COVID-19
អន្តរជាតិ
ហុងកុង បន្តរឹតត្បិតសកម្មភាពប្រជាជន១៤ថ្ងៃទៀត ទោះគ្មានករណីឆ្លង COVID-19 ថ្មី
នាយកប្រតិបត្តិហុងកុង លោកស្រី ការី ឡាំ។ រូបភាព៖ Reuters
×![]()
ដោយ: ធៀន ភារិន្ទ
រដ្ឋាភិបាលទីក្រុងហុងកុង នាថ្ងៃទី២១ ខែមេសា បានសម្រេចពន្យារពេលរឹតត្បិតសកម្មភាពប្រជាជនចំនួន ១៤ថ្ងៃបន្ថែមទៀត ដើម្បីទប់ស្កាត់ និងបង្ការករណីឆ្លងជំងឺរលាកសួត ដែលបង្កដោយកូរ៉ូណាវីរុស (COVID-19) ។ ការបន្ថែមរយៈពេលរឹតត្បិតនេះ ធ្វើឡើងបន្ទាប់ពីតំបន់ស្វយ័តមួយនេះ មិនមានករណីឆ្លងជាលើកដំបូងចាប់តាំងពីដើមខែមីនាកន្លងមក។ 
ការបន្ថែមរយៈពេលរឹតត្បិតការធ្វើដំណើរ ត្រូវបានប្រទេសជាច្រើនកំពុងអនុវត្តដូចជាបារាំង អង់គ្លេស អាល្លឺម៉ង់ អាមេរិក អូស្ត្រាលី ម៉ាឡេស៊ី បើទោះបីតួលេខអ្នកផ្ទុកCOVID-19 បានធ្លាក់ចុះក៏ដោយ។ ចំណែកហុងកុងក៏ដូចគ្នា រដ្ឋាភិបាលតំបន់ស្វយ័តមួយនេះ បានបន្ថែមរយៈពេលរឹតត្បិតរយៈពេល ១៤ថ្ងៃទៀត បន្ទាប់ពីហុងកុងមិនមានករណីឆ្លងកូរ៉ូណាវីរុសជាលើកដំបូងនាថ្ងៃទី២០ ខែមេសា។ នេះគឺជាលើកដំបូងរបស់ហុងកុង ដែលមិនមានករណីឆ្លងចាប់តាំងពីដើមខែមីនាកន្លងមក។
ថ្លែងនៅក្នុងសន្និសីទកាសែតមួយ លោកស្រី ការី ឡាំ ប្រធានប្រតិបត្តិទីក្រុងហុងកុង បានបញ្ជាក់ថា ការរឹតត្បិត គឺជា សកម្មភាពមួយដ៏ពិបាក ប៉ុន្តែដើម្បីធានាសុវត្ថិភាពប្រជាជនហុងកុង និងរក្សាជ័យជម្នះ ដែលហុងកុងអាចគ្រប់គ្រងលើ COVID-19 តាំងពីខែមីនាមក វាចាំបាច់ណាស់ដែលវិធានការរឹតត្បិតត្រូវបន្ថែមរយៈពេល ១៤ថ្ងៃទៀត។
ហុងកុងបានរឹតត្បិតការធ្វើដំណើរ និងសកម្មភាពនានាតាំងពីថ្ងៃទី២៩ ខែមីនាមកម្លេះ ហើយត្រូវបានពន្យារបន្ថែមទៀតរហូតដល់ថ្ងៃទី២៣ ខែមេសា។ ការបន្ថែមរយៈពេលរឹតត្បិតចំនួន ១៤ថ្ងៃទៀតនេះ គឺជាលើកទី៣ របស់ហុងកុង ដើម្បីបង្ការករណីឆ្លងនៅក្នុងទីក្រុង។ តាមរយៈវិធានការរឹតត្បិតនេះ ហុងកុង ត្រូវបានមើលឃើញថា មិនមានករណីឆ្លងកើនឡើងដូចបណ្តាប្រទេសអឺរ៉ុប ឬអាមេរិកឡើយ។ ផ្ទុយទៅវិញហុងកុងអាចទប់ស្កាត់ករណីឆ្លងនៅក្នុងប្រទេសបាន។ ហុងកុង ទទួលបានការសរសើរចំពោះលទ្ធផលបែបនេះ។
ដើម្បីទប់ស្កាត់ និងបង្ការករណីឆ្លងនៅក្នុងទីក្រុង ហុងកុង បានបិទកន្លែងលេងល្បែង កន្លែងហាត់ប្រាណ រោងភាពយន្ត។ ចំណែកការធ្វើដំណើរមកពីបរទេស ក៏ត្រូវបានផ្អាកដែរ។ បន្ថែមពីលើនេះ ហុងកុង ក៏បានបិទសាលារៀន ឲ្យប្រជាជនធ្វើការពីផ្ទះ ការរក្សាអនាម័យនៅតាមកន្លែងមួយចំនួនជាដើម។
សូមបញ្ជាក់ថា គិតមកត្រឹមពេលនេះ ហុងកុងមានការឆ្លង COVID-19 សរុបចំនួន ១០២៦ករណី អ្នកស្លាប់ ៤នាក់ និងអ្នកជាសះស្បើយចំនួន ៦៣០នាក់៕
Tag:
ហុងកុង
COVID-19
© រក្សាសិទ្ធិដោយ thmeythmey.com
