COVID-19
អន្តរជាតិ
ករណីឆ្លង COVID-19 នៅសិង្ហបុរីហក់ឡើងជិត៦ពាន់នាក់, ឈរលេខពីរនៅអាស៊ាន
រូបភាព AFP
×![]()
ដោយ: តន ចាន់រិទ្ធារ៉ា
សិង្ហបុរី នៅថ្ងៃទី១៨ ខែមេសា បានរាយការណ៍ពីការហក់ឡើងខ្ពស់បំផុតនៃចំនួនអ្នកឆ្លង COVID-19 ប្រចាំថ្ងៃដែលមានដល់ទៅ៩៤២នាក់។ តួលេខឆ្លងសរុបនៅបុរីរដ្ឋមួយនេះ ក៏កើនដល់៥៩៩២នាក់ ដែលភាគច្រើនជាពលករបរទេស។ ហ្វីលីពីន ជាប្រទេសមានករណីឆ្លងច្រើនជាងគេនៅអាស៊ាន គឺ៦០៨៧ នាក់។
ពីរថ្ងៃជាប់ៗគ្នាមកហើយ សិង្ហបុរីមានករណីឆ្លងប្រចាំថ្ងៃក្បែរមួយពាន់នាក់បែបនេះ។ ខណៈចំនួនករណីឆ្លងកើនឡើងក្នុងចំណោមពលករបរទេស ចំនួនករណីឆ្លងថ្មីក្នុងចំណោមពលរដ្ឋសិង្ហបុរីមានមិនដល់២០នាក់ផង។
ក្នុងចំណោមអ្នកឆ្លងទាំងអស់នៅសិង្ហបុរីចំនួន៥៩៩២នាក់ មានជាង៦០ភាគរយជាពលករបរទេសដែលធ្វើការនៅតាមការដ្ឋានសំណង់ និងការសាងសង់កប៉ាល់ជាដើម។ អាគាររស់នៅរួមគ្នារបស់ពលករទាំងនេះ ជាកន្លែងចម្លង COVID-19 ដ៏ធំនៅសិង្ហបុរី។ គេរំពឹងថា ចំនួនឆ្លងប្រចាំថ្ងៃច្រើនបែបនេះ នឹងបន្តមានទៀត ខណៈអាជ្ញាធរបង្កើនការធ្វើតេស្តអ្នកដែលរស់ក្នុងអាគារជាមួយពលករដែលមានលទ្ធផលវិជ្ជមាន។
ឈរលើសិង្ហបុរី គឺហ្វីលីពីន។ នៅថ្ងៃទី១៨ ខែមេសា ក្រសួងសុខាភិបាលហ្វីលីពីនបានប្រកាសពីករណីឆ្លងចំនួន២០៩នាក់ទៀត ដែលនាំតួលេខឆ្លងនៅប្រទេសមានកើនដល់៦០៨៧នាក់ ដែលចំនួនច្រើនជាងគេបង្អស់នៅអាស៊ាន។
នៅលេខបី គឺឥណ្ឌូណេស៊ី ដែលមានចំនួនអ្នកឆ្លងសរុប៥៩២៣ គិតត្រឹមព្រឹកថ្ងៃទី១៨ ខែមេសា។ ឥណ្ឌូណេស៊ី មានអ្នកស្លាប់ចំនួន៥២០នាក់ ឈរលេខមួយនៅអាស៊ាន។ បន្ទាប់ពីឥណ្ឌូណេស៊ី គឺម៉ាឡេស៊ី ដែលមានករណីឆ្លងចំនួន៥២៥១នាក់ គិតត្រឹមថ្ងៃទី១៧ ខែមេសា។ នេះបើតាមវេបសាយ Worldometers ៕
Tag:
សិង្ហបុរី
អាស៊ាន
COVID-19
© រក្សាសិទ្ធិដោយ thmeythmey.com
