COVID-19
ជាតិ
សង្គមជាតិ
លោក ហេង សួរ៖ ការធ្វើចត្តាឡីស័កកម្មករដែលឈប់សម្រាកពេលចូលឆ្នាំ មិនមែនជាការដាក់ទណ្ឌកម្មឡើយ
លោក ហេង សួរ ផ្តល់បទសម្ភាសដល់អ្នកសារព័ត៌មាន ពេលចុះទៅពិនិត្យទីតាំងធ្វើតេស្តរកមេរោគកូរ៉ូណានៅតំបន់សេដ្ឋកិច្ចពិសេសភ្នំពេញ(រូបហ្វេសប៊ុកលោក ហេង សួរ)
×![]()
លោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ ចាត់ទុកវិធានការដាក់កម្មករកម្មការិនី ដែលបានឈប់សម្រាកក្នុងឱកាសបុណ្យចូលឆ្នាំថ្មីខ្មែរ ឲ្យនៅដាច់ដោយឡែក(ចត្តាឡីស័ក) រយៈពេល១៤ថ្ងៃ មិនមែនជាការដាក់ទណ្ឌកម្មនោះទេ។ ផ្ទុយទៅវិញ វាជួយសម្រួលដល់កម្មករកម្មការិនីទាំងនោះទៅវិញទេ ហើយវាក៏ជាវិធីមួយ ក្នុងការបង្ការ និងទប់ស្កាត់ការរីករាលដាល នៃជំងឺកូវីដ-១៩។ មកពេលនេះ កម្មករ-កម្មការិនី ប្រមាណ១៥០០នាក់ហើយ ដែលត្រូវបានដាក់ក្រោមវិធានចត្តាឡីស័ក។
មានមតិមួយចំនួនតូចបានរិះគន់ថា ការដាក់កម្មករកម្មការិនី ដែលបានឈប់សម្រាកក្នុងឱកាសបុណ្យចូលឆ្នាំខ្មែរ ទាំងមានច្បាប់ និងអត់ច្បាប់ ឲ្យនៅដាច់ដោយឡែក រយៈពេល១៤ថ្ងៃ ប្រៀបបានជាការដាក់ទណ្ឌកម្មដល់ពួកគេ។ ដ្បិតការធ្វើចត្តាឡីស័កនេះ កម្មករកម្មការិនីពុំទទួលបានប្រាក់ឈ្នួល ពីនិយោជកនោះឡើយ។
ឆ្លើយតបនឹងការរិះគន់នេះ លោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានចេញមកអះអាងថា ការដាក់ចេញវិធានការរបស់រាជរដ្ឋាភិបាល តាមរយៈការធ្វើចត្តាឡីស័កនេះ មិនមែនជាការដាក់ទណ្ឌកម្មលើកម្មករកម្មការិនីនោះទេ។ ផ្ទុយទៅវិញ វាជួយសម្រួលបន្ទុករបស់ពួកគេទៅវិញទេ ព្រោះអាចមានកម្មករកម្មការិនីមួយចំនួន រងការរើសអើងពីមិត្តភក្តិ ក្រុមការងារ និងម្ចាស់ផ្ទះជួលនៅកន្លែងធ្វើការងារ និងស្នាក់នៅរបស់ពួកគេ។
បើតាមលោក ហេង សួរ ការចាត់វិធានការរបស់ក្រសួងការងារ និងបណ្តុះបណ្តាលវិជ្ជាជីវៈ ធ្វើឡើងក្រោយមានការសំណូមពរពីកម្មករកម្មការិនី ដែលបានមកធ្វើការធម្មតាក្នុងថ្ងៃបុណ្យចូលឆ្នាំខ្មែរ។ ដ្បិតពួកគេទាំងនោះ បារម្ភពីការឆ្លងនៃជំងឺកូវីដ-១៩។ ដូច្នេះការធ្វើបែបនេះ ជាការរួមចំណែកក្នុងការបង្ការ និងទប់ស្កាត់ការរីករាលដាល នៃជំងឺកូវីដ-១៩ ដែលកំពុងរាតត្បាតនៅកម្ពុជា។
«ខ្ញុំគិតថា គួរតែសួរមនុស្ស៩៨ភាគរយ ដែលមកធ្វើការក្នុងអំឡុងពេលចូលឆ្នាំវិញ ថាតើពួកគេមានអារម្មណ៍យ៉ាងដូចម្តេច នៅពេលមនុស្ស២ភាគរយ (អ្នកឈប់ពេលចូលឆ្នាំ) នៅក្បែរពួកគាត់។ វាជាសំណូមពររបស់អ្នក៩៨ភាគរយ ដែលមកធ្វើការទេ ដែលគាត់អត់ហ៊ានទទួលយក អ្នកអវត្តមាន២ភាគរយមកក្បែរខ្លួន។ ដូច្នេះរាជរដ្ឋាភិបាល ត្រូវរកវិធីសាស្ត្រធ្វើយ៉ាងណា យកអ្នក២ភាគរយ ឲ្យនៅឆ្ងាយពីអ្នក៩៨ភាគរយ»។ នេះជាការលើកឡើងរបស់លោក ហេង សួរ។
លោកបានបន្ថែមថា៖«នៅពេលយើងសួរថា អ្វីដែលយើងពិនិត្យសុខភាពជូនមនុស្ស២ភាគរយជាទណ្ឌកម្ម ថាតើមានបានសួរអារម្មណ៍មនុស្ស៩៨ភាគរយទៀតដែរឬទេ តើអ្នកដែលនិយាយ អាចទទួលយកបងប្អូន២ភាគរយ ទៅរស់នៅជាមួយបានឬអត់? ប្រសិនបើអាចទទួលយកបាន រាជរដ្ឋាភិបាលមិនចាំបាច់ធ្វើបែបនេះនោះទេ»។
មានកម្មករកម្មការិនីទូទាំងប្រទេសជិត៣ម៉ឺននាក់ បានឈប់សម្រាកទាំងមានច្បាប់ និងអត់ច្បាប់ ក្នុងឱកាសបុណ្យចូលឆ្នាំខ្មែរ ខណៈនៅរាជធានីភ្នំពេញ មានកម្មករកម្មការិនី ប្រមាណ១ម៉ឺន៥ពាន់នាក់។ ចំនួននេះ មិនបានគិតបញ្ជូលចំនួនកម្មករ កម្មការិនី ដែលបម្រើការងារក្រៅប្រព័ន្ធនោះទេ ពោលគឺរាប់តែកម្មករកម្មការិនី ធ្វើការតាមរោងចក្រប៉ុណ្ណោះ។ នេះបើតាមការបញ្ជាក់របស់ លោក ហេង សួរ ដែលបានបន្ថែមថា ក្រោយការធ្វើចត្តាឡីស័កកម្មករកម្មការិនីទាំងនោះ ក៏មិនប្រាកដថា អាចបម្រើការងារបាននោះដែរ ពោលគឺអាស្រ័យលើថៅកែរោងចក្រ។
អ្នកនាំរូបនេះ មិនបានបញ្ជាក់ថា មានកម្មករកម្មការិនីប៉ុន្មាននាក់ ឈប់សម្រាកដោយមានច្បាប់ និងប៉ុន្មាននាក់គ្មានច្បាប់អនុញ្ញាតនោះទេ។ ក្រសួងការងារ និងបណ្តុះបណ្តាលវិជ្ជាជីវៈ សហការជាមួយសាលារាជធានីភ្នំពេញ និងក្រសួងសុខាភិបាល កាលពីថ្ងៃ២០ ខែមេសា ចាប់ផ្តើមយុទ្ធនាការពិនិត្យសុខភាព និងធ្វើតេស្តរកវីរុសកូរ៉ូណាប្រភេទថ្មី លើកម្មករកម្មការិនី ក្រោយពួកគេត្រឡប់មកពីចូលរួមពិធីបុណ្យចូលឆ្នាំខ្មែរ។
រាជរដ្ឋាភិបាលកម្ពុជាបានរៀបចំមណ្ឌលពិនិត្យ ចំនួន១០ទីតាំង រួមមានសួនឧស្សាហកម្មវឌ្ឍនៈ១, សួនឧស្សាហកម្មកាណាឌីយ៉ា, អនុវិទ្យាល័យគោកបញ្ជាន់, សួនឧស្សាហកម្មវឌ្ឍនៈ២, វិទ្យាល័យជម្ពូវ័ន្ត, អនុវិទ្យាល័យដង្កោ, វិទ្យាល័យភ្នំពេញថ្មី, តំបន់សេដ្ឋកិច្ចពិសេសភ្នំពេញ, សាលាបឋមសិក្សាភូមិឫស្សី និងវិទ្យាល័យឫស្សីកែវ៕
Tag:
ហេង សួរ
កូវីដ-១៩
© រក្សាសិទ្ធិដោយ thmeythmey.com
