COVID-19
អន្តរជាតិ
វៀតណាមតវ៉ា ក្រោយចិនបង្កើតតំបន់រដ្ឋបាលនៅសមុទ្រចិនខាងត្បូង រូបភាព៖ Reuters
× វៀតណាម នាថ្ងៃទី១៩ ខែមេសា បានទាមទារឲ្យចិនលុបចោលសេចក្តីសម្រេច ដែលបង្កើតតំបន់រដ្ឋបាលចំនួនពីរនៅក្នុងដែនទឹកជម្លោះ ក្នុងសមុទ្រចិនខាងត្បូង។ ការតវ៉ានេះ កាន់តែធ្វើឲ្យជម្លោះ និងទំនាក់ទំនងរវាងប្រទេសជិងខាងទាំងពីរកាន់តែល្អក់កករថែមទៀត។
ក្នុងកាលៈទេសៈជំងឺរលាកសួត ដែលបង្កដោយកូរ៉ូណាវីរុស (COVID-19) កំពុងតែអុកឡុកពិភពលោក ចិន បានធ្វើសកម្មភាពរបស់ខ្លួន នៅក្នុងតំបន់សមុទ្រចិនខាងត្បូងយ៉ាងខ្លាំង តួយ៉ាងដូចជា ការបាញ់ពន្លិចទូកនេសាទវៀតណាម ការដេញតាមទូករុករកប្រេងម៉ាឡេស៊ី និង ចូលទៅក្នុងដែនទឹកម៉ាឡេស៊ីថែមទៀត។ ការណ៍នេះ បានធ្វើឲ្យអាមេរិក ទាមទារឲ្យចិនបញ្ឈប់សកម្មភាពបង្កជម្លោះជាមួយប្រទេសក្នុងតំបន់ជាបន្ទាន់។
បន្ថែមពីលើនេះ នាថ្ងៃទី១៨ ខែមេសា ចិនថែមទាំងបានបង្កើតស្រុកចំនួនពីរនៅក្នុងតំបន់សមុទ្រចិនខាងត្បូងទៀត។ ស្រុកមួយ ត្រូវបានបង្កើតឡើងនៅក្នុងប្រជុំកោះ Paracel និងមួយទៀត នៅប្រជុំកោះ Spratly។ បើតាមការផ្សព្វផ្សាយទូរទស្សន៍របស់ចិន China Global Television Network ស្រុកទាំងពីរនេះ នឹងស្ថិតនៅក្រោមការគ្រប់គ្រងរបស់ទីក្រុង Sansha ខេត្ត Hainan។
ពាក់ព័ន្ធនឹងបញ្ហានេះ វៀតណាម បានតវ៉ាយ៉ាងខ្លាំងលើការសម្រេចចិត្តរបស់ភាគីចិនបែបនេះ។ តាមរយៈសេចក្តីថ្លែងការណ៍មួយ អ្នកនាំពាក្យក្រសួងការបរទេស លោកស្រី Le Thi Thu Hang បានបញ្ជាក់ថា ការបង្កើតតំបន់គ្រប់គ្រងដោយទីក្រុង Sansha និងសកម្មភាពពាក់ព័ន្ធ គឺជាការបំពានយ៉ាងធ្ងន់ធ្ងរលើដែនអធិបតេយ្យរបស់វៀតណាម។ បើតាមលោក Hang វៀតណាម ទាមទារឲ្យចិនចេះគោរពអធិបតេយ្យរបស់វៀតណាម និងលុបចោលការសម្រេចចិត្តរបស់ចិនបែបនេះ។
ការវិវត្តចុងក្រោយនេះ នឹងធ្វើឲ្យចិន និងវៀតណាម កាន់តែមានភាពតានតឹងមួយកម្រិតទៀត ខណៈពេលទំនាក់ទំនងប្រទេសទាំងពីរកំពុងតែល្អក់កករស្រាប់។
សូមបញ្ជាក់ថា ជម្លោះសមុទ្រចិនខាងត្បូង គឺកើតមានជាយូរមកហើយ ដោយភាគីជម្លោះមួយចំនួនដូចជាចិន វៀតណាម ម៉ាឡេស៊ី ហ្វីលីពីន ព្រុយណេ បានទាមទារផ្នែកមួយចំនួននៃតំបន់នេះ ជាដែនទឹករបស់ខ្លួន។ ប៉ុន្តែជម្លោះមួយនេះ គឺមានលក្ខណៈស្មុគស្មាញ ដោយសារតំបន់ដែនទឹកខ្លះ គឺទាមទាររហូតដល់ភាគីចំនួន ៣ ឯណោះ។ ការដោះស្រាយជម្លោះ នៅតែជាប់គាំង ខណៈចិនចេះតែបង្កើនសកម្មភាពរបស់ខ្លួន ឯប្រទេសឯទៀត ចេះតែតវ៉ាឥតឈប់៕
© រក្សាសិទ្ធិដោយ thmeythmey.com