COVID-19
អន្តរជាតិ
ថៃមានករណី COVID-19 ថ្មីតិច ខណៈឡាវនិងវៀតណាមនៅតែគ្មានសូម្បីមួយករណី ប្រភពរូប៖ AFP
× រដ្ឋាភិបាលថៃ បានរាយការណ៍ករណីឆ្លងCOVID-19ថ្មី ១៩ករណី នៅថ្ងៃ២១ ខែមេសា ដែលជាតួលេខឆ្លងទាបបំផុតក្នុងរយៈពេលជាង១ខែចុងក្រោយ។ ចំណែក វៀតណាម ពុំរកឃើញករណីឆ្លងថ្មីសម្រាប់៥ថ្ងៃជាប់គ្នា ខណៈឡាវគ្មានករណីថ្មីសោះ ៨ថ្ងៃជាប់គ្នា។
ជំងឺ COVID-19 ត្រឹម១៩ករណីថ្មីប៉ុណ្ណោះ ត្រូវបានរាយការណ៍នៅថ្ងៃទី២១ ខែមេសា ក្នុងប្រទេសថៃ។ ករណីថ្មីនេះ ធ្វើឲ្យករណីឆ្លងសរុបឡើងដល់២៨១១ករណី ក្នុងនោះ ៧៥ភាគរយ ឬស្មើ២១០៨នាក់ ជាសះស្បើយ។ នេះបើតាមរបាយការណ៍របស់រដ្ឋាភិបាលថៃដោយដកស្រង់ចុះផ្សាយដោយកាសែត បាងកកប៉ុស្តិ៍។ ករណីស្លាប់បានឡើង១ករណីថ្មីទៀត ដែលធ្វើឲ្យករណីស្លាប់សរុបឡើងដល់៤៨ករណី។ អ្នកស្លាប់ចុងក្រោយបង្អស់ក្នុងប្រទេសថៃ គឺជាអ្នករត់តាក់ស៊ីអាយុ៥០ឆ្នាំ។
ដោយឡែក វៀតណាម នៅព្រឹកថ្ងៃ២១ មេសា ពុំរកឃើញករណីឆ្លងCOVID-19ថ្មីបន្ថែមទៀតឡើយ ដែលនេះគឺជាថ្ងៃទី៥ហើយសម្រាប់ប្រទេសក្នុងតំបន់អាស៊ីអាគ្នេយ៍មួយនេះ។ ករណីឆ្លងសរុបរក្សាត្រឹម២៦៨ករណីដដែល ក្នុងនោះ១៦០នាក់ជាករណីនាំចូល។ នេះបើតាមទីភ្នាក់ងារព័ត៌មាន Vietnam News។ អ្នកជំងឺ២១៦នាក់ ជាសះស្បើយ ខណៈគ្មានករណីស្លាប់កើតឡើងឡើងក្នុងប្រទេសវៀតណាម។
នៅអាស៊ីអាគ្នេយ៍ដដែល ប្រទេសឡាវ ក៏គ្មានរាយការណ៍ករណីឆ្លងCOVID-19ថ្មីបន្ថែមទៀតផងដែរ។ គិតត្រឹមថ្ងៃ២០ មេសា នេះគឺជាថ្ងៃទី៨ហើយសម្រាប់ប្រទេសនេះ។ ករណីឆ្លងសរុបក្នុងប្រទេសឡាវ នៅតែមានត្រឹម ១៩ករណី ក្នុងនោះ២នាក់ជាសះស្បើយ។ នេះបើតាមទីភ្នាក់ងារព័ត៌មាន Xinhua។ ឡាវបានប្រកាសករណីឆ្លង២ដំបូងកាលពីថ្ងៃ២៤ មីនាកន្លងទៅ។
ក្រៅពីប្រទេសទាំងបី ប្រទេសនៅតំបន់អាស៊ានផ្សេងទៀត បានរាយការណ៍ពីការកើនឡើងករណីឆ្លងថ្មី លើកលែងកម្ពុជា ដែលមិនមានករណីឆ្លងថ្មីយូរថ្ងៃមកហើយដែរ។ សិង្ហបុរី មានករណីឆ្លងច្រើនជាងគេ គឺលើស៩ពាន់ករណី តាមពីក្រោយដោយឥណ្ឌូណេស៊ី ហ្វីលីពីន និងម៉ាឡេស៊ី៕
Tag:
ថៃ
ឡាវ
វៀតណាម
COVID-19
© រក្សាសិទ្ធិដោយ thmeythmey.com