COVID-19
កីឡាអន្តរជាតិ
អន្តរជាតិ
កីឡាករក្លិប Wuhan Zall អាចទៅវូហានវិញក្រោយបែកពីផ្ទះ៣ខែ ដោយសារ COVID-19
× កីឡាករបាល់ទាត់របស់ក្រុម Wuhan Zall នៃលីគកំពូលចិន (Chinese Super League) អាចវិលត្រឡប់ចូលក្រុងវូហានវិញហើយបន្ទាប់ពីអាក់ខានចូលស្រុករយៈពេលជាង ៣ខែ ដោយសារវិបត្តិជំងឺរាតត្បាត COVID-19។ វូហាន បានប្រកាសឲ្យបើកក្រុងឡើងវិញ នៅដើមខែមេសា ក្រោយជំងឺឆ្លងសកលនេះ បានធូរស្បើយ។
ក្រុម Wuhan Zall បានស្នាក់នៅជំរំហ្វឹកហាត់នៅឯប្រទេសអេស្ប៉ាញតាំងពីខែមករាម្លេះ អំឡុងពេលជំងឺឆ្លង COVID-19 បានកើនឡើងកាន់តែខ្លាំងក្នុងក្រុងវូហាន ប្រទេសចិន។ វូហានជាតំបន់ដែលមានករណីឆ្លងជំងឺរលាកសួតបង្កដោយកូរ៉ូណាប្រភេទថ្មីដំបូងគេ និងជាក្រុងដែលត្រូវប្រកាសឲ្យបិទមុនគេផងដែរក្នុងប្រទេសចិន។
ក្រោយចាកចេញពីអេស្ប៉ាញដោយជិះយន្តហោះតាមអាល្លឺម៉ង់ ក្រុមកីឡាករទាំងនេះ បានត្រឡប់ទៅដល់ក្រុង Shenzhen ប្រទេសចិន តាំងពីថ្ងៃទី១៦ ខែមីនា ដោយត្រូវដាក់ចត្តាឡីស័កចំនួន៣សប្តាហ៍បន្ទាប់ទៀតមុនអនុញ្ញាឲ្យចូលទឹកដីវូហាន។ ត្រឡប់ទៅដល់ក្រុងវូហានតាមរយៈរថភ្លើងនៅថ្ងៃទី១៨ ខែមេសា ក្រុមកីឡាកររបស់ Wuhan Zall ដែលបែកក្រុមគ្រួសារអស់រយៈពេល១០៤ថ្ងៃ បានទទួលការស្វាគមន៍ពីសំណាក់អ្នកគាំទ្ររបស់ពួកគេនៅស្ថានីរថភ្លើងយ៉ាងច្រើនផងដែរ។
«បន្ទាប់ពីវិលវល់នៅក្រៅប្រទេសអស់រយៈពេលជាង ៣ ខែមក សមាជិកក្រុម Wuhan Zall ដែលបែកស្រុក នឹកផ្ទះបានវិលត្រឡប់ទៅដល់ស្រុកកំណើតវិញហើយ។ កីឡាករក្រុម Wuhan Zall បានសរសេរលើបណ្តាញសង្គម Weibo ដូច្នេះក្រោយបានជួបជុំគ្រួសាររបស់ពួកគេជាថ្មី។
ក្លិបកីឡាបាល់ទាត់នៃលីគកំពូលចិន ដែលមានលោក Jose Gonzalez ជនជាតិអេស្ប៉ាញជាគ្រូបង្វឹកនោះ បានអនុញ្ញាតឲ្យកីឡាកររបស់ខ្លួនចំណាយពេលជាមួយក្រុមគ្រួសារពួកគេមួយរយៈសិនមុនពេលចាប់ផ្តើមហ្វឹកហាត់សារជាថ្មី។
ចិន មានចំនួនអ្នកស្លាប់ដោយសារ COVID-19 ជាង៤៦០០នាក់ គិតត្រឹមថ្ងៃទី២០ ខែមេសានេះ។ អ្នកឆ្លងមានចំនួនជាង៨ម៉ឺននាក់ ក្នុងនោះជាសះស្បើយជាង៧៧ពាន់ករណី។ ចិនបានធ្លាក់ចំណាត់ថ្នាក់ពីចំនួនអ្នកឆ្លង និងស្លាប់ច្រើនជាងគេលើលោកទៅលេខ៨វិញ ខណៈអាមេរិកឡើងទៅឈរកំពូលតារាង៕
© រក្សាសិទ្ធិដោយ thmeythmey.com