COVID-19
អន្តរជាតិ
WHO ថា កូរ៉ូណាវីរុស ទំនងចេញពីសត្វ មិនមែនមន្ទីរពិសោធន៍ចិនឡើយ រូបភាព៖ Reuters
× អង្គការសុខភាពពិភពលោក (WHO) នៅថ្ងៃទី២១ ខែមេសា បានលើកឡើងថា ដោយផ្អែកទៅតាមភស្តុតាងដែលទទួលបាន កូរ៉ូណាវីរុស មានដើមកំណើតចេញពីសត្វប្រចៀវ ហើយវាមិនមែនបែកចេញពីមន្ទីរពិសោធន៍ឡើយ។ ការលើកឡើងរបស់អង្គការសុខភាពពិភពលោក នៅពេលនេះ គឺស្របពេលចិន កំពុងរងសម្ពាធពីគ្រប់ទិសទី ជុំវិញការផ្ទុះឡើងនៃកូរ៉ូណាវីរុស និងប្រភពរបស់វា។
នាពេលកន្លងមក ប្រធានាធិបតអាមេរិក ដូណាល់ ត្រាំ បានរករឿងចិនយ៉ាងខ្លាំងជុំវិញការលាក់ព័ត៌មានជំងឺរលាកសួត ដែលបង្កដោយកូរ៉ូណាវីរុស (COVID-19)។ ជាពិសេស លោកប្រធានាធិបតីថែមទាំង ព្រមានស៊ើបអង្កេតលើដើមកំណើតនៃវីរុសថែមទៀត ដើម្បីប្រាកដថាតើវីរុសថ្មីមួយនេះ ចេញពីមន្ទីរពិសោធន៍ទីក្រុងវូហានឬក៏អត់។
ពាក់ព័ន្ធនឹងបញ្ហានេះ លោកស្រី Fadela Chaib អ្នកនាំពាក្យអង្គការសុខភាពពិភពលោក បាននិយាយនៅក្នុងសន្និសីទសារព័ត៌មាននាទីក្រុងហ្សឺណែវថា ដោយផ្អែកទៅតាមភស្តុតាង ដែលមាននៅក្នុងដៃ កូរ៉ូណាវីរុសគឺមានដើមកំណើតចេញមកពីសត្វ ហើយវាមិនមែនជាការបង្កើតឡើងដោយមនុស្ស ឬការលេចចេញពីមន្ទីរពិសោធន៍ណាមួយដែរ។ យ៉ាងណាក៏ដោយ លោកស្រីក៏មិនអាចច្បាស់មួយរយភាគរយដែរថា វាកើតចេញមកពីសត្វឬយ៉ាងណា ប៉ុន្តែកូរ៉ូណាវីរុសមានភាគរយច្រើនកើតចេញមកពីសត្វ ជាជាងមនុស្សបង្កើតវា។
ទន្ទឹមគ្នានេះ អ្នកនាំពាក្យ ក៏បានបន្តទៀតថា មិនទាន់មានការបង្ហាញឲ្យច្បាស់លាស់នៅឡើយទេ ថាតើកូរ៉ូណាវីរុសអាចឆ្លងកាត់របាំងពិសេសពីសត្វ ទៅមនុស្សដោយរបៀបណាទេ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters ។
នាពេលកន្លងមក មានគេសង្ស័យថា កូរ៉ូណាវីរុស គឺបែកចេញមន្ទីរពិសោធន៍សត្វប្រចៀវមួយកន្លែងនៅក្នុងទីក្រុងវូហាន។ ប៉ុន្តែការសង្ស័យនេះ គឺគ្មានភស្តុតាងណាមួយបញ្ជាក់ថា កូរ៉ូណាវីរុសពិតជាធ្លាយចេញពីមន្ទីរពិសោធន៍នេះឡើយ។
សូមបញ្ជាក់ថា ពាក់ព័ន្ធនឹងករណីផ្ទុះ និងដើមកំណើតកូរ៉ូណាវីរុស ប្រទេសជាច្រើនដូចជាអាល្លឺម៉ង់ អូស្ត្រាលី អាមេរិក បារាំង កំពុងដាក់សម្ពាធមកលើចិនឲ្យបង្ហាញពីតម្លាភាពជុំវិញកូរ៉ូណាវីរុស ដែលបានផ្ទុះដំបូងនៅក្នុងទីក្រុងវូហាន។ ជាការឆ្លើយតប ចិនបានលើកឡើងថា ខ្លួនមិនដែលលាក់បាំងព័ត៌មានជុំវិញកូរ៉ូណាវីរុសអ្វីឡើយ សូម្បីតែហ្សែននៃវីរុស ការសហការជាមួយអង្គការសុខភាពពិភពលោក និងការចែករំលែកព័ត៌មានផ្សេងទៀតជាដើម៕
© រក្សាសិទ្ធិដោយ thmeythmey.com