ប្រធានាធិបតីអាមេរិក ដូណាល់ ត្រាំ នៅថ្ងៃ១៥ ខែមេសា បានបញ្ជាក់ថា រដ្ឋាភិបាលលោកកំពុងព្យាយាមស៊ើបអង្កេតឲ្យឃើញថាតើ COVID-19 ពិតជាផ្ទុះចេញមកពីមន្ទីរពិសោធន៍មួយក្នុងទីក្រុង វូហាន ប្រទេស ចិន ឬយ៉ាងណា។ ទន្ទឹមនេះ រដ្ឋមន្ត្រីការបរទេសអាមេរិក លោក ម៉ៃ ប៉ុមប៉េអូ ទាមទារឲ្យចិនចេញមុខបកស្រាយអ្វីដែលពួកគេដឹងជុំវិញប្រភពនៃវីរុសដ៏កាចសាហាវនេះ។
ជាង៤ខែក្រោយផ្ទុះឡើងដំបូង ប្រភពនៃ COVID-19 នៅតែស្ថិតជារឿងអាថ៌កំបាំង។ យ៉ាងណាមិញ ឧត្តមសេនីយ៍ផ្កាយបួន Mike Milley នាយសេនាធិការចម្រុះកងទ័ពអាមេរិក អះអាងកាលពីថ្ងៃអង្គារ ទី១៤ មេសាថា ភ្នាក់ងារសម្ងាត់អាមេរិកគូសបញ្ជាក់ថា វីរុសនេះទំនងផ្ទុះឡើងដោយធម្មតា ច្រើនជាងបង្កើតឡើងក្នុងមន្ទីរពិសោធន៍ក្នុងប្រទេសចិន។ ក៏ប៉ុន្តែ លោកសង្កត់ធ្ងន់ថា វាពុំទាន់ច្បាស់លាស់១០០ភាគរយថាពិតជាបែបនេះឡើយ។
ដោយឡែក ទូរទស្សន៍អាមេរិក Fox News បានចុះផ្សាយកាលពីថ្ងៃពុធ ទី១៥ មេសាថា វីរុសនេះមានដើមកំណើតក្នុងមន្ទីរពិសោធន៍មួយក្នុងទីក្រុង វូហាន ភាគកណ្ដាលប្រទេសចិន តែពុំមែនមានទ្រង់ទ្រាយជាអាវុធជីវសាស្ត្រឡើយ។ ផ្ទុយទៅវិញ វីរុសនេះ គឺជាផ្នែកមួយនៃកិច្ចប្រឹងប្រែងរបស់ចិនក្នុងការបង្ហាញឲ្យឃើញថា សមត្ថភាពកំណត់អត្តសញ្ញាណ និងប្រយុទ្ធប្រឆាំងវីរុសអម្បូរនេះ គឺស្មើដៃ ឬខ្លាំងជាងសមត្ថភាពដែលសហរដ្ឋអាមេរិកមាន។
របាយការណ៍ Fox News ដដែលនេះ បង្ហាញទៀតថា មន្ទីរពិសោធន៍ក្រុងវូហានដែលការធ្វើសាកល្បងវីរុសប្រព្រឹត្តទៅនោះ ខ្វះស្ដង់ដារសុវត្ថិភាពត្រឹមត្រូវ ជាហេតុបណ្ដាលមនុស្សក្នុងនោះឆ្លង ហើយបង្ហាញខ្លួននៅក្បែរផ្សារ ទីដែលវីរុសនេះបានផ្ទុះឡើងដំបូង។
ទាក់ទិននឹងរឿងនេះ អំឡុងសន្និសីទព័ត៌មាននាសេតវិមានអាមេរិកនៅថ្ងៃ១៥ ខែមេសា លោកប្រធានាធិបតី ត្រាំ ត្រូវបានសាកសួរពាក់ព័ន្ធនឹងរបាយការណ៍ដែលវីរុសនេះបានបែកធ្លាយពីមន្ទីរពិសោធន៍វូហាន ហើយលោកបានឆ្លើយតបវិញថា លោកបានដឹងឮអំពីរឿងនេះ។ តាមការចុះផ្សាយរបស់ទីភ្នាក់ងារព័ត៌មាន Reuters លោក ត្រាំ និយាយដូច្នេះថា៖«យើងកំពុងត្រួតពិនិត្យយ៉ាងល្អិតល្អន់បំផុតលើស្ថានការណ៍ដ៏អាក្រក់ដែលបានកើតឡើងមួយនេះ»។
សាកសួរប្រសិនបើលោកបានលើកឡើងពីបញ្ហានេះក្នុងកិច្ចសន្ទនាជាមួយប្រធានាធិបតីចិន ស៊ី ជិនភិង លោក ត្រាំ បញ្ជាក់ថា៖«ខ្ញុំមិនចង់ពិភាក្សាអ្វីដែលខ្ញុំបាននិយាយជាមួយលោក (ស៊ី) អំពីមន្ទីរពិសោធន៍ឡើយ, ខ្ញុំគ្រាន់តែមិនចង់ពិភាក្សា, វាជារឿងដែលមិនសមរម្យឡើយនាពេលនេះ»។
មែនទៅ លោក ដូណាល់ ត្រាំ កំពុងពង្រឹងចំណងទាក់ទងជាមួយចិន អំឡុងពេលជំងឺរាតត្បាត COVID-19 នេះ ព្រោះថា សហរដ្ឋអាមេរិកពឹងផ្អែកលើភាគីចិនសម្រាប់បរិក្ខារពេទ្យ ដែលជាតម្រូវការចាំបាច់បំផុតសម្រាប់បុគ្គលិកសុខាភិបាលអាមេរិក។
ដោយឡែក លោករដ្ឋមន្ត្រី ប៉ុមប៉េអូ ក្នុងកិច្ចសម្ភាសជាមួយទូរទស្សន៍អាមេរិក Fox News ក្រោយសន្និសីទលោកត្រាំរួចរាល់ បានលើកឡើងថា៖«យើងដឹងថា វីរុសនេះមានដើមកំណើតក្នុងក្រុង វូហាន ប្រទេសចិន ហើយវិទ្យាស្ថានវីរុសក្រុងវូហានដែលជាកម្មសិទ្ធិរបស់រដ្ឋចិន មានទីតាំងនៅក្បែរផ្សារនោះ»។
ត្រង់ចំណុចនេះ ប្រមុខការទូតអាមេរិករូបនេះ ទាមទារឲ្យរដ្ឋាភិបាលចិនបើកកកាយរឿងពិត ហើយជួយពន្យល់ជុំវិញប្រភពនៃការផ្ទុះសាយភាយរបស់វីរុសនេះផង។ លោកសង្កត់ធ្ងន់ថា៖«រដ្ឋាភិបាលចិនត្រូវតែសារភាពអស់ពីចិត្ត»៕