COVID-19
ជាតិ
សង្គមជាតិ
ក្រសួង រកឃើញអាល់កុលលាងដៃមួយចំនួន មិនអាចសម្លាប់មេរោគ និងប៉ះពាល់សុខភាពថែមទៀត
×
ដោយ៖ សែម ម៉ូនីតា
ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និង នវានុវត្តន៍ សង្កេតឃើញថា នៅលើទីផ្សារបច្ចុប្បន្ន មានការផ្សព្វផ្សាយ និងកំពុងចរាចរលក់ផលិតផលអាល់កុល ក៏ដូចជាផលិតផលលាងសម្អាតដៃ និង ផលិតផលផ្សេងទៀត សម្រាប់ការពារ និងទប់ស្កាត់ការឆ្លងជំងឺកូវីដ១៩ ដោយពុំមានការត្រួតពិនិត្យគុណភាព និង គ្មានការចុះបញ្ជីផលិតផលច្បាស់លាស់ឡើយ។
ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និង នវានុវត្តន៍ អះអាងថា បានធ្វើតេស្តលើផលិតផលទាំងនោះ ដោយលទ្ធផលបង្ហាញថា ក្នុងចំណោមផលិតផលទាំងនោះ មានមួយចំនួន មានបរិមាណអេតាណុល ក្នុងកម្រិត មិនអាចសម្លាប់មេរោគបាន ហើយមួយចំនួនទៀត មានបរិមាណមេតាណុល ក្នុងកម្រិត អាចបង្កគ្រោះថ្នាក់ដល់សុខភាពទៀតផង។
តាមរយៈសេចក្តីណែនាំ ដែលចេញនៅថ្ងៃទី១៤ ខែមេសា ឆ្នាំ២០២០ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និង នវានុវត្តន៍ ណែនាំឲ្យប្រជាពលរដ្ឋ យកចិត្តទុកដាក់និងពិនិត្យឲ្យបានត្រឹមត្រូវ មុនពេលទិញផលិតផលទាំងនោះ ដើម្បីជៀសវាងការខាតបង់ថវិកា និងផលប៉ះពាល់សុខភាព។
កន្លងមក អាជ្ញាធរមានសមត្ថកិច្ច ធ្លាប់រឹបអូសផលិតផលលាងដៃមួយចំនួនរួចមកហើយ ក្រោយពិនិត្យឃើញថា ផលិតផលទាំងនោះ មិនមានគុណភាពនិងមិនបានចុះបញ្ជីត្រឹមត្រូវ៕
© រក្សាសិទ្ធិដោយ thmeythmey.com