COVID-19
អន្តរជាតិ
×![]()
សិង្ហបុរី បានរាយការណ៍ករណីឆ្លង COVID-19 ថ្មីចំនួន ៧២៨ករណី នៅពីថ្ងៃ១៦ ខែមេសា ដែលភាគច្រើននៃពួកគេជាពលករបរទេស។ តួលេខថ្មីនេះ ធ្វើឲ្យករណីឆ្លងសរុបក្នុងប្រទេសក្នុងតំបន់អាស៊ីអាគ្នេយ៍មួយនេះឡើងរហូតដល់ ៤៤២៧ករណីហើយ ហើយករណីស្លាប់មាន១០នាក់។ 
សេចក្តីប្រកាសព័ត៌មាន ក្រសួងសុខាភិបាលសិង្ហបុរី បានបញ្ជាក់ថា ក្នុងចំណោមករណីឆ្លងសរុប អ្នកជំងឺថ្មី ៦៥៤នាក់ គឺជាពលករបរទេសដែលរស់នៅក្នុងអន្តេវាសិកដ្ឋាន ខណៈ២៦ នាក់ផ្សេងទៀតជាអ្នកកាន់លិខិតអនុញ្ញាតការងារដែលស្នាក់នៅខាងក្រៅអន្តេវាសិកដ្ឋាន។ ចំណែក ករណីឆ្លងសហគមន៍ (សំដៅលើពលរដ្ឋសិង្ហបុរី) ត្រូវបានរាយការណ៍ថាមាន ៤៨ករណីថ្មី ហើយគ្មានករណីនាំចូលឡើយ។
តាមការចុះផ្សាយរបស់ទូរទស្សន៍សិង្ហបុរី Channel News Asia ក្រសួងសុខាភិបាលសិង្ហបុរី សង្កត់ធ្ងន់ថា ចំនួនអ្នកឆ្លងក្នុងចំណោមពលករបរទេសដែលរស់នៅក្នុងអន្តេវាសិកដ្ឋាន បានកើនឡើងគួរឲ្យកត់សម្គាល់។ ចំណែកក្នុងចំណោមពលករបរទេសដែលមិនរស់នៅក្នុងអន្តេវាសិកដ្ឋាន តួលេខឆ្លងថ្មី ក៏បានកើនឡើងផងដែរ ដោយជាមធ្យម១៥នាក់ក្នុងមួយថ្ងៃ ក្នុងរយៈពេល១សប្តាហ៍ចុងក្រោយ។ ដោយឡែក តួលេខឆ្លងថ្មីក្នុងសហគមន៍បានថយចុះបន្ដិច ដោយជាមធ្យម៣៧នាក់ក្នុងមួយថ្ងៃក្នុងរយៈពេល១សប្តាហ៍ចុងក្រោយ។
អន្តេវាសិកដ្ឋាន៩កន្លែង ដែលជាផ្ទះរបស់ពលករបរទេស៥ម៉ឺននាក់ (ភាគច្រើនមកពីបង់ក្លាដែស, ឥណ្ឌា និងចិន) កន្លងទៅ ត្រូវបានរដ្ឋាភិបាលសិង្ហបុរីប្រកាសដាក់ «ជាតំបន់ដាច់ដោយឡែក»។ យ៉ាងណាមិញ ក្រោយហេតុការណ៍ករណី COVID-19 ហក់ឡើងក្នុងចំណោមពលករបរទេសទាំងនេះ នៅថ្ងៃព្រហស្បតិ៍ រដ្ឋាភិបាលសិង្ហបុរី បានសម្រេចដាក់អន្តេវាសិកដ្ឋានទាំងអស់ក្នុងប្រទេសស្ថិតក្នុងសភាពបិទជិត (lockdown)។ នេះមានន័យថា ពលករប្រមាណ៣០ម៉ឺននាក់ ប្ររ៉ឈមការរឹតត្បិតការដើរហើរយ៉ាងតឹងរ៉ឹង។
គួររម្លឹកផងដែរថា កាលពីថ្ងៃពុធ ១៥ ខែមេសា ក្រសួងសុខាភិបាលសិង្ហបុរី ក៏បានរកឃើញករណីឆ្លងCOVID-19ថ្មី ចំនួន ៤៤៧នាក់ ក្នុងនោះ៤០៤នាក់ជាពលករបរទេសដែលរស់នៅក្នុងអន្តេវាសិកដ្ឋាន។ នេះមានន័យថា ២ថ្ងៃជាប់គ្នា ករណីឆ្លងCOVID-19ក្នុងចំណោមពលករបរទេសដែលរស់នៅក្នុងអន្តេវាសិកដ្ឋានមានសរុបរហូតដល់ជាង១០០០នាក់ហើយ៕
Tag:
សិង្ហបុរី
COVID-19
ពលករបរទេស
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
