ជាតិ
ទំនិញនិងរបស់របរផ្សេងៗ ដែលផ្ញើទៅក្រៅប្រទេសឬផ្ញើមកពីក្រៅប្រទេស តាមប្រៃសណីយ៍កម្ពុជា (រូបពីប្រៃសណីយ៍កម្ពុជា)
×![]()
ដោយ: ថ្មីៗ
ប្រៃសណីយ៍កម្ពុជា សម្រេចផ្អាកការទទួលបញ្ញើ ដែលផ្ញើទៅគ្រប់ប្រទេស។ ប្រៃសណីយកម្ពុជា លើកមូលហេតុថា ការរាតដ្បាតជំងឺកូវីដ-១៩ នៅជំវិញពិភពលោក បានធ្វើឲ្យមធ្យោបាយដឹកជញ្ជូនតាមផ្លូវអាកាស «អាក់ខានស្ទើរតែទាំងស្រុង»។
តាមរយៈសេចក្តីជូនដំណឹង នៅថ្ងៃទី១៧ ខែមេសា ឆ្នាំ២០២០ ប្រៃសណីយ៍កម្ពុជា បញ្ជាក់ថា៖«យើងខ្ញុំ នឹងទទួលបញ្ញើតាមធម្មតាវិញ នៅពេលស្ថានភាពនៃជំងឺនេះ ត្រូវបានស្ងប់ស្ងាត់»។
ការរាតត្បាតជំងឺកូវីដ-១៩ បានធ្វើឲ្យជើងហោះហើរកម្ពុជា ស្ទើរតែលែងមាន។ លោក ស៊ីន ចាន់សេរីវុត្ថា អគ្គនាយករងបច្ចេកទេសនៃរដ្ឋលេខាធិការដ្ឋានអាកាសចរណ៍ស៊ីវិល លើកឡើងក្នុងសន្និសីទកាសែត នៅទីស្តីការគណៈរដ្ឋមន្ត្រី កាលពីថ្ងៃ១៦ ខែមេសា ឆ្នាំ២០២០ ថា អ្នកធ្វើដំណើរចេញចូលកម្ពុជា តាមយន្តហោះ បានថយចុះដល់ទៅជាង៩០ភាគរយហើយ។
លោក អះអាងថា ក្នុងចំណោមក្រុមហ៊ុនអាកាសចរណ៍បរទេស៣៩នៅកម្ពុជា ភាគច្រើន បានផ្អាកការហោះហើរ ដោយនៅសល់តែរង្វង់៨ទៅ១០ភាគរយប៉ុណ្ណោះ ដែលនៅបន្តការហោះហើរ។ យ៉ាងណា លោក បញ្ជាក់ថា ទោះចំនួនអ្នកជិះ ធ្លាក់ចុះយ៉ាងគំហុកបែបនេះក្តី តែមិនទាន់មានក្រុមហ៊ុនអាកាសចរណ៍ណាមួយ ក្ស័យធនឡើយ។
អត្ថបទទាក់ទង
មានមូលហេតុចម្បងពីរ ដែលធ្វើឲ្យជើងហោះហើរនៅកម្ពុជា ក៏ដូចបណ្តាប្រទេសដទៃ ធ្លាក់ចុះ គឺទីមួយ ដោយសារតែអ្នកដំណើរ លែងហ៊ានធ្វើដំណើរកម្សាន្ត ទៅក្រៅប្រទេសដោយខ្លួនឯងព្រោះ តែខ្លាចឆ្លងជំងឺកូវីដ-១៩ និង ទីពីរ ប្រទេសមួយចំនួន បានបិទប្រទេសខ្លួន មិនឲ្យមានការធ្វើដំណើរចេញចូល។
សម្រាប់កម្ពុជា ក៏បានផ្អាកការទទួលភ្ញៀវបរទេស មកពីប្រទេស៥ គឺអាមេរិក អេស្ប៉ាញ អាល្លឺម៉ង់ អ៊ីតាលី និង បារាំង។ បច្ចុប្បន្ន ប្រទេសទាំង៥នេះ មានអ្នកឆ្លងជំងឺកូវីដ-១៩ ច្រើនជាងគេលើពិភពលោក។
ចំណែកជាមួយប្រទេសជិតខាង គឺវៀតណាម និង ថៃ, កម្ពុជា បានសហការផ្អាកមិនឲ្យពលរដ្ឋនៃប្រទេសទាំងបី ធ្វើដំណើរចេញចូល។ តែចំពោះការដឹកជញ្ជូនទំនិញ ប្រទេសទាំងបី នៅដំណើរការជាធម្មតា។
គិតត្រឹមព្រឹកថ្ងៃទី១៩ ខែមេសា ឆ្នាំ២០២០ កម្ពុជា រកឃើញអ្នកឆ្លងជំងឺកូវីដ-១៩ ១២២នាក់ តែបានជាសះស្បើយវិញ១០៥នាក់ហើយ ខណៈ១៧នាក់ កំពុងសម្រាកព្យាបាល៕
Tag:
COVID-19
ប្រៃសណីយ៍
© រក្សាសិទ្ធិដោយ thmeythmey.com
