COVID-19
អន្តរជាតិ
លោក Robert Redfield នាយកមជ្ឈមណ្ឌលគ្រប់គ្រង និងបង្ការជំងឺឆ្លងអាមេរិក។ រូបភាព៖ Reuters
×![]()
ដោយ: ធៀន ភារិន្ទ
នាយកមជ្ឈមណ្ឌលគ្រប់គ្រង និងបង្ការជំងឺឆ្លងអាមេរិក (CDC) នៅថ្ងៃទី២១ ខែមេសា បានព្រមានថា រលកទី២ នៃជំងឺរលាកសួត ដែលបង្កដោយកូរ៉ូណាវីរុស(COVID-19) នៅអាមេរិក នឹងកាន់តែអាក្រក់ថែមទៀត នៅក្នុងរដូវត្រជាក់ខាងមុខ។ 
គិតមកត្រឹមថ្ងៃទី២១ ខែមេសានេះ អាមេរិក បានរកឃើញអ្នកផ្ទុក COVID-19 សរុបរហូតដល់ចំនួន ៨១ម៉ឺនករណី អ្នកស្លាប់ជាង៤ម៉ឺននាក់ និងអ្នកជាសះស្បើយជាង ៨ម៉ឺនករណី។ អ្នកឆ្លងក្នុងថ្ងៃទី២១ ខែមេសា មានរហូតដល់ ២៥៩៨៥ករណី និង អ្នកស្លាប់ ២៨០៤ករណី។
ក្នុងកិច្ចសម្ភាសជាមួយសារព័ត៌មាន Washington Post លោក Robert Redfield នាយកមជ្ឈមណ្ឌលគ្រប់គ្រង និងបង្ការជំងឺឆ្លងអាមេរិក បានបញ្ជាក់ថា លទ្ធភាពនៃការវាយលុករបស់កូរ៉ូណាវីរុស អាចកាន់តែអាក្រក់ជាងនេះទៅទៀត នៅក្នុងរដូវត្រជាក់ខាងមុខ។ ពោលគឺស្ថានភាព នឹងអាក្រក់ជាងពេលបច្ចុប្បន្ន ឬដំណាក់កាលទី១ទៅទៀត។ បើតាមការពន្យល់របស់លោក បញ្ហាអាក្រក់ គឺនៅត្រង់ថា នាពេលខាងមុខ វាគឺជារដូវត្រជាក់ ហើយជំងឺផ្តាសាយ និង COVID-19 នឹងវាយប្រហារអាមេរិកក្នុងពេលជាមួយគ្នាតែម្ដង។
ខណៈករណីឆ្លង COVID-19 នៅអាមេរិក ក៏ដូចជា អ្នកជំងឺស្នាក់នៅមន្ទីរពេទ្យធ្លាក់ចុះបន្តិចមែន លោក Redfield បានទទូចឲ្យអាជ្ញាធរសុខាភិបាលអាមេរិក ត្រៀមខ្លួនឲ្យបានរួចរាល់ និងទាមទារឲ្យមានមន្ទីរពេទ្យសម្រាប់បម្រុងទុកនាពេលខាងមុខ ព្រោះអាមេរិក អាចត្រៀមខ្លួនរួចរាល់ក្នុងការទប់ទល់ COVID-19 នាដំណាក់កាលទីពីរបាន។
ក្រៅពីនេះ លោកក៏បានឆ្លើយសំណួរអ្នកសម្ភាស ជុំវិញការចង់ឲ្យបើកសកម្មភាពសេដ្ឋកិច្ចរបស់លោក ប្រធានាធិបតីអាមេរិក ដូណាល់ ត្រាំផងដែរ។ ជាចម្លើយ លោក Redfield បានឆ្លើយយ៉ាងខ្លីថា វាមិនបានជួយសេដ្ឋកិច្ចអាមេរិកច្រើនឡើយ។
ដោយផ្អែកទៅតាមទិន្នន័យរបស់មជ្ឈមណ្ឌលទប់ស្កាត់ និងបង្ការជំងឺឆ្លងអាមេរិកចន្លោះពីឆ្នាំ ២០១៨ ដល់ឆ្នាំ២០១៩ CDC ប៉ាន់ប្រមាណថា មនុស្សចំនួន ៣៥,៥លាននាក់ មានជំងឺផ្តាសាយ។ ក្នុងចំនួននេះ ១៦,៥លាននាក់ បានទៅមជ្ឈមណ្ឌលថែទាំសុខភាព ហើយមនុស្សចំនួន ៤៩០៦០០ បានសម្រាកនៅមន្ទីរពេទ្យ។ ក្នុងចន្លោះពេលនោះ ជំងឺផ្តាសាយ ក៏បានសម្លាប់មនុស្សប្រមាណ ៣៤០០០នាក់ផងដែរ៕
Tag:
អាមេរិក
COVID-19
© រក្សាសិទ្ធិដោយ thmeythmey.com
