆ្លងរាលដាលជំងឺកូវីដ-១៩។

នៅកម្ពុជា រដ្ឋាភិបាល បានដាក់កំហិតលើការធ្វើដំណើរមួយរយៈពេលខ្លី នាអំឡុងពិធីបុណ្យចូលឆ្នាំ គឺចាប់ពីថ្ងៃទី៩ ដល់ថ្ងៃទី១៦ ខែមេសា ឆ្នាំ២០២០ ដោយមិនអនុញ្ញាតឲ្យប្រជាជន ធ្វើដំណើរឆ្លងខេត្តឡើយ និងមិនឲ្យធ្វើដំណើរចេញចូលរវាងខេត្តនិងរាជធានីភ្នំពេញ។ តែចំពោះខេត្តកណ្តាលនិងរាជធានីភ្នំពេញ រដ្ឋាភិបាល អនុញ្ញាតឲ្យប្រជាជនធ្វើដំណើរទៅមកបាន។

ដ្បិតមិនចេញបទបញ្ជាដូចបណ្តាប្រទេសមួយចំនួនក្តី តែរដ្ឋាភិបាលកម្ពុជា ទទូចឲ្យប្រជាជន កាត់បន្ថយការជួបជុំគ្នា និង ត្រូវរក្សាគម្លាតពីគ្នាតាមការណែនាំរបស់ក្រសួងសុខាភិបាល ដើម្បីទប់ស្កាត់ការរាលជំងឺកូវីដ-១៩។

គិតត្រឹមព្រឹកថ្ងៃទី១៥ ខែមេសា កម្ពុជា ព្យាបាលអ្នកជំងឺកូវីដ-១៩ ឲ្យជាសះស្បើយ៩៦នាក់ហើយ ក្នុងចំណោមអ្នកឆ្លង១២២នាក់៕