COVID-19
អន្តរជាតិ
×![]()
ដោយ: តន ចាន់រិទ្ធារ៉ា
សិង្ហបុរី នៅថ្ងៃទី២០ ខែមេសា បានរាយការណ៍ពីករណីឆ្លងប្រចាំថ្ងៃចំនួន១៤២៦នាក់ ដែលជាតួលេខឆ្លងខ្ពស់បំផុតក្នុងប្រទេស។ ក្រសួងសុខាភិបាលសិង្ហបុរីបញ្ជាក់ថា ករណីឆ្លងភាគច្រើន គឺរកឃើញក្នុងចំណោមពលករបរទេសដែលរស់នៅក្នុងអន្តេវាសិកដ្ឋានតូចចង្អៀត។
ក្នុងចំណោមករណីឆ្លងទាំង១៤២៦នាក់ ករណីចំនួន១៦ គឺជាពលរដ្ឋសិង្ហបុរី ឬប្រជាជនអចិន្ត្រៃយ៍។ នេះបើតាមការប្រកាសព័ត៌មានរបស់ក្រសួងការសុខាភិបាលសិង្ហបុរីនៅថ្ងៃទី២០ ខែមេសា ដែលបន្ថែមថា ករណីឆ្លងទូទាំងប្រទេសកើនដល់៨០១៤នាក់។
ការហក់ឡើងខ្ពស់បែបនេះ ជារឿងដែលអាជ្ញាធររំពឹងទុក ស្របពេលដែលការធ្វើតេស្តក្នុងចំណោមពលករបរទេសត្រូវបានធ្វើឡើងយ៉ាងសស្រាក់សស្រាំ។ ការឆ្លងក្នុងចំណោមពលករបរទេសទាំងនេះ មានចំណែកប្រមាណ៦០ភាគរយនៃករណីឆ្លងទូទាំងប្រទេស។
អន្តេវាសិកដ្ឋានចំនួន១៨ នៅទូទាំងសិង្ហបុរីដែលរស់នៅដោយពលករមកពីអាស៊ីខាងត្បូង ត្រូវបានកំណត់ជាតំបន់នៅដោយឡែកដើម្បីទប់ស្កាត់ការរាលដាលបន្ថែមទៀត។ បន្ថែមពីនោះ ពលករដែលកាន់លិខិតការងារ ត្រូវនៅក្នុងផ្ទះដាច់ពីគេមួយរយៈ ខណៈអ្នកដែលមានសុខភាពល្អជាច្រើននាក់ទៀត ត្រូវយកទៅដាក់នៅកន្លែងផ្សេង ដើម្បីការពារចង្វាក់ការងារ។ ខណៈការធ្វើតេស្តនៅតែបន្ត ករណីឆ្លងច្រើនប្រចាំថ្ងៃ នឹងនៅតែមានដូចគ្នា។
អ្វីដែលជារឿងធូរទ្រូងសម្រាប់រដ្ឋាភិបាលនោះ ករណីឆ្លងក្នុងចំណោមប្រជាជនសិង្ហបុរី នៅមានកម្រិតទាប ក្រោយការអនុវត្តវិធានការមិនចេញពីផ្ទះដ៏តឹងរ៉ឹង៕
Tag:
សិង្ហបុរី
COVID-19
© រក្សាសិទ្ធិដោយ thmeythmey.com
