ជាតិ
បញ្ហាចំនួន៥ កំពុងរាំងស្ទះផែនការដាំដំណាំអាទិភាពតាមខេត្ត ក្រសួងកសិកម្ម រូបភាពពីក្រសួងកសិកម្ម រុក្ខាប្រមាញ់ និងនេសាទ
× ភ្នំពេញ៖ បញ្ហាទីផ្សារ និងការកែច្នៃ, ធនធានវិនិយោគ, ហេដ្ឋារចនាសម្ព័ន្ធគាំទ្រ និងកម្រិតចំណេះដឹងរបស់កសិករជាដើម គឺជាបញ្ហាប្រឈមដែលធ្វើឲ្យរាំងស្ទះ ដល់ការរៀបចំផែនការដាំដុះដំណាំអាទិភាពតាមខេត្តនីមួយៗ។ នេះជាការបញ្ជាក់របស់លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។
លោករដ្ឋមន្ត្រី បញ្ជាក់ដូច្នេះ គឺឆ្លើយតបនឹងសំណើរបស់អ្នកប្រើប្រាស់ហ្វេសប៊ុកម្នាក់ ដែលបានផ្តល់យោបល់នៅពេលដែលរដ្ឋមន្ត្រីបង្ហោះពីជោគជ័យនៃការដាំមើមការ៉ុត និងស្ពៃបូកគោ របស់កសិករនៅខេត្តមណ្ឌលគិរី កាលពីថ្ងៃទី១៨ មេសាកន្លងទៅ។
លោក វេង សាខុន បញ្ជាក់ថាក្រសួងកសិកម្ម កំពុងដាក់ចេញទស្សនវិស័យរៀបចំផែនការដាំដំណាំអាទិភាពតាមខេត្តនេះ តែទន្ទឹមនឹងនេះ លោកក៏បានរៀបរាប់ពីបញ្ហាប្រឈមជុំវិញផែនការនេះដែរ។ លោករដ្ឋមន្ត្រីកសិកម្ម សរសេរតបដូច្នេះ៖ «ប្រាកដណាស់ យើងត្រូវតែធ្វើ ហើយក្រសួងកំពុងដាក់ចេញនូវទស្សនវិស័យនេះ ប៉ុន្តែក៏យើងត្រូវគិតផងដែរ ទៅលើបញ្ហាប្រឈមទៅលើអ្វីដែលយើងមិនទាន់អាចបង្ខំធ្វើទៅបាននោះគឺ៖ ១) ទីផ្សារ និងកែច្នៃនៅកន្លែង ២) ធនធានសម្រាប់វិនិយោគលើហេដ្ឋារចនាសម្ព័ន្ធកសិកម្មជួបនឹងបញ្ហា និងនៅមានការរាយប៉ាយ ហើយមានទស្សនមិនស្របគ្នាច្រើនក្នុងកម្រិតជាតិ និងមូលដ្ឋាន ៣) ហេដ្ឋារចនាសម្ព័ន្ធគាំទ្រដទៃទៀតនៅមានកម្រិត ៤) ធនធានវិនិយោគរបស់វិស័យឯកជននៅមានកម្រិត ៥) ឆន្ទៈ និងធនធានរបស់កសិករ នៅមានកម្រិត ទាំងការវិនិយោគ និងចំណេះដឹង»។
ទោះជាយ៉ាងនេះក្តី លោករដ្ឋមន្ត្រី មិនបានបញ្ជាក់ពីដំណោះស្រាយបញ្ហានេះនោះទេ នៅក្នុងសំណេរដដែលនោះ។
នៅក្នុងបរិបទកូវីដ-១៩នេះ ប្រមុខរាជរដ្ឋាភិបាលកម្ពុជា ក៏បានជំរុញឲ្យប្រជាកសិករបង្កើនការដាំដុះ និងចិញ្ចឹមសត្វ ដើម្បីផ្គត់ផ្គង់តម្រូវការទីផ្សារក្នុងស្រុក៕
Tag:
កសិកម្ម
ដំណាំ
វេង សាខុន
© រក្សាសិទ្ធិដោយ thmeythmey.com