មេដឹកនាំអាស៊ាន៖ កិច្ចប្រជុំកំពូលអាស៊ានស្តីពី Covid-19 ជានិមិត្តរូបនៃការរួបរូមគ្នារបស់មេដឹកនាំក្នុងតំបន់ក្នុងគ្រាលំបាក

COVID-19

ជាតិ

មេដឹកនាំអាស៊ាន៖ កិច្ចប្រជុំកំពូលអាស៊ានស្តីពី Covid-19 ជានិមិត្តរូបនៃការរួបរូមគ្នារបស់មេដឹកនាំក្នុងតំបន់ក្នុងគ្រាលំបាក

15, Apr 2020 , 6:09 pm

រូបភាព

ដោយ:

អគ្គលេខាធិការអាស៊ាន លោក Lim Jock Hoi បានវាយតម្លៃខ្ពស់ពីកិច្ចប្រជុំកំពូលអាស៊ាន និងអាស៊ានបូកបី ដែលបានផ្តោតសំខាន់ខ្លាំងលើការឆ្លើយតបទៅនឹងវីរុស Covid-19។ សម្រាប់លោកអគ្គលេខាធិការ ឥរិយាបថនេះ បង្ហាញពីសាមគ្គីភាពរបស់មេដឹកនាំក្នុងតំបន់ អំឡុងពេលកំពុងតែមានវិបត្តិ។

លោកអគ្គលេខាធិការ Lim Jock Hoi តាមរយៈកិច្ចសម្ភាសន៍ជាមួយភ្នាក់ងារព័ត៌មាន Vietnam News បានលើកឡើងថា ជំងឺប្រភេទរាតត្បាត Covid-19 គឺជាប្រភេទវីរុសមួយ ដែលមិនបែងចែកព្រំដែននោះទេ ដែលបញ្ហានេះ តម្រូវឲ្យមានការឆ្លើយតបជាសមូហភាពពីមេដឹកនាំតំបន់ ដើម្បីបំពេញបន្ថែមគ្នា ក៏ដូចជាពង្រឹងការឆ្លើយតបទាំងថ្នាក់ជាតិ និងតំបន់។

ក៏ប៉ុន្តែ ប្រមុខអាស៊ានរូបនេះ មានជំនឿជាក់ថាតាមរយៈកិច្ចប្រជុំកំពូលអាស៊ាន នឹងផ្តល់កិច្ចសហការផ្នែកនយោបាយកាន់តែល្អប្រសើរ និងការប្តេជ្ញាច្បាស់លាស់ក្នុងការបង្កើនកិច្ចប្រឹងប្រែងពីគ្រប់ភាគីពាក់ព័ន្ធទាំងអស់ដើម្បីគាំទ្ររដ្ឋាភិបាល និងប្រព័ន្ធសុខាភិបាលទាំងស្រុង ដើម្បីទប់ស្កាត់ផលប៉ះពាល់កាន់តែខ្លាំងនៃវីរុសរាតត្បាត Covid-19។

លោក បន្ថែមថា វីរុសរាតត្បាត មិនអាចបញ្ចប់ត្រឹមចំណាត់ការមួយលើកឡើយ។ ពោលគឺ វាទាមទារឲ្យមានផែនការរយៈពេលវែង និងគ្រប់ជ្រុងជ្រោយ។ លោក អះអាងថា អាស៊ានកំពុងខិតខំក្នុងការពង្រឹងទំនាក់ទំនងកិច្ចសហប្រតិបត្តិការជាមួយនឹងសមភាគីអាស៊ានបូកបី ដើម្បីស្វែងមធ្យោបាយដែលភាគីទាំងអស់អាចធ្វើការរួមគ្នាបាន ដើម្បីឈានដល់ការឆ្លើយតបរួមមួយទៅលើវីរុស Covid-19។

ជាកម្រិតយុទ្ធសាស្ត្រ មេដឹកនាំអាស៊ានរូបនេះ បានវាយតម្លៃ កិច្ចប្រជុំកំពូលអាស៊ាន និងដៃគូថា បានបង្ហាញពីការប្តេជ្ញាចិត្តលើគោលការណ៍បើកចំហតំបន់ក្នុងស្ថានភាពលំបាក ហើយអាស៊ានជឿជាក់ថា នៅពេលដែលគ្រប់ភាគីទាំងអស់រួមគ្នា នឹងកាន់តែខ្លាំង។ ហើយតាមរយៈការរួមគ្នានេះហើយ ដែលធ្វើឲ្យតំបន់ អាចជម្នះជាមួយនឹងបញ្ហាប្រឈមប្រកបដោយប្រសិទ្ធភាព៕