COVID-19
កីឡាអន្តរជាតិ
អន្តរជាតិ
COVID-19៖ អ្នកចាត់ការ និងកីឡាករ Arsenal សុខចិត្តកាត់ប្រាក់ឈ្នួល ដើម្បីជួយក្លិបក្នុងគ្រាលំបាក
× លោក Mikel Arteta អ្នកចាត់ការទូទៅក្រុម Arsenal រួមទាំងកីឡាកររបស់ខ្លួនបានយល់ព្រមកាត់បន្ថយប្រាក់ឈ្នួលដើម្បីជួយសម្រួលដល់ក្លិបរបស់ពួកគេដែលរងផលប៉ះពាល់ផ្នែកហិរញ្ញវត្ថុដោយសារវិបត្តិជំងឺរាតត្បាតសកល COVID-19។
ក្លិបនៃក្របខណ្ឌ Premier League មួយនេះបានយល់ព្រមលើកិច្ចព្រមព្រៀងស្ម័គ្រចិត្តរួមគ្នាមួយដោយរួមមាន ការកាត់ប្រាក់ចំណូលប្រចាំឆ្នាំរបស់ពួកគេក្នុងម្នាក់ៗចំនួន ១២,៥ ភាគរយ។ មិនត្រឹមតែកីឡាករ និងអ្នកចាត់ការនោះទេ បុគ្គលិក និងគ្រូបង្វឹកសំខាន់ៗក៏ស្ថិតក្នុងចំណោមអ្នកដែលកាត់ប្រាក់បៀវត្សរបស់ខ្លួនដែរ។
យ៉ាងណាក៏ដោយ ប្រសិនបើក្រុមរហស្សនាមកាំភ្លើងធំអាចវិលចូលទីលានវិញតាមកាលកំណត់ជាក់លាក់ណាមួយ ក្លិបអះអាងថាចំនួនទឹកប្រាក់ដែលបានព្រមព្រៀងគ្នាខាងលើនេះនឹងត្រូវសងទៅវិញ។
«យើងនឹងអាចសងប្រាក់ទាំងនោះវិញ ប្រសិនបើគោលដៅនៃការប្រកួតឡើងវិញរដូវកាលនេះចាប់ផ្តើមតាមកាលកំណត់ដែលមិនធ្វើឲ្យប៉ះពាល់ដល់ហិរញ្ញវត្ថុក្លិប»។ នេះជាការបញ្ជាក់របស់ក្លិប Arsenal។
ជុំវិញការយល់ព្រមកាត់ប្រាក់ឈ្នួលនេះ ក៏ព្រោះអ្នកចាត់ការ កីឡាករ និងគ្រូបង្វឹក Arsenal ទាំងអស់បានយល់យ៉ាងច្បាស់ពីភាពធ្ងន់ធ្ងរនៃឥទ្ធិភពជំងឺឆ្លង COVID-19 ដែលធ្វើឲ្យប៉ះពាល់ប្រាក់ចំណូលក្លិបយ៉ាងច្រើន។ ម្យ៉ាងវិញទៀតពួកគេធ្វើបែបនេះគឺដើម្បីបង្ហាញការគាំទ្រដល់ក្រុមគ្រួសាររបស់ Arsenal ទាំងមូលផងដែរ៕
© រក្សាសិទ្ធិដោយ thmeythmey.com