COVID-19
អន្តរជាតិ
ប្រមុខ UN៖ មានតែវ៉ាក់សាំងCOVID-19 ដែលអាចឲ្យយើងត្រលប់ទៅកាន់សភាពធម្មតាវិញ
× វ៉ាក់សាំង COVID-19 ប្រហែលជារបស់តែមួយគត់ដែលអាចឲ្យយើងត្រលប់ទៅកាន់សភាពធម្មតាវិញ។ នេះជាការថ្លែងរបស់លោកអង់តូនីញ៉ូ ហ្គូតែរ៉េស អគ្គលេខាធិការអង្គការសហប្រជាជាតិ នៅថ្ងៃ១៥ ខែមេសា ដោយសង្កត់ធ្ងន់ថា វ៉ាក់សាំងត្រូវក្លាយជាប្រយោជន៍សកល និងអនុញ្ញាតឲ្យយើងគ្រប់គ្រងជំងឺរាតត្បាត។
«វ៉ាក់សាំងដែលមានសុវត្ថិភាព និងប្រសិទ្ធភាពប្រហែលជារបស់តែមួយគត់ ដែលអាចឲ្យពិភពលោកត្រឡប់ទៅកាន់សភាពធម្មតាវិញ ដោយជួយជីវិតមនុស្សរាប់លាននាក់ និងទឹកប្រាក់រាប់ទ្រីលានដុល្លារ»។ នេះជាការបន្ថែមរបស់ អគ្គលេខាធិការអង្គការសហប្រជាជាតិ អំឡុងពេលជំនួបតាមវីដេអូពីចម្ងាយ (video conference) ជាមួយបណ្តាប្រទេសអាហ្វ្រិក។
យោងតាមទីភ្នាក់ងារព័ត៌មាន AFP លោកអង់តូនីញ៉ូ ហ្គូតែរ៉េស បានអំពាវនាវឲ្យពន្លឿនការអភិវឌ្ឍវ៉ាក់សាំង និងដែលអាចបានប្រើសម្រាប់មនុស្សគ្រប់គ្នា ដោយសង្កត់ធ្ងន់ថា វ៉ាក់សាំងត្រូវក្លាយជាប្រយោជន៍សកល និងអនុញ្ញាតឲ្យយើងគ្រប់គ្រងជំងឺរាតត្បាត។
ត្រង់ចំណុចនេះ ប្រមុខអង្គការអន្តរជាតិរូបនេះ ថ្លែងទៀតថា៖«យើងត្រូវការកិច្ចខំប្រឹងប្រែងប្រកបដោយមហិច្ឆតា ដើម្បីធានាឲ្យភាគីពាក់ព័ន្ធអន្តរជាតិ អាចប្រតិបត្តិតាមវិធានមួយដែល សុខដុមរមនា រួបរួមគ្នា និងមានអនុភាពក្នុងការបង្កើនល្បឿន និងបរិមាណដែលត្រូវការ ដើម្បីចែកចាយនៅជុំវិញពិភពលោកឲ្យបានមុនឆ្នាំ២០២០»។
តាមរយៈអង្គការសុខភាពពិភពលោក អង្គការសហប្រជាជាតិ បានចែកចាយសម្ភារធ្វើតេស្ តដល់ប្រទេសចំនួន៤៧ ក្នុងទ្វីបអាហ្វ្រិក។ ម្យ៉ាងវិញទៀត ក្នុងជំនួបតាមវីដេអូពីចម្ងាយដដែល អគ្គលេខាធិការអង្គការសហប្រជាជាតិ បានលើកសសើររដ្ឋាភិបាលប្រទេសអាហ្វ្រិកមួយចំនួន ដែលព្យាយាមកាត់បន្ថយផលប៉ះពាល់សេដ្ឋកិច្ច ដែលកើតឡើងដោយជំងឺ COVID-19។ ជាក់ស្តែង លោកបានសសើរប្រទេសអេហ្ស៊ីប អ៊ូហ្គង់ដា ណាមីប៊ី និង កាបវែរ ដែលបន្ធូរបន្ថយពន្ធដល់អាជីវកម្ម និងឧស្សាហកម្ម ផ្តល់ប្រាក់ឧបត្ថម្ភដល់អ្នកបាត់បង់ការងារ និងជំនួយស្បៀង។
គួរបញ្ជាក់ថា តាំងតែពីថ្ងៃទី ២៥ ខែមីនា អគ្គលេខាធិការអង្គការសហប្រជាជាតិ បានអំពាវនាវការបរិច្ចាគទឹកប្រាក់២ពាន់លានដុល្លារ ក្នុងក្របខណ្ឌជំនួយមនុស្សធម៌ ដែលមកដល់ពេលនេះ ទើបតែបាន២០ភាគរយប៉ុណ្ណោះ៕
© រក្សាសិទ្ធិដោយ thmeythmey.com