ឥណ្ឌូណេស៊ី និងដៃគូផ្សេងទៀត ប្រកាសបន្តជ្រោមជ្រែង WHO ក្រោយអាមេរិកប្រកាសឈប់ផ្តល់ជំនួយ

COVID-19

អន្តរជាតិ

ឥណ្ឌូណេស៊ី និងដៃគូផ្សេងទៀត ប្រកាសបន្តជ្រោមជ្រែង WHO ក្រោយអាមេរិកប្រកាសឈប់ផ្តល់ជំនួយ

21, Apr 2020 , 7:59 am

រូបភាព

រូបភាពក្រសួងការបរទេសឥណ្ឌូណេស៊ី

ដោយ:

បងធំអាស៊ានឥណ្ឌូណេស៊ី បានប្រកាសបន្តគាំទ្រ និងគាំពារ អង្គការសុខភាពពិភពលោក (WHO) ដើម្បីបន្តបេសកកម្មសង្គ្រោះអាយុជីវិតរបស់មនុស្សជាតិ។ សម្រាប់ឥណ្ឌូណេស៊ី អំឡុងពេលនេះ គឺជាពេលដ៏សំខាន់បំផុត សម្រាប់សហគមន៍អន្តរជាតិ ក្នុងការបង្ហាញសាមគ្គីភាពគ្នាប្រយុទ្ធជាមួយនឹងមេរោគរាតត្បាត Covid-19។

លោកស្រីរដ្ឋមន្ត្រីការបរទេសឥណ្ឌូណេស៊ី Retno Marsudi នៅថ្ងៃទី១៧ ខែមេសាកន្លងទៅ បានអះអាងថា ឥណ្ឌូណេស៊ី នឹងនៅតែបន្តជ្រោមជ្រែងអង្គការសុខភាពពិភពលោក ខណៈអង្គការមួយនេះ កំពុងតែប្រឈមនឹងកង្វះខាតផ្នែកហិរញ្ញវត្ថុដោយសារតែភាគីមួយចំនួន បានប្រកាសបញ្ឈប់ផ្តល់វិភាគទានដើម្បីទ្រទ្រង់អង្គភាព។ នេះយោងតាមការចុះផ្សាយរបស់សារព័ត៌មាន Jakarta Globe ។

តាមប្រភពព័ត៌មានដដែល លោកស្រី បានគូសបញ្ជាក់ថា ផ្អែកតាមស្ថានភាពបច្ចុប្បន្ន វាជារឿងចាំបាច់បំផុត ដែលសហគមន៍អន្តរជាតិ ត្រូវផ្តោតលើធនធានដើម្បីទប់ស្កាត់ការរីករាលដាលនៃវីរុស Covid-19។ លោកស្រី បន្ថែមថា មិនមែនមានតែឥណ្ឌូណេស៊ីប៉ុណ្ណោះនោះទេ ដែលមានជាជំហរមុតមាំដើម្បីបន្តគាំទ្រ និងជ្រោមជ្រែងបេសកកម្មរបស់អង្គការសុខភាពពិភពលោកនោះ។

ប្រមុខការទូតឥណ្ឌូណេស៊ីរូបនេះ លើកឡើងថា តាមរយៈជំនួបពិភាក្សារបស់សម្ព័ន្ធពហុភាគីនិយម លោកស្រី បានជួបជាមួយនឹងរដ្ឋមន្ត្រីការបរទេស២៥ប្រទេសផ្សេងទៀត ដើម្បីពិភាក្សាលើការឆ្លើយតបជាសកលមួយទៅកាន់វីរុសរាតត្បាត ដែលបានឆ្លងប្រជាជនសកលចំនួន២,២ លាននាក់ និងសម្លាប់មនុស្ស ១៥០ ០០០ ហើយនោះ។

តាមលោកស្រី ប្រទេសជាច្រើន ជាពិសេស ឥណ្ឌា អាល្លឺម៉ង់ និងបារាំង បានបង្ហាញជំហដូចជាឥណ្ឌូណេស៊ីយ៉ាងដូច្នេះឯង។ គួរកត់សម្គាល់ផងនោះ ក្រៅពីការប្តេជ្ញាចិត្តជ្រៀមជ្រែងអង្គភាពសុខភាពពិភពលោក ប្រទេសទាំងនេះ ក៏បានឯកភាពគ្នាលើការពិភាក្សាពីការកែទម្រង់អង្គការអន្តរជាតិ ដើម្បីធានាឲ្យបានពីការឆ្លើយតបនឹងវិបត្តិនាពេលអនាគតឲ្យកាន់តែប្រសើរ។

សេចក្តីប្រកាសរបស់ឥណ្ឌូណេស៊ី ធ្វើឡើងបន្ទាប់ពីសហរដ្ឋអាមេរិក បានប្រកាសបញ្ឈប់ផ្តល់វិភាគទានក្នុងការទ្រទ្រង់អង្គការសុខភាពពិភពលោក ស្របពេលដែល អង្គការមួយនេះ កំពុងតែស្ថិតក្នុងពេលំបាកបំផុតមួយក្នុងបេសកកម្មប្រយុទ្ធជាមួយនឹងវីរុសរាតត្បាត Covid-19៕