ជាតិ
ក្រសួង រៀបចំដាក់ដែនជម្រកសត្វព្រៃពាមក្រសោប និងដែនជម្រកសត្វព្រៃភ្នំព្រេច ចូលបញ្ជីដីរដ្ឋ រូបពីក្រសួងបរិស្ថាន
× ភ្នំពេញ៖ ក្រសួងបរិស្ថាន សហការជាមួយក្រសួងរៀបចំដែនដី នគរូបនីយកម្ម និងសំណង់ រដ្ឋបាលថ្នាក់ក្រោមជាតិ និង ការជួយគាំទ្រផ្នែកហិរញ្ញវត្ថុពីធនាគារអភិវឌ្ឍន៍អាស៊ី (ADB) កំពុងអនុវត្តការចុះតំបន់ការពារធម្មជាតិ «ដែនជម្រកសត្វព្រៃពាមក្រសោប» ខេត្តកោះកុង និង «ដែនជម្រកសត្វព្រៃភ្នំព្រេច» ខេត្តមណ្ឌលគិរី ចូលក្នុងបញ្ជីដីរដ្ឋ។ នេះបើតាមសេចក្ដីប្រកាសព័ត៌មានរបស់ក្រសួងបរិស្ថានចេញផ្សាយថ្ងៃទី១៦ មេសា។
ការចុះបញ្ជីដីរដ្ឋនេះ ក្នុងទិសដៅរៀបចំឲ្យមាន «វិញ្ញាបនបត្រសម្គាល់ម្ចាស់អចលនវត្ថុ» ច្បាស់លាស់សម្រាប់ដែនជម្រកសត្វព្រៃទាំងពីរ ដើម្បីកាត់បន្ថយ និងលុបបំបាត់ករណីបទល្មើសកាប់រុករានទន្ទ្រានយកដីរដ្ឋធ្វើជាកម្មសិទ្ធិឯកជន តាមរយៈការរឹតបន្តឹងវិធានការច្បាប់ និងការពង្រឹងប្រសិទ្ធភាពនៃការគ្រប់គ្រងប្រព័ន្ធតំបន់ការពារធម្មជាតិ។
តំបន់ការពារធម្មជាតិ «ដែនជម្រកសត្វព្រៃពាមក្រសោប» ខេត្តកោះកុង និង «ដែនជម្រកសត្វព្រៃភ្នំព្រេច» ខេត្តមណ្ឌលគិរី ត្រូវបានអនុលោមតាមច្បាប់ និងលិខិតបទដ្ឋានគតិយុត្តពាក់ព័ន្ធ ជាពិសេស ច្បាប់ស្តីពីតំបន់ការពារធម្មជាតិឆ្នាំ២០០៨ និងច្បាប់ភូមិបាលឆ្នាំ២០០១។ បើតាមក្រសួងបរិស្ថាន នីតិវិធី និងដំណើរការនៃការចុះបញ្ជីដីរដ្ឋ នៅក្នុងតំបន់ការពារធម្មជាតិ ត្រូវបានធ្វើឡើងទៅតាមគោលការណ៍នៃការកំណត់ និងបែងចែកតំបន់គ្រប់គ្រងតំបន់ការពារធម្មជាតិ គឺតំបន់ស្នូល តំបន់អភិរក្ស តំបន់ប្រើប្រាស់ដោយចីរភាព និងតំបន់សហគមន៍សម្រាប់តំបន់ការពារធម្មជាតិនីមួយៗ។
សកម្មភាពអនុវត្តគម្រោងចុះបញ្ជីដីរដ្ឋនេះ បានចាប់ផ្តើមតាំងពីដើមឆ្នាំ២០១៨។ ក្រសួងបរិស្ថាន បញ្ជាក់ថា រហូតមកដល់ពេលនេះ សម្រេចបានលទ្ធផលសំខាន់ៗ ដូចជា ក្រុមការងារបានបញ្ចប់នីតិវិធី និងដំណើរការចុះបញ្ជីដីរដ្ឋសម្រាប់តំបន់ស្នូល និងតំបន់អភិរក្សនៃដែនជម្រកសត្វព្រៃទាំងពីរ, ក្រសួងរៀបចំដែនដី បានចេញ «វិញ្ញាបនបត្រសម្គាល់ម្ចាស់អចលនវត្ថុ» ជូនក្រសួងបរិស្ថាន ចំនួន ១៨ប័ណ្ណ ក្នុងនោះ ១០ ប័ណ្ណ សម្រាប់សម្គាល់កម្មសិទ្ធិដីរដ្ឋក្នុងតំបន់ស្នូល និងតំបន់អភិរក្សនៃដែនជម្រកសត្វព្រៃពាមក្រសោប ខេត្តកោះកុង និង ៨ ប័ណ្ណ សម្រាប់សម្គាល់កម្មសិទ្ធិដីរដ្ឋក្នុងតំបន់ស្នូល នៃដែនជម្រកសត្វព្រៃភ្នំព្រេច ខេត្តមណ្ឌលគីរី។
សេចក្ដីប្រកាសព័ត៌មានខាងលើ បន្តថា ក្រសួងរៀបចំដែនដី កំពុងបន្តពិនិត្យចេញ «វិញ្ញាបនបត្រសម្គាល់ម្ចាស់អចលនវត្ថុ» សម្រាប់តំបន់អភិរក្សនៃដែនជម្រកសត្វព្រៃភ្នំព្រេច ខេត្តមណ្ឌលគិរី។ ចំណែកក្រុមការងារអនុវត្តគម្រោង កំពុងបន្តនីតិវិធី និងដំណើរការចុះបញ្ជីដីរដ្ឋ នៅក្នុងតំបន់ប្រើប្រាស់ដោយចីរភាពនៃដែនជម្រកសត្វព្រៃទាំងពីរ។
សូមបញ្ជាក់ថា បច្ចុប្បន្ន កម្ពុជាមានតំបន់ការពារធម្មជាតិចំនួន ៥៧ កន្លែង និងរបៀងអភិរក្សជីវៈចម្រុះចំនួន ៣តំបន់ គ្របដណ្តប់លើផ្ទៃដីសរុបប្រមាណជាង ៧,២ លានហិកតា៕
© រក្សាសិទ្ធិដោយ thmeythmey.com