COVID-19
អន្តរជាតិ
សិង្ហបុរី ជាប្រទេសដំបូងនៅអាស៊ានមានអ្នកឆ្លង COVID-19 លើសមួយម៉ឺននាក់ រូបភាព AFP
× សិង្ហបុរី បានក្លាយជាប្រទេសដំបូងគេនៅតំបន់អាស៊ានដែលមានអ្នកឆ្លងជំងឺ COVID-19 លើសមួយម៉ឺននាក់។ នៅថ្ងៃទី២២ ខែមេសា សិង្ហបុរី បានរាយការណ៍ពីករណីឆ្លងថ្មីចំនួន១០១៦នាក់ទៀត ដែលនាំឲ្យករណីឆ្លងសរុបឡើងដល់១០១៤១នាក់។ ករណីឆ្លងភាគច្រើន រកឃើញក្នុងចំណោមកម្មករបរទេសដែលរស់នៅក្នុងអន្តេវាសិកដ្ឋានរួមគ្នា។
ភាគច្រើនបំផុតនៃករណីឆ្លងថ្មី គឺអ្នកកាន់បណ្ណការងារដែលរស់នៅក្នុងអន្តេវាសិកដ្ឋានសម្រាប់ពលករបរទេស។ ក្រសួងសុខាភិបាលសិង្ហបុរីបញ្ជាក់បែបនេះពេលប្រកាសករណីឆ្លង COVID-19 ថ្មីនៅថ្ងៃទី២២ ខែមេសា។ ក្នុងចំណោមអ្នកឆ្លងចំនួន១០១៦នាក់ មានពលរដ្ឋសិង្ហបុរី ឬពលរដ្ឋអចិន្ត្រៃយ៍ចំនួន១៥ករណីប៉ុណ្ណោះ។
ការហក់ឡើងយ៉ាងឆាប់រហ័សនេះ ធ្វើឲ្យរដ្ឋាភិបាលសិង្ហបុរីដាក់ចេញគោលការណ៍ថ្មីបន្ថែមទៀត សំដៅកាត់បន្ថយការឆ្លងពីមនុស្សម្នាក់ទៅមនុស្សម្នាក់។ នាយករដ្ឋមន្ត្រីសិង្ហបុរី លី សៀនឡុង នៅថ្ងៃទី២១ ខែមេសា បានប្រកាសពីការបន្តរយៈពេលរឹតត្បិតសកម្មភាពប្រជាជនក្នុងពេលអាសន្ននេះ។ «គោលការណ៍បំបែកសៀគ្វី» ដែលហៅសំដៅវិធានការដាក់ប្រជាជនឲ្យនៅឆ្ងាយពីគ្នាដើម្បីផ្ដាច់ការឆ្លង COVID-19 នឹងត្រូវអនុវត្តរហូតដល់ថ្ងៃទី១ ខែមិថុនា។
អាជីវកម្មមួយចំនួនដូចហាងកាត់សក់ និងហាងលក់ភេសជ្ជៈជាដើម ត្រូវហាមមិនឲ្យដំណើរការឡើយ។ ដោយឡែក វិស្សមកាលសម្រាប់សិស្សនៅខែមិថុនាខាងមុខ នឹងបញ្ចូលក្នុងរយៈពេលរឹតត្បិតនេះ ដើម្បីទុកពេលឲ្យសិស្សរៀនវិញនៅពេលស្ថានការណ៍ធូរស្រាល។
ឈរបន្ទាប់ពីសិង្ហបុរី គឺឥណ្ឌូណេស៊ីដែលមានករណីឆ្លងចំនួន៧១៣៥នាក់ និងស្លាប់៦១៦នាក់។ ឡាវជាប្រទេសមានករណីឆ្លងតិចជាងគេ គឺ១៩ករណី៕
Tag:
សិង្ហបុរី
COVID-19
© រក្សាសិទ្ធិដោយ thmeythmey.com