មូលនិធិព្រះពុទ្ធសាសនាដើម្បីសុខភាព កំពុងស្វែងរកការគាំទ្រ ដើម្បីជួយជនរងគ្រោះ ព្រោះកូវីដ១៩

COVID-19

ជាតិ

មូលនិធិព្រះពុទ្ធសាសនាដើម្បីសុខភាព កំពុងស្វែងរកការគាំទ្រ ដើម្បីជួយជនរងគ្រោះ ព្រោះកូវីដ១៩

22, Apr 2020 , 7:29 pm

រូបភាព

ដោយ: ប៉ូ សាគុន

ភ្នំពេញ៖ អង្គការព្រះពុទ្ធសាសនា ដើម្បីសុខភាព កំពុងស្វែងរកការគាំទ្រពីសប្បុរសដើម្បីជូនជនងាយរងគ្រោះ នៅក្នុងអំឡុងពេលនៃការរីករាលដាលជំងឺកូវីដ១៩នៅកម្ពុជា។ នេះជាគម្រោងមួយទៀត បន្ថែមលើគម្រោងចាស់របស់អង្គការ ដើម្បីប្រមូលវិភាគទានពីសប្បុរសជន ចែកដល់ជនងាយរងគ្រោះទាំងនោះ។

មូលនិធិ ព្រះពុទ្ធសាសនា ដើម្បីសុខភាព គឺជាអង្គការជួយទ្រទ្រង់មូលនិធិសមធម៌សហគមន៍ ដែលកំពុងជួយជនក្រីក្រងាយរងគ្រោះ ដូចជាចាស់ជរាក្រីក្រ ជនពិការ កុមារកំព្រា ស្ត្រីក្រីក្រមានផ្ទៃពោះ អ្នកផ្ទុកមេរោគអេដស៍ អ្នកជំងឺរបេង និងក្រុមងាយរងគ្រោះផ្សេងទៀត ដើម្បីឱ្យពួកគាត់ទទួលបានសេវាថែទាំសុខភាព ប្រកបដោយសមធម៌។

លោក ហ្សង់ អ៊ីវ ជាសមាជិកនៃកណៈកម្មាធិការ មូលនិធិ ព្រះពុទ្ធសាសនា ដើម្បីសុខភាព បានប្រាប់សារព័ត៌មានថ្មីៗថា ចាប់តាំងពីមានកូវីដ១៩ មូនិធិ បានផ្ដល់អំណោយជួយអ្នកបាត់បង់ការងារ(បាត់ចំណូល)ព្រោះកូវីដ១៩ បានប្រមាណ២០០ករណី។ លោក ហ្សង់ អ៊ីវ បន្ថែមថា ជនងាយរងគ្រោះពីកូវីដ១៩ ដែលលោកបានចុះទៅជួបផ្ទាល់ គឺពួកគេបានជួបវិបត្តិសេដ្ឋកិច្ចគ្រួសារធ្ងន់ធ្ងរ តែមិនបានជួបជនក្រីក្រដែលមានផ្ទុកកូវីដ១៩ឡើយ។

លោកពន្យល់បន្ថែមដូច្នេះ៖«ពួកយើងមិនទាន់បានជូបអ្នកក្រីក្រដែលមានផ្ទុកកូវីដ១៩ទេ។ យើងបានជួបតែអ្នកក្រីក្រដែលបានបាត់បង់ការងារព្រោះកូវីដ១៩។ ខ្ញុំលើកឧទាហរណ៍ដូចជាគ្រូសារមួយនោះ មានកូន៣នាក់ ម្ដាយដែលជាស្ត្រីមេម៉ាយ ជាបង្គោលរកប្រាក់ចិញ្ចឹមគ្រួសារ តែក្រោយពីមានកូដវី១៩ កន្លែងធ្វើការរបស់គាត់ត្រូវបិទ ដូច្នេះគាត់មានបញ្ហាសេដ្ឋកិច្ចគ្រួសារខ្លាំង។ ដូចលោកយាយមួយទៀត គាត់ទទួលបានការជួយឧបត្ថម្ភពីប្អូនប្រុស ដែលធ្វើជាជាងប៉ះកង់នៅជាប់របងសាលា តែពេលសាលារៀនបិទ គាត់ក៏មិនអាចរកប្រាក់បាន ហើយមិនអាចផ្ដល់ជំនួយឱ្យបងស្រីបានដូចមុនដែរ ដូច្នេះយើងយកជំនួយទៅជួយលោកយាយម្នាក់នោះ»។

មូលនិធិ ព្រះពុទ្ធសាសនា ដើម្បីសុខភាព នេះ ផ្ដល់អតិភាពដល់អ្នកដែលមានប័នក្រីក្រ តែទោះជាយ៉ាងណា អ្នកក្រីក្រគ្មានប័នក៏អាចទទួលបានមូលនិធិនេះដែរ ដោយពួកគេត្រូវមានការធានាពីអាជ្ញាធរមូលដ្ឋាន និងអ្នកដឹកនាំផ្នែកសាសនា ថាពិតជាក្រីក្រខ្វះលទ្ធភាពមែន នេះបើតាមការបញ្ជាក់ពីលោក ហ្សង់ អ៊ីវ។ ជាសមាជិកនៃកណៈកម្មាធិការ មូលនិធិ ព្រះពុទ្ធសាសនា ដើម្បីសុខភាព លោក ហ្សង់ អ៊ីវ ស្នើដល់សប្បុរសជនដែលមានលទ្ធភាព មេត្តាជួយជនក្រីក្រតាមសទ្ធាជ្រះថ្លា។

អង្គការព្រះពុទ្ធសាសនា ដើម្បីសុខភាព បង្កើតឡើងដោយសម្ដេចព្រះជ័យមុនី ឃឹម សន ដោយមានព្រះបទុមរង្សី ខៀវ ខន ជាប្រធាន។ មូលនិធិនេះគ្រប់គ្រងដោយ គណៈកម្មាធិការប្រតិបត្តិចំនួន៦រូប។ អង្គការព្រះពុទ្ធសាសនា ដើម្បីសុខភាព ជាអង្គការក្រៅរដ្ឋាភិបាលក្នុងស្រុក មិនស្វែងរកប្រាក់ចំណេញ មិនប្រកាន់និន្នាការនយោបាយ និងសាសនា ដែលបង្កើតឡើងតាំងពីឆ្នាំ២០០៤។ អង្គការនេះទទួលស្គាល់ដោយប្រកាសរបស់ក្រសួងមហាផ្ទៃ។

អង្គការព្រះពុទ្ធសាសនា ដើម្បីសុខភាព បាននឹងកំពុងអនុវត្តន៍សកម្មភាពនៅខេត្តចំនួន១២ ក្នុងប្រទេសកម្ពុជា។ អង្គការនេះធ្វើការជាដៃគូជាមួយអាជ្ញាធរមូលដ្ឋាន និងសហគមន៍ ដើម្បីលើកកម្ពស់សុខុមាលភាពរបស់ជនក្រីក្រងាយរងគ្រោះបំផុតរួមាន ចាស់ជរា ជនមានពិការភាព កុមារកំព្រា ស្ត្រីមានផ្ទៃពោះ អ្នកផ្ទុកមេរោគអេដស៍ អ្នកជំងឺរបេង និងក្រុមងាយរងគ្រោះផ្សេងទៀត ដើម្បីឱ្យពួកគាត់ទទួលបានសេវាថែទាំសុខភាព ប្រកបដោយសមធម៌។

សកម្មភាពជួយជនក្រីក្រ ធ្វើឡើងតាមរយៈមូលនិធិសមធម៌សហគមន៍ទាំង៤០០ឃុំ ដែលមាននៅក្នុងខេត្តគោលដៅចំនួន១២។ មកដល់បច្ចុប្បន្ននេះ តាមរយៈគម្រោងកម្មវិធី និងជំនួយសប្បុរសធម៌នានា អង្គការបានជួយជនក្រីក្រងាយរងគ្រោះខាងលើជាច្រើនម៉ឺននាក់ ឱ្យទទួលបានសេវាថែទាំសុខភាពសមស្រប ប្រកបដោយគុណភាព។

សប្បុរសជនអាចបរិច្ចាគទានរបស់ខ្លួន នៅតាមហឹប មូលនិធិ ព្រះពុទ្ធសាសនា ដើម្បីសុខភាព ដែលមាននៅក្នុងវត្តនានានៅរាជធានីភ្នំពេញ ឬអាចទំនាក់ទំនងទៅព្រះបទុមរង្សី ខៀវ ខន ០៩២ ២៥ ៦២ ៦៨។ លោក អន សុជាតិ ០៨៩ ៦១ ៥៩ ៥៩។ លោកស្រី ស៊ិន ចន្ទី ០១៥ ៤១៦ ០០៧។ លោក Jean Yves ០១២ ៨២៣ ៤០០។ ថវិកាដែលសប្បុរសជនឧបត្ថម្ភ ត្រូវបានគ្រប់គ្រងដោយគណៈកម្មការខាងលើ ដោយមានរបាយការណ៍ច្បាស់លាស់ និងមានការត្រួតពិនិត្យត្រឹមត្រូវ៕