COVID-19
ជាតិ
អចលនទ្រព្យ
COVID-19៖ ស្លាកផ្ទះ,អគារ,ដីសម្រាប់ជួល ឬសម្រាប់លក់បង្ហាញខ្លួនកាន់តែច្រើន…!
×![]()
ដោយ: លីម តុលា
ភ្នំពេញ៖ វិបត្តិសុខភាព បាន និងកំពុងរុញច្រានពិភពលោក រួមទាំងកម្ពុជាផងដែ ឲ្យធ្លាក់ចូលនៅក្នុងវិបត្តិសេដ្ឋកិច្ច។ នៅក្នុងប្រទេសកម្ពុជា វិបត្តិកូវីដ-១៩ បង្កផលបះពាល់យ៉ាងខ្លាំងទៅលើវិស័យទេសចរណ៍, វិស័យកាត់ដេរ និងវិស័យអចលនទ្រព្យ។ នៅក្នុងអំឡុងពេលវិបត្តិនេះ គេសង្កេតឃើញស្លាកអគារ គេហដ្ឋាន ដីធ្លី ដាក់សម្រាប់ជួល និងលក់មានវត្តមានកាន់តែច្រើនជាងមុន។ តើនេះបណ្តាលមកពីកត្តាអ្វីខ្លះ?
តាមពិត វិស័យអចលនទ្រព្យកម្ពុជា បានសំយ៉ុងក្បាលចុះចាប់តាំងពីចុងឆ្នាំ២០១៩មកម្ល៉េះ ពោលគឺក្រោយពេលដែលរាជរដ្ឋាភិបាលកម្ពុជា បានប្រកាសបិទកាស៊ីណូអនឡាញ នៅក្រុងព្រះសីហនុ ដែលភាគច្រើន«លេង»ដោយជនជាតិចិន។
ការចាកចេញរបស់អ្នកជំនួញជនជាតិចិនពីក្រុងព្រះសីហនុកាលនោះ បានទាញឲ្យតម្លៃអចលនទ្រព្យស្ទើរគ្រប់ទីកន្លែងនៅក្នុងប្រទេសកម្ពុជាធ្លាក់ចុះ ក្នុងកម្រិតច្រើន ឬតិចទៅតាមតំបន់ផ្សេងៗគ្នា។ អ្នកជំនួញជនជាតិចិន ចាកចេញមិនបានប៉ុន្មានសប្តាហ៍ផង ស្រាប់តែជំងឺកូវីដ-១៩ បានផ្ទុះឡើងនៅក្នុងប្រទេសចិន និងបន្ទាប់មកជំងឺនេះ បានរាលដាលទៅកាន់ប្រទេសផ្សេងទៀតនៅលើពិភពលោក ក្នុងនោះរួមទាំងប្រទេសកម្ពុជាផងដែរ។
កូវីដ-១៩ មិនត្រឹមតែដាក់សម្ពាធលើវិស័យទេសចរណ៍ និងវិស័យកាត់ដេរប៉ុណ្ណោះទេ តែវាបានដាក់សម្ពាធផងដែរ ទៅលើវិស័យអចលនទ្រព្យ។ ជារួម វិស័យអចលនទ្រព្យនៅក្នុងប្រទេសកម្ពុជា ទទួលរងសម្ពាធពីពីរកត្តាផ្សេងគ្នា។ កត្តាទី១ គឺការចាកចេញរបស់អ្នកជំនួញជនជាតិចិនមួយចំនួន ពីប្រទេសកម្ពុជា និងកត្តាទី២ គឺដោយសារវិបត្តិសុខភាពកូវីដ-១៩នេះតែម្តង។ ចុះ ស្លាក ផ្ទះ, អគារ, ដី ដែលដាក់សម្រាប់ជួល ឬសម្រាប់លក់កាន់តែច្រើននេះ បណ្តាលមកពីរឿងអ្វីពិតប្រាកដ?
កត្តាដែលជំរុញឲ្យមានចរន្តនេះ កាន់តែច្រើន គឺបណ្តាលមកពីហេតុផលពីរ ដែលបានលើកឡើងនៅខាងលើមុននេះបន្តិច។ ហើយចំណុចមួយទៀត ដែលនាំឲ្យមានចរន្តដាក់លក់ ឬដាក់ជួលអចលនទ្រព្យកាន់តែច្រើនៗនោះ គឺដោយសារបុគ្គលស្ទើរគ្រប់រូប មិនថាអ្នកជំនួញ ឬមិនជំនួញទេ ក្នុងបរិបទកូវីដ-១៩នេះ ខ្វះសាច់ប្រាក់កាន់តែច្រើនឡើង ហើយគំនរបំណុលកាន់ខ្ពស់ឡើងៗ។
ហេតុផលចុងក្រោយមួយទៀត ដែលគេមិនគួរមើលរំលងដែរនោះ គឺដោយសារម្ចាស់ទីតាំងអាជីវកម្ម មិនព្រមបញ្ចុះថ្លៃឈ្នួលទីតាំងអាជីវកម្ម ក្នុងបរិបទកូវីដ-១៩។ ការមិនព្រមបញ្ចុះថ្លៃទីតាំងជួលនេះ បានជំរុញឲ្យអ្នកជំនួញមួយចំនួនធំ ទប់ខ្លួនមិនរួច ក៏សម្រេចចិត្តបិទអាជីវកម្មកាន់តែច្រើនឡើងៗ ហើយចំនួនអ្នកអត់ការងារធ្វើ ក៏កាន់តែកើនឡើងស្របពេលជាមួយគ្នាផងដែរ៕
© រក្សាសិទ្ធិដោយ thmeythmey.com
