COVID-19
អន្តរជាតិ
ហ្វេសប៊ុក លុបព្រឹត្តិការណ៍តវ៉ាប្រឆាំងបញ្ជាឲ្យនៅផ្ទះក្នុងរដ្ឋខ្លះនៅអាមេរិក
× ក្រុមហ៊ុនហ្វេសប៊ុក បានបញ្ជាក់នៅថ្ងៃ២០ ខែមេសាថា ខ្លួនបានលុបចោលព្រឹត្តិការណ៍ក្នុងរដ្ឋអាមេរិកចំនួនបី រួមមាន រដ្ឋ Nebraska, រដ្ឋ New Jersey និងរដ្ឋ California ដែលជំរុញឲ្យមានការបាតុកម្មតវ៉ាប្រឆាំងចំណាត់ការស្នាក់នៅផ្ទះ ក្នុងបរិយាកាសជំងឺរាតត្បាត COVID-19 ។
បទបញ្ជាស្នាក់នៅផ្ទះ ដែលក្រុមអ្នកជំនាញអះអាងថា មានសារសំខាន់សម្រាប់ទប់ស្កាត់ការរីករាលដាល COVID-19 តែប៉ះពាល់ដល់សេដ្ឋកិច្ចអាមេរិក ត្រូវបានដាក់ឲ្យអនុវត្តក្នុងកម្រិតរដ្ឋខ្លះរបស់អាមេរិក។ តាមការចុះផ្សាយរបស់ទីភ្នាក់ងារព័ត៌មាន Reuters ក្រុមហ៊ុនហ្វេសប៊ុក ប្រកាសថា ខ្លួននឹងអនុលោមតាមសេចក្តីបង្គាប់បញ្ជាទាំងនេះ ហើយក៏លុបចោលព្រឹត្តិការណ៍នានាដែលផ្ទុយនឹងសេចក្តីណែនាំគម្លាតសុវត្ថិភាព (social distancing) ។
«ប្រសិនបើរដ្ឋាភិបាលពុំហាមប្រាមព្រឹត្តិការណ៍អំឡុងពេលនេះនោះ យើងអនុញ្ញាតឲ្យវារៀបចំឡើងលើហ្វេសប៊ុក»។ លោក Andy Stone អ្នកនាំពាក្យក្រុមហ៊ុនហ្វេសប៊ុក បញ្ជាក់បែបនេះ ដោយបន្ថែម សម្រាប់ហេតុផលនេះហើយ ព្រឹត្តិការណ៍ទាំងឡាយណាដែលផ្ទុយនឹងសេចក្តីណែនាំរបស់រដ្ឋាភិបាលលើការអនុវត្តគម្លាតសុវត្ថិភាព ពុំត្រូវបានអនុញ្ញាតឲ្យមានលើហ្វេសប៊ុលឡើយ។
កាលពីថ្ងៃ១៩ ខែមេសា មនុស្សយ៉ាងតិច២៥០០នាក់ បានប្រមូលផ្ដុំគ្នានៅអគារ Capitol រដ្ឋវ៉ាស៊ីនតោន ដើម្បីតវ៉ាប្រឆាំងបទបញ្ជាស្នាក់នៅផ្ទះក្នុងគោលដៅទប់ស្កាត់ការរីករាលដាល COVID-19។ នេះជាបាតកម្មធំបំផុតមួយក្នុងសហរដ្ឋអាមេរិកប្រឆាំងនឹងបទបញ្ជាបិទប្រទេសក្នុងរយៈពេលប៉ុន្មានសប្តាហ៍ចុងក្រោយ។
សូមបញ្ជាក់ថា គិតត្រឹមថ្ងៃទី២១ ខែមេសា សហរដ្ឋអាមេរិក មានករណីឆ្លងCOVID-19សរុបជិត៨០ម៉ឺនករណី ក្នុងនោះជាង៧ម៉ឺនជាសះស្បើយ ខណៈអ្នកស្លាប់មានជាង៤,២ម៉ឺននាក់។ នេះបើតាមវេបសាយ worldometers.info ដែលតាមដានតួលេខ COVID-19 នៅទូទាំងពិភពលោក៕
Tag:
សហរដ្ឋអាមេរិក
COVID-19
© រក្សាសិទ្ធិដោយ thmeythmey.com