COVID-19
អន្តរជាតិ
រដ្ឋាភិបាលថៃ ដាក់ពង្រាយទ័ពត្រៀមទទួលពលរដ្ឋត្រលប់ពីបរទេស កងទ័ពថៃ នៅព្រំដែនថៃ-ម៉ាឡេស៊ី ក្នុងខេត្ត Narathiwat (បាងកកប៉ុស្តិ៍)
× រដ្ឋាភិបាលថៃ កំពុងត្រៀមលក្ខណៈចាត់ចែងពលរដ្ឋខ្លួនដែលត្រលប់ពីបណ្ដាប្រទេសជិតខាងមកកាន់ស្រុកកំណើតវិញក្នុងបរិយាកាសជំងឺរាតត្បាតសាកល COVID-19 រួមមានពលកររាប់ពាន់នាក់មកពីព្រំដែនម៉ាឡេស៊ី។ ពួកគេនឹងចាប់ផ្ដើមចូលមកក្នុងប្រទេសថៃ នាថ្ងៃទី១៨ ខែមេសា។
ថ្លែងប្រាប់កាសែត បាងកកប៉ុស្តិ៍ អ្នកនាំពាក្យយោធាថៃ Sirichan Ngathong បញ្ជាក់ថា ប្រមុខកងទ័ពជើងគោកថៃ ឧត្តមសេនីយ៍ Apirat Kongsompong បានដាក់ចេញបញ្ជាទៅកាន់កងកម្លាំងយោធាតំបន់ទាំងអស់នៅតាមព្រំដែនត្រូវសហការជាមួយអាជ្ញាធរខេត្តដោះស្រាយជាមួយពលរដ្ឋថៃដែលនឹងត្រលប់មកពីបណ្ដាប្រទេសក្បែរខាង តាមរយៈប៉ុស្តិ៍ត្រួតពិនិត្យសរុប ១៥ទីតាំងនៅទូទាំងប្រទេស។
កងទ័ពនឹងជួយសម្របសម្រួលការចូលមកដល់របស់ពលរដ្ឋថៃ ដូចជា ការត្រួតពិនិត្យកម្ដៅ និងជួយដឹកពួកគេទៅកាន់ទីតាំងធ្វើចត្ដាឡីស័ក ។ លោក Sirichan បញ្ជាក់បែបនេះ ដោយបន្ថែមថា នាយឧត្តមសេនីយ៍ Apirat បានសង្កត់ធ្ងន់ពីភាពចាំបាច់ក្នុងការបង្ការករណីឆ្លងព្រំដែនដោយខុសច្បាប់ក្នុងគ្រប់រូបភាពទាំងអស់។
តាមកាសែតដដែល ក្រសួងមហាផ្ទៃថៃ បានប៉ាន់ស្មានថា យ៉ាងហោចណាស់ពលរដ្ឋថៃ៨០០០នាក់ ដែលមានលិខិតបញ្ជាក់សុខភាពក្នុងប្រទេសម៉ាឡេស៊ី ត្រូវបានកំណត់ឲ្យត្រលប់មកស្រុកកំណើតវិញ តាមរយៈព្រំដែនភាគខាងត្បូង។ ក្នុងខេត្ត Narathiwat ពលករថៃជិត១០០នាក់ដែលជាប់គាំងក្នុងប្រទេសម៉ាឡេស៊ី បានឆ្លងព្រំដែនខុសច្បាប់មកកាន់ទឹកដីថៃវិញ ដោយពួកគេអះអាងថា ពួកគេនឹងដាច់ពោះស្លាប់ខណៈរង់ចាំតម្រង់ជួរចាំត្រលប់មកស្រុកវិញ។
អាជ្ញាធរខេត្តភាគខាងត្បូងនៃប្រទេសនេះ បានបញ្ជាក់នៅថ្ងៃទី១៦ ខែមេសាថា សមត្ថកិច្ចបានឃាត់ខ្លួនមនុស្ស៩៤នាក់ ដែលប្រើប្រាស់ផ្លូវទឹក ឆ្លងចូលមកកាន់ទឹកដីថៃ ពីប្រទេសម៉ាឡេស៊ី។ ពួកគេត្រូវបានពិន័យជាប្រាក់៨០០បាតក្នុងម្នាក់ ហើយត្រូវបានដាក់ឲ្យនៅដាច់ដោយឡែកសម្រាប់ពេល២សប្តាហ៍។
រដ្ឋាភិបាលថៃ បានប្រកាសថា ខ្លួននឹងអនុញ្ញាតឲ្យពលរដ្ឋខ្លួនរហូតដល់៣០០នាក់ ត្រលប់ពីប្រទេសម៉ាឡេស៊ីចូលប្រទេសវិញរៀងរាល់ថ្ងៃ។ ការកំណត់បែបនេះ គឺជាចំណាត់ការមួយដែលធានាឲ្យបាននូវប្រសិទ្ធភាពនៃការបង្ការ COVID-19 ដោយផ្អែកលើទីតាំងចត្តាឡីស័កដែលមានក្នុងប្រទេស។ បើតាមរបាយការណ៍របស់រដ្ឋាភិបាលថៃ គិតត្រឹមថ្ងៃ៩ មេសា ពលរដ្ឋថៃ ប្រមាណ ១៤០០០នាក់ ដែលជាប់គាំងនៅបរទេស បានចុះឈ្មោះត្រលប់មកស្រុកកំណើតវិញ។
សូមបញ្ជាក់ថា គិតត្រឹមថ្ងៃ១៦ ខែមេសា ប្រទេសថៃ មានករណីឆ្លងCOVID-19សរុបចំនួន២៦៧២ករណី ខណៈអ្នកស្លាប់មាន ៤៦នាក់។ អ្នកជាសះស្បើយមាន ១៥៩៣នាក់៕
© រក្សាសិទ្ធិដោយ thmeythmey.com