COVID-19
អន្តរជាតិ
COVID-19៖ សិង្ហបុរី ពិន័យមនុស្ស២៨នាក់ ព្រោះបំពានវិធានការគម្លាតសុវត្ថិភាព
× មនុស្សចំនួន២៨នាក់ ទទួលរងការពិន័យ១ពាន់ដុល្លារសិង្ហបុរី (៧០២ដុល្លារអាមេរិក) និង៤នាក់ទៀតស្ថិតក្រោមការស៊ើបអង្កេតចំពោះការមិនអនុវត្តតាមវិធានការគម្លាតសុវត្ថិភាពនៅពេលដឹកជញ្ជូនកម្មករតាមរថយន្ត។ នេះយោងតាមសារព័ត៌មានសិង្ហបុរី Channel News Asia។
យោងតាមក្រសួងការងារសិង្ហបុរី អ្នកដែលរកឃើញថាមានចេតនាបំពានច្បាប់ នឹងប្រឈមទៅនឹងការពិន័យ១ម៉ឺនដុល្លាសិង្ហបុរី (៧,០២៦ដុល្លារអាមេរិក) ជាប់ពន្ធាគារចំនួន៦ខែ ឫអនុវត្តទោសទាំង២ខាងលើ។ លើសពីនោះ អាជ្ញាធរ ក៏ នឹងពិន័យជាប្រាក់លើក្រុមហ៊ុនដឹកជញ្ជូន និងអ្នកបើកបរ បើសិនជាមិនអនុវត្តតាមវិធានការគម្លាតសុវត្ថិភាព នៅពេលដឹកជញ្ជូនកម្មករផងដែរ។
មនុស្សទាំង២៨នាក់ដែលជាបុគ្គលិកក្រុមហ៊ុនឯកជន ដែលរកឃើញថាមិនអនុវត្តតាមបញ្ញត្តិខាងលើ ត្រូវបានរកឃើញ អំឡុងពេលចុះអនុវត្តច្បាប់រួមរវាងអាជ្ញាធរដឹកជញ្ជូនផ្លូវគោក និងនគរបាលចរាចរណ៍។
ក្រសួងការងារសិង្ហបុរីបានបញ្ជាក់ថា មានក្រុមហ៊ុនដឹកជញ្ជូនជាច្រើនបានរៀបចំអនុវត្តវិធានការដែលដាក់ចេញនេះតាំងតែពីថ្ងៃចន្ទ។ ក្រសួងដដែលនេះបន្ថែមថា៖ «យើងទទូចឲ្យនិយោជិកដែលនៅសេសសល់ ធ្វើការកែតម្រូវជាចំបាច់ ដើម្បីអនុវត្តបញ្ញត្តិខាងលើជាបន្ទាន់។ ប្រតិបត្តិការអនុវត្តច្បាប់រួម នៅលើកោះទាំងមូល នឹងបន្តក្នុងរយៈពេលកាត់ផ្តាច់ទំនាក់ទំនងសង្គមនេះ»។
វិធានការគម្លាតសុវត្ថិភាព កំពុងត្រូវបានដាក់ចេញក្រោយករណីឆ្លង COVID-19 បានហក់ឡើងយ៉ាងលឿន។ គិតត្រឹមថ្ងៃទី១៦ ខែមេសា ករណីឆ្លងនៅសិង្ហបុរី មានលើសបួននាក់ ដែលករណីឆ្លងចុងក្រោយកើតឡើងលើពលករបរទេស៕
© រក្សាសិទ្ធិដោយ thmeythmey.com