ជាតិ
សង្គមជាតិ
៣ខែ២០២០ គ្រោះថ្នាក់ចរាចរណ៍ថយ ចុះ១៤ភាគរយ រូបភាពពីគណៈកម្មាធិការជាតិសុវត្ថិភាពចរាចរណ៍ផ្លូវគោក
× ភ្នំពេញ៖ រយៈពេល៣ខែ គិតចាប់ពីថ្ងៃទី២៤ ខែមករា ដល់ថ្ងៃទី២១ ខែមីនា ឆ្នាំ២០២០ គណៈកម្មាធិការជាតិសុវត្ថិភាពចរាចរណ៍ផ្លូវគោក បានរឹតបន្តឹងលើការអនុវត្តច្បាប់ស្ដីពីចរាចរណ៍ផ្លូវគោក ដើម្បីកាត់បន្ថយគ្រោះថ្នាក់ចរាចរណ៍ ដែលមានកំណើនកាលពីឆ្នាំ២០១៩។ រយៈពេលខែនៃការរឹតបន្តឹងនេះ ឃើញថាចំនួនគ្រោះថ្នាក់ចរាចរណ៍បានថយចុះ១៥០លើក ស្នើ១៤ភាគរយ ហើយចំនួនអ្នកស្លាប់ថយចុះ២០នាក់ ស្នើនឹង៤ភាគរយ និងអ្នករបួសថយចុះចំនួន២៧៧នាក់ ស្នើនឹង១៧ភាគរយ បើប្រៀបធៀបនឹងរយៈពេលដូចគ្នា កាលពីឆ្នាំ២០១៩។
តាមរយៈសេចក្តីជូនដំណឹងដែលចេញនៅថ្ងៃទី១៧ ខែមេសា ឆ្នាំ២០២០ ទាក់ទងនឹងការអនុវត្តអនុក្រឹត្យថ្មីស្តីពីការពិន័យអន្តរកាលចំពោះបទល្មើសចរាចរណ៍ផ្លូវគោក សម្តេច ស ខេង រដ្ឋមន្ត្រីក្រសួងមហាផ្ទៃ បានលើកឡើងថា គណៈកម្មាធិការជាតិសុវត្ថិភាពចរាចរណ៍ផ្លូវគោក បានកំណត់ឆ្នាំ២០២០ ក្នុងការរឹតបន្តឹងការអនុវត្តច្បាប់ស្ដីពីគ្រោះថ្នាក់ចរាចរណ៍ផ្លូវគោក ដើម្បីកាត់បន្ថយគ្រោះថ្នាក់ដែលបានកើនឡើងយ៉ាងច្រើនក្នុងឆ្នាំ២០១៩។
សម្តេច ស ខេង ដែលមានតួនាទីជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោកផងនោះ បន្តថា ទោះបីជាមានការកាត់បន្ថយក៏ពិតមែន ប៉ុន្តែគ្រោះថ្នាក់ចរាចរណ៍នៅតែមានចំនួនច្រើនគួរឲ្យកត់សម្គាល់ ដែលវាធ្វើឲ្យប៉ះពាល់ដល់ជីវភាពសង្គម និងសណ្ដាប់ធ្នាប់សាធារណៈផងដែរ។
សូមបញ្ជាក់ថា គិតចាប់ពីថ្ងៃទី១ ខែឧសភា ឆ្នាំ២០២០ កងកម្លាំងនគរបាលចរាចរណ៍ផ្លូវគោកនឹងអនុវត្តការពិន័យអន្តរាការណ៍ចំពោះអំពើល្មើសច្បាប់ស្ដីពីចរាចរណ៍ផ្លូវគោកដែលបានតម្លើងកម្រិតទឹកប្រាក់ពិន័យក្នុងចំនួនពី ៣-៥ដង៕
Tag:
គ្រោះថ្នាក់ចរាចរណ៍
© រក្សាសិទ្ធិដោយ thmeythmey.com