COVID-19
អន្តរជាតិ
COVID-19៖ ផ្សារមួយនៅមីយ៉ាន់ម៉ា រៀបចំគម្លាតកន្លែងលក់ដូរ ខណៈក្នុងប្រទេសមាន១២១ករណី រូបភាព៖ Facebook, Jain Weraphong
× នាថ្ងៃទី២០ ខែមេសា ម្ចាស់គណនី Facebook ឈ្មោះ Jain Weraphong បានបង្ហោះរូបភាពប៉ុន្មានសន្លឹក ដែលបានបង្ហាញពីទិដ្ឋភាពផ្សារលក់ដូរមួយកន្លែង នៅក្នុងប្រទេសមីយ៉ាន់ម៉ា ដែលត្រូវបានគេកំណត់ឲ្យអ្នកលក់ស្ថិតនៅឆ្ងាយពីគ្នា ឬកំណត់គម្លាតសុវត្ថិភាព ដើម្បីទប់ស្កាត់ករណីឆ្លងជំងឺរលាកសួត ដែលបង្កដោយកូរ៉ូណាវីរុស (COVID-19)។
តាមការបង្ហោះរូបភាពប៉ុន្មានសន្លឹកលើបណ្តាញសង្គម Facebook លោក Jain Weraphong បានសរសេរយ៉ាងខ្លីថា «ផ្សាររក្សាគម្លាតសុវត្ថិភាពនៅមីយ៉ាន់ម៉ា»។ បើតាមរូបភាពដែលបានបង្ហោះ អ្នកលក់ដូរ ត្រូវបានគេកំណត់ឲ្យស្ថិតនៅឆ្ងាយពីគ្នាប្រមាណពី ១ម៉ែត្រ ទៅ ២ម៉ែត្រ ដើម្បីរក្សាគម្លាតសុវត្ថិភាព និងការពារករណីឆ្លង COVID-19។
ការបង្ហោះរូបប៉ុន្មានសន្លឹកនេះ បានទទួលការគាំទ្រយ៉ាងខ្លាំងពីអ្នកលេងបណ្តាញសង្គម Facebook ដោយខ្លះសរសើរថា ជាគំនិតល្អ ក្នុងការទប់ស្កាត់កូរ៉ូណាវីរុស ហើយខ្លះទៀតថែមទៀត ធៀបមីយ៉ាន់ម៉ាទៅនឹងប្រទេសមួយចំនួនជាដើម។
សូមបញ្ជាក់ថា គិតមកត្រឹមពេលនេះ មីយ៉ាន់ម៉ាមានករណី COVID-19 សរុបចំនួន ១២១ករណី ស្លាប់ ៥ករណី និងជាសះស្បើយចំនួន ៧ករណី។
ស្របពេលជាមួយគ្នានេះដែរ អ្នកប្រើប្រាស់បណ្តាញសង្គមមួយចំនួននៅកម្ពុជា បានសរសេរថា ផ្សារនោះស្ថិតនៅក្នុងស្រុកសិរីសោភណ្ឌ ខេត្តបន្ទាយមានជ័យ ហើយមានការចែករំលែកតៗគ្នាទាំងយល់ច្រឡំ៕
Tag:
មីយ៉ាន់ម៉ា
COVID-19
© រក្សាសិទ្ធិដោយ thmeythmey.com