COVID-19
អន្តរជាតិ
រដ្ឋាភិបាលជប៉ុន នឹងចែកលុយ៩៣០ដុល្លារជូនពលរដ្ឋគ្រប់រូបនៅខែឧសភា នាយករដ្ឋមន្ត្រីជប៉ុន ស៊ិនហ្សូ អាបេ (AFP)
× រដ្ឋមន្ត្រីហិរញ្ញវត្ថុជប៉ុន លោក Taro Aso បានបញ្ជាក់នៅថ្ងៃទី១៧ ខែមេសាថា ការផ្ដល់ប្រាក់៩៣០ដុល្លារសម្រាប់មនុស្សម្នាក់ៗរបស់រដ្ឋាភិបាល គួរតែត្រៀមរួចរាល់ត្រឹមខែឧសភាខាងមុខ។ លោករដ្ឋមន្ត្រីសង្កត់ធ្ងន់ថា ការឆ្លើយតបលឿនរហ័ស គឺមានសារសំខាន់ក្នុងការបន្ធូរបន្ថយការដាំក្បាលចុះនៃសេដ្ឋកិច្ចបណ្ដាលមកពី COVID-19 ។
ថ្លែងនៅសន្និសីទព័ត៌មានមួយ លោករដ្ឋមន្ត្រី Taro Aso គូសបញ្ជាក់ថា ខណៈមនុស្សរាល់គ្នា នឹងមានសិទ្ធិទទួលយកប្រាក់៩៣០ដុល្លារនេះ ពួកគេក៏នឹងត្រូវការដាក់ពាក្យសុំផងដែរ។ តាមការចុះផ្សាយរបស់ទីភ្នាក់ងារព័ត៌មាន Kyodo ការចែកប្រាក់នេះ រំពឹងផ្ដល់ជូនជនបរទេសដែលទទួលសិទ្ធិស្នាក់នៅអចិន្ត្រៃយ៍ក្នុងប្រទេសជប៉ុន ក៏ដូចជាពលរដ្ឋជប៉ុន។
«យើងជឿជាក់ថា ល្បឿនគឺមានសារសំខាន់ណាស់។ ខ្ញុំគិតថា យើងអាចសម្រេចគោលដៅនេះបាននាខែឧសភា»។ លោក រដ្ឋមន្ត្រី Aso បញ្ជាក់បែបនេះ។ ការប្រកាសរបស់លោករដ្ឋមន្ត្រីហិរញ្ញវត្ថុជប៉ុនរូបនេះ ធ្វើឡើងមួយថ្ងៃក្រោយលោកនាយករដ្ឋមន្ត្រី ស៊ិនហ្សូ អាបេ បានប្រកាសឲ្យពន្លឿនគម្រោងផ្ដល់ប្រាក់ជូនពលរដ្ឋជប៉ុននេះ។
ដំបូងឡើយ លោក អាបេ មានគម្រោងផ្ដល់ប្រាក់រហូតដល់ជាង២៧៨៣ដុល្លារជូនដល់គ្រួសារជប៉ុនដែលរងគ្រោះ។ តែផែនការនេះរងការរិះគន់ពីសំណាក់សម្ព័ន្ធភាពបក្សកាន់អំណាចដោយអះអាងថាវានៅពុំទាន់គ្រប់គ្រាន់ឡើយសម្រាប់ពលរដ្ឋរងគ្រោះដោយសារCOVID-19។
ជាមួយករណីឆ្លងសរុបឡើងដល់ជាង៩០០០ករណី ហើយអ្នកស្លាប់ជិត២០០នាក់ លោក ស៊ិនហ្សូ អាបេ នៅថ្ងៃទី១៦ ខែមេសា បានសម្រេចដាក់ប្រទេសទាំងមូលក្នុងស្ថានភាពអាសន្ន ក្នុងបំណងពន្យឺតការឆ្លងជំងឺCOVID-19។ ការប្រកាសដាក់ប្រទេសទាំងមូល ក្នុងស្ថានភាពអាសន្នបែបនេះ នឹងអនុញ្ញាតឲ្យអភិបាលតំបន់ អំពាវនាវឲ្យមនុស្សស្ថិតនៅក្នុងផ្ទះ ក៏ប៉ុន្តែពុំមានការដាក់ពិន័យអ្វីឡើយ។ វិធានការដែលគេឃើញថា អនុវត្តនៅជប៉ុន មានសភាពធូរស្រាលជាងប្រទេសដទៃ៕
Tag:
ជប៉ុន
COVID-19
Taro Aso
ស៊ិនហ្សូ អាបេ
© រក្សាសិទ្ធិដោយ thmeythmey.com