IOC៖ លោក អាបេ ព្រមចាយលុយថែម៣ពាន់លានដុល្លារទៀតលើការពន្យារពេលអូឡាំពិក

COVID-19

កីឡាអន្តរជាតិ

អន្តរជាតិ

IOC៖ លោក អាបេ ព្រមចាយលុយថែម៣ពាន់លានដុល្លារទៀតលើការពន្យារពេលអូឡាំពិក

22, Apr 2020 , 7:59 am

រូបភាព

ដោយ: ទេព ពិទូរ្យ

គណៈកម្មាធិការអូឡាំពិកអន្តរជាតិ (IOC) បានប្រកាសថា ជប៉ុននឹងត្រូវបង់ប្រាក់បន្ថែមទៀតសម្រាប់ការពន្យារពេលដំណើរការកីឡាអូឡាំពិកក្រុងតូក្យូឆ្នាំ ២០២០ ដែលបណ្តាលមកពីវិបត្តិជំងឺ COVID-19។ នាយករដ្ឋមន្ត្រីជប៉ុន ស៊ិនហ្សូ អាបេ យល់ព្រមលើការបង់ថ្លៃបន្ថែមនេះដែលមានក្នុងរង្វង់ទឹកប្រមាណជា៣ពាន់លានដុល្លារអាមេរិក។

កាសែតហិរញ្ញវត្ថុរបសស់ជប៉ុន Nikkei បានដាក់តម្លៃបន្ថែមនៅការពន្យារពេលនេះក្នុងចំនួនទឹកប្រាក់ ២,៧ ពាន់លានដុល្លារអាមេរិក ខណៈដែលជប៉ុនបានចំណាយជាង ១២,៦ ពាន់លានដុល្លារអាមេរិករួចទៅហើយសម្រាប់ការត្រៀមរៀបចំព្រឹត្តិការណ៍កីឡាអូឡាំពិករដូវក្តៅនេះ។

នៅក្នុងការឆ្លើយឆ្លងគ្នានៅលើគេហទំព័ររបស់ខ្លួន IOC បាននិយាយថា នាយករដ្ឋមន្ត្រីជប៉ុន លោកស៊ិនហ្សូ អាបេ អះអាងថា ជប៉ុនយល់ព្រមលើការចំណាយបន្ថែមដែលខ្លួននឹងធ្វើក្រោមលក្ខខណ្ឌនៃកិច្ចព្រមព្រៀងដែលមានស្រាប់សម្រាប់ឆ្នាំ ២០២០ ហើយ IOC នឹងបន្តទទួលខុសត្រូវ សម្រាប់ចំណែកនៃការចំណាយនេះដែរ។

ស្ថាប័នគ្រប់គ្រងកីឡាអូឡាំពិកពិភពលោកមួយនេះបានបន្ថែមទៀតថា៖«សម្រាប់ IOC គឺច្បាស់ណាស់ថាចំនួននេះត្រូវចំណាយបន្ថែមលើការចំណាយដំបូងដល់ទៅរាប់ពាន់លានដុល្លារឯណោះ»។

កាលពីខែមីនា លោកអាបេ និង IOC ដែលមានលោក Thomas Bach ជាប្រធាននោះបានព្រមព្រៀងគ្នាពន្យារពេលការប្រកួតកីឡាអូឡាំពិកក្នុងតូក្យូឆ្នាំ ២០២០ រហូតដល់ខែកក្កដា ឆ្នាំ ២០២១ បន្ទាប់ពីជំងឺឆ្លង COVID-19 ដ៏កាចសាហាវបានគម្រាមកំហែងពិភពលោកដោយបានសម្លាប់មនុស្សរហូតដល់ជិត២សែននាក់។ ប៉ុន្តែថ្មីៗនេះ មានសំណួរជាច្រើនបានចោទសួរថាតើការពន្យារពេលមួយឆ្នាំទៀតនេះនឹងគ្រប់គ្រាន់ឬអត់សម្រាប់ការរៀបចំកីឡាលំដាប់ពិភពលោកមួយនេះ។

លោក Kentaro Iwata អ្នកជំនាញផ្នែកជំងឺឆ្លងមកពីសាកលវិទ្យាល័យ Kobe បានលើកឡើងថា ព្រឹត្តិការណ៍កីឡាអូឡាំពិកដែលត្រូវបានពន្យារពេលទៅឆ្នាំ ២០២១ ដោយសារ COVID-១៩ មិនប្រាកដថារយៈពេលគ្រប់គ្រាន់ក្នុងការលុបបំបាត់ជំងឺរាតត្បាតសកលនេះឡើយ។

«ជប៉ុនអាចគ្រប់គ្រងជំងឺនេះបាននៅរដូវក្តៅឆ្នាំក្រោយ ខ្ញុំសង្ឃឹមថាយើងអាចធ្វើបាន ប៉ុន្តែខ្ញុំមិនគិតថាវានឹងកើតឡើងនៅគ្រប់តំបន់ផ្សេងទៀតនៅលើផែនដីឡើយ»។ លោក Iwata បន្ថែមដូច្នេះក្រោយការអង្កេតរបស់លោក៕