ឡាវ បន្តដាក់ប្រទេសក្នុងភាពរឹតត្បិតដល់ថ្ងៃ ៣ឧសភា ខណៈស្ថានភាពឆ្លងវីរុស Covid-19 នៅតែខ្ពស់

COVID-19

អន្តរជាតិ

ឡាវ បន្តដាក់ប្រទេសក្នុងភាពរឹតត្បិតដល់ថ្ងៃ ៣ឧសភា ខណៈស្ថានភាពឆ្លងវីរុស Covid-19 នៅតែខ្ពស់

19, Apr 2020 , 8:19 pm

រូបភាព

ដោយ:

លោកនាយករដ្ឋមន្ត្រីឡាវ ថុងលួន ស៊ីសូលីត ថ្មីៗនេះ បានចេញប្រកាសមួយដោយបន្ថែមថ្ងៃដាក់ប្រទេសក្នុងស្ថានភាពរឹតត្បិតរហូតដល់ឧសភា។ សេចក្តីប្រកាសនេះ ធ្វើឡើងដោយសារតែរដ្ឋាភិបាល នៅតែមើលឃើញពីផុយស្រួយនៃការឆ្លង វីរុស Covid-19 នៅតែខ្ពស់សម្រាប់ប្រជាជនឡាវ។

តាមរយៈសន្និសីទសារព័ត៌មាន លោកនាយករដ្ឋមន្ត្រី ថុងលួន ស៊ីសូលីត បានលើកឡើងថា ស្ថានភាពពាក់ព័ន្ធវីរុស Covid-19 របស់ឡាវ នៅតែអាចងាយឆ្លងរាលដាលបន្ថែមទៀតពីលើករណីដែលរកឃើញបច្ចុប្បនុ្ន។ នេះបើយោងតាមការចុះផ្សាយរបស់សារព័ត៌មានឡាវ Laotian Times។

លោក ថ្លែងថា មានអ្នកជំងឺដែលវីរុសបានចាកចេញពីមន្ទីរពេទ្យខ្លះហើយបន្ទាប់ពីទទួលបានការព្យាបាលសះស្បើយពេញលេញ ក៏ប៉ុន្តែការគំរាមកំហែងពីការរីករាលដាលនៃជំងឺនៅតែខ្ពស់ ដែលចំណុចនេះហើយ លោក ត្រូវសម្រេចចិត្តក្នុងពន្យាពេលបន្ថែមក្នុងការដាក់ប្រទេសស្ថិតក្នុងភាពរឹតត្បិតរហូតដល់ថ្ងៃ៣ ឧសភាក្រោយ។

យ៉ាងណាក៏ដោយ ជាមួយនឹងការបន្ថែមការរឹតត្បិតនេះ លោកនាយករដ្ឋមន្ត្រី ក៏បានលើកឡើងពីលទ្ធភាពក្នុងការបន្ធូរបន្ថយ និងដកបម្រាមខ្លះទៅលើអាជីវកម្មមួយចំនួន ដែលប៉ះពាល់អវិជ្ជមានដល់សេដ្ឋកិច្ចជាតិផងដែរ។

គួររម្លឹកបន្តិចថា ឡាវ គឺជារដ្ឋអាស៊ានមួយ ដែលទើបតែរកឃើញករណីឆ្លងពីវីរុស Covid-19ក្រោយគេ។ ដើម្បីធានាពីសុវត្ថិភាពប្រជាជន រដ្ឋាភិបាលឡាវកន្លងមក បានចេញលិខិតបញ្ជាមួយដោយដាក់ប្រទេសក្នុងការរឹតត្បិតចាប់ពីថ្ងៃទី១ដល់ថ្ងៃទី១៩ មេសា។ ប្រជាជន ត្រូវបានហាមឃាត់ឲ្យធ្វើដំណើរចេញពីផ្ទះលើកលែងមានធុរៈចាំបាច់បំផុត ខណៈមន្ត្រីរដ្ឋការ ឬបុគ្គលិក ក្រុមហ៊ុន ត្រូវបានលើកទឹកចិត្តឲ្យធ្វើការពីផ្ទះជំនួសវិញ៕