COVID-19
អន្តរជាតិ
សមាជិកសភាអាមេរិក ស្នើលោក ត្រាំ ឲ្យផ្អឹបជំនួយ WHO រហូតលោក Tedros លាលែងពីតំណែង លោកTedros Adhanom Ghebreyesus អគ្គនាយកWHO-AFP
× សមាជិកសភាបក្សសាធារណរដ្ឋមួយចំនួន នៅថ្ងៃទី១៦ ខែមេសា គាំទ្រការរិះគន់របស់ប្រធានាធិបតី ដូណាល់ ត្រាំទៅ លើអង្គការសុខភាពពិភពលោក (WHO) ដោយមួយចំនួនបានផ្តល់យោបល់ឲ្យផ្អាកការផ្តល់វិភាគទានរហូតដល់អគ្គនាយកអង្គការសុខភាពពិភពលោក លាលែងចេញពីតំណែង។ សមាជិកខ្លះទៀត ថែមទាំងស្នើឲ្យមានការស៊ើបអង្កេតអន្តរជាតិចំពោះការគ្រប់គ្រងជំងឺ COVID-19 ។
សមាជិកសភាចំនួន១៧រូប មកពីគណកម្មធិការកិច្ចការបរទេសនៃសភាតំណាង បានសសេរសំបុត្រទៅកាន់ប្រធានាធិបតី ដូណាល់ ត្រាំ ដោយបង្ហាញការគាំទ្រលើការសម្រេចចិត្តក្នុងការផ្អាកផ្តល់វិភាគទានដល់អង្គការសុខភាពពិភពលោក។ សមាជិកសភាទាំងនេះ ក៏ស្នើឲ្យអាមេរិកគួរបន្តផ្តល់វិភាគទានវិញដរាបណាលោក Tedros Adhanom Ghebreyesus អគ្គនាយកអង្គការសុខភាពពិភពលោកលាលែងចេញពីតំណែង។
ក្នុងលិខិតផ្ញើទៅកាន់លោក ត្រាំ សមាជិកសភាទាំងនោះនិយាយថា ពួកគេបាត់បង់ទំនុកចិត្តលើលោក Tedros ហើយបន្ទោសអង្គការសុខភាពពិភពលោក និងបក្សកុម្មុយនិស្តចិនដែលបណ្តាលឲ្យមានវិបត្តិសុខាភិបាលសកលបែបនេះ ប៉ុន្តែក៏ឆ្លៀតសសើរពីតួនាទីដ៏សំខាន់ដែលអង្គការនេះបានបំពេញនៅជុំវិញពិភពលោក។
បន្ថែមពីនេះ សមាជិកសភាទាំងនោះលើកឡើងថា អង្គការសុខភាពពិភពលោក ត្រូវការការរុះរើរៀបចំសារជាថ្មី ប៉ុន្តែគេគួរតែធ្វើរឿងនេះក្រោយពេលវិបត្តិជំងឺCOVID-19ចប់សព្វគ្រប់។ នេះយោងតាមទីភ្នាក់ងារសារព័ត៌មាន Reuters ។
«ទោះជាយ៉ាងណាក្តី វាជាការសំខាន់ដែលយើងត្រូវបញ្ចេញសកម្មភាពឲ្យបានរហ័ស ដើម្បីធានាភាពមិនលម្អៀង តម្លាភាព និងភាពស្របច្បាប់របស់ស្ថាប័នដ៏មានតម្លៃមួយនេះ»។ នេះជាការដកស្រង់ពីលិខិតរបស់សមាជិកសភា ដែលមានលោក Mike McCaul ជាអ្នកនាំមុខ។
ចំណែកឯខាងព្រឹទ្ធសភាវិញ ព្រឹទ្ធសមាជិកចំនួន៨ ដែលចេញមុខដោយព្រឹទ្ធសមាជិកMarco Rubio ក៏បានសសេរសំបុត្រទៅលើប្រធានាធិបតី ត្រាំ ដែរ ដោយអំពាវនាវឲ្យលោកធ្វើការជាមួយប្រទេសកូរ៉េខាងត្បូង ជប៉ុន និងបណ្តាប្រទេសអឺរ៉ុបដើម្បីស៊ើបអង្កេតពីដើមកំណើតនៃវីរុសកូរ៉ូណា និងជំងឺCOVID-19 ក៏ដូចជាការសម្រេចចិត្តរបស់ WHO ។ សំបុត្ររបស់ព្រឹទ្ធសមាជិកទាំង៨រូប ពុំបានរួមបញ្ចូលអនុសាសន៍ ដូចជាការលាលែងពីតំណែងរបស់លោក Tedrosឡើយ។
គួរបញ្ជាក់ផងដែរថា ការសម្រេចផ្អាកផ្តល់វិភាគទានទៅកាន់អង្គការសុខភាពពិភពលោកកាលពីថ្ងៃទី១៤ ខែមេសា ដោយលោក ត្រាំ រងការរិះគន់ពីអ្នកជំនាញសុខាភិបាល ក៏ដូចជាបក្សប្រជាធិបតេយ្យ។ មុននឹងផ្អាកផ្តល់វិភាគទាន លោក ត្រាំ បានរិះគន់អង្គកាសុខភាពពិភពលោកចំពោះការជួយផ្សព្វផ្សាយព័ត៍មានមិនត្រឹមត្រូវរបស់ចិន និងអត់អោនឲ្យចិនជ្រុលហួសហេតុ៕
© រក្សាសិទ្ធិដោយ thmeythmey.com