COVID-19
អន្តរជាតិ
លោក ត្រាំ ថា ចិននឹងជួបបញ្ហាធំ បើពិតជាមានចេតនាលាក់បាំងជំងឺ COVID-19 រូបភាព AFP
× ប្រធានាធិបតីអាមេរិក ដូណាល់ ត្រាំ នៅថ្ងៃទី១៨ ខែមេសា បានព្រមានចិនចំជុំវិញការរាលដាលជំងឺផ្លូវដង្ហើមបង្កដោយកូរ៉ូណាវីរុស (COVID-19) ។ សម្រាប់លោក ត្រាំ ចិនគេចមិនផុតពីផលវិបាកឡើយ បើពិតមានជាមានចេតនាលាក់បាំងជំងឺនេះតាំងពីដំបូងមកនោះ ហើយបណ្ដោយឲ្យជំងឺនេះឆ្លងទូទាំងពិភពលោក។ លោក ត្រាំ ក៏នៅតែមិនជឿថា ចំនួនអ្នកស្លាប់នៅចិនមានត្រឹមខ្ទង់ពាន់នាក់ដូចរបាយការណ៍រដ្ឋាភិបាលដែរ។
«វាគួរតែត្រូវបានបញ្ឈប់ត្រឹមចិន មុនពេលវាចាប់ផ្ដើមរាលដាល ប៉ុន្តែរឿងមិនកើតបែបនោះឡើយ។» ប្រធានាធិបតីអាមេរិក ដូណាល់ ត្រាំ និយាយបែបនេះក្នុងសន្និសីទសារព័ត៌មានប្រចាំថ្ងៃស្ដីពីការវិវត្តរបស់ជំងឺ COVID-19 ។ លោក ត្រាំ ទំនងចង់ចោទចិនថា មិនបានអនុវត្តវិធានការឲ្យទាន់ពេល និងសមស្របដើម្បីទប់ស្កាត់វីរុសកូរ៉ូណា ឬក៏ថែមទាំងមានចេតនាឲ្យវីរុសនេះសាយភាយទៅកាន់ប្រទេសផ្សេងទៀតតែម្ដង។
បច្ចុប្បន្ន COVID-19 ឆ្លងរាលដាលពេញពិភពលោកជាមួយនឹងករណីឆ្លងសរុបកើនដល់ជាងពីរលានបីសែននាក់ និងអ្នកស្លាប់មាន១៦ម៉ឺននាក់ផងដែរ។ លោក ត្រាំ ប្រាប់អ្នកសារព័ត៌មានថា ពិភពលោកកំពុងរងគ្រោះដោយសារទង្វើរបស់ចិន។
ឆ្លើយនឹងសំណួរថា ចិននឹងប្រឈមមុខបញ្ហាអ្វីឬទេចំពោះរឿង COVID-19 នេះ ប្រធានាធិបតីអាមេរិកផ្ញើសារព្រមានថា ប្រសិនបើចិនពិតជាអ្នកទទួលខុសត្រូវលើបញ្ហានេះ ចិនច្បាស់ជាជួបបញ្ហា ព្រោះខុស គឺខុស។ លោក ត្រាំ បានចោទជាសំណួរថា៖ «តើនេះជាកំហុសកើតចេញពីការគ្មានលទ្ធភាពគ្រប់គ្រង ឬជាកំហុសចេតនា? វាជារឿងពីរខុសគ្នាស្រឡះ។»
ក្នុងសន្និសីទសារព័ត៌មានដដែល លោក ត្រាំ ក៏បង្ហាញការមិនពេញចិត្តរបស់ខ្លួនទៅនឹងការបដិសេធរបស់ចិនដែលមិនអនុញ្ញាតឲ្យអ្នកជំនាញអាមេរិកចូលស្រាវជ្រាវនៅដំណាក់កាលដំបូងនៃការផ្ទុះវីរុសនៅវូហាន។ ត្រង់ចំណុចនេះ ទីក្រុងប៉េកាំង ធ្លាប់និយាយថា ខ្លួនបានអនុញ្ញាតឲ្យអ្នកជំនាញអាមេរិកចូលរួមក្នុងក្រុមបេសកកម្មពិសេសសមួយរបស់អង្គការសុខភាពពិភពលោកដើម្បីរកការពិតទាក់ទងប្រភេទវីរុសថ្មីផងដែរ។
ទោះជាយ៉ាងណា រដ្ឋបាលប្រធានាធិបតីអាមេរិក នៅតែសង្ស័យថា COVID-19 មានប្រភពពីមន្ទីរពិសោធន៍មួយកន្លែងនៅវូហានដែលនៅក្បែរផ្សារមួយដែលត្រូវបានចាត់ទុកជាកន្លែងចម្លងវីរុសដំបូងគេ មុនរាលដាលនៅចិន រួចបន្តទៅកាន់ផ្នែកផ្សេងទៀតរបស់ពិភពលោក។ លោក ត្រាំ ផ្ទាល់ ក៏មិនជឿថា អ្នកស្លាប់នៅចិនមានអត្រា០,៣៣ភាគរយក្នុងចំណោមមនុស្ស១សែននាក់ ខណៈអាមេរិកមានអត្រា១១,២៤ភាគរយក្នុង១សែននាក់ ខណៈអេស្ប៉ាញមាន៤២,៨២ភាគរយឯណោះ៕
Tag:
អាមេរិក
ចិន
ដូណាល់ ត្រាំ
COVID-19
© រក្សាសិទ្ធិដោយ thmeythmey.com