COVID-19
អន្តរជាតិ
ថៃ បញ្ចុះតម្លៃអគ្គិសនីឲ្យអ្នកប្រើ២២លាននាក់ដើម្បីសម្រួលការលំបាកអំឡុងពេល COVID-19
×![]()
គណរដ្ឋមន្ត្រីថៃ យល់ព្រមជាមួយនឹងសេចក្តីសម្រេចរបស់ក្រសួងថាមពលថៃក្នុងការមិនយក ឫបញ្ចុះតម្លៃអគ្គិសនីដើម្បីជួយកាត់បន្ថយចំណាយក្នុងគ្រួសារ អំឡុងពេលមានវិបត្តិជំងឺរាតត្បាតសកល COVID-19 ។ នេះបើតាមកាសែត Bangkok Post ។
លោក Sontirat Sontijirawong រដ្ឋមន្ត្រីក្រសួងថាមពល និយាយថា គណៈរដ្ឋមន្ត្រីយល់ព្រមជាផ្លូវការនូវវិធានការបញ្ចុះតម្លៃអគ្គិសនីពីខែមីនា ដល់ឧសភា ហើយនឹងអនុវត្តនៅទូទាំងប្រទេស។ កាសែត Bangkok Post ផ្សាយបែបនេះក្រោយកិច្ចប្រជុំគណៈរដ្ឋមន្ត្រីថៃនៅថ្ងៃទី២១ ខែមេសា។ វិធានការនេះ នឹងត្រូវចំណាយប្រាក់ ២៣,៦ពាន់លានបាត (ប្រហែល៧២៦លានដុល្លារអាមេរិក) ដើម្បីជួយសម្រាលបន្ទុកសាធារណៈ។
ក្នុងអំឡុងពេលផ្ទុះឡើងនៃជំងឺ COVID-19 នេះ តម្លៃអគ្គិសនីក្នុងផ្ទះខ្លះ បានកើនឡើងពី ២ទៅ៣ ដងដោយសារតែត្រូវធ្វើចត្តាឡីស័ក នៅដាច់តែឯង ធ្វើការពីផ្ទះ ឫជៀសវាងចេញទៅក្រៅដែលសុទ្ធតែជាសកម្មភាពកាត់បន្ថយការឆ្លង។
យោងតាមរដ្ឋមន្ត្រីថាមពលថៃ ចំណាត់ការខាងលើនេះ រំពឹងថានឹងសម្រាលបន្ទុករបស់អ្នកប្រើប្រាស់ជាង២២លាននាក់។ ក៏ប៉ុន្តែក្រសួងនៅមានកិច្ចការជាច្រើនទៀត ជាពិសេសការពិចារណាកាត់បន្ថយតម្លៃអគ្គិសនីសម្រាប់អាជីវកម្ម និងវិស័យឧស្សាហកម្មផង។
ក្នុងសំណើកាត់បន្ថយថ្លៃអគ្គិសនី លំនៅស្ថានណាដែលប្រើប្រាស់អគ្គិសនីក្រោម១៥០ គីឡូវ៉ាត់ម៉ោង នឹងមិនតម្រូវឲ្យបង់ប្រាក់ឡើយ ហើយវិធានការនេះអនុវត្តសម្រាប់តែផ្ទះដែលភ្ជាប់ចរន្តអគ្គិសនីមិនលើសពី៥ អំពែប៉ុណ្ណោះ។ គេរំពឹងថាលំនៅស្ថានជាង ១០លានគ្រួសារនឹងទទួលផលពីវិធានការខាងលើ។
សម្រាប់លំនៅស្ថាន ដែលភ្ជាប់ចរន្តលើសពី៥អំពែ តែប្រើអគ្គិសនីតិចជាង៨០០គីឡូវ៉ាត់ម៉ោង គេនឹងតម្រូវឲ្យបង់ថ្លៃតាមវិក្ក័យបត្រខែកុម្ភៈ។
បើតាមកាសែតដដែល លំនៅស្ថាន ដែលប្រើលើស៨០០គីឡូវ៉ាត់ម៉ោង រដ្ឋនឹងបញ្ចុះតម្លៃ៥០ភាគរយ។
រីឯ លំនៅស្ថានដែលប្រើប្រាស់លើសពី៣,០០០ គីឡូវ៉ាត់ម៉ោង នឹងទទួលបានការបញ្ចុះតម្លៃ៣០ភាគរយ។
ចំណែកនៅពីថ្ងៃទី២១ ខែមេសា សហព័ន្ធឧស្សាហកម្មថៃ អំពាវនាវឲ្យរដ្ឋាភិបាល ផ្អាកការបង់ថ្លៃអគ្គិសនីពីសហគ្រាសខ្នាតតូច មធ្យម និងលំនៅស្ថានរយៈពេល៤ខែ។ លោក Supant Mongkolsuthree ប្រធានសហព័ន្ធឧស្សាហកម្មថៃ និយាយថា រដ្ឋាភិបាលគួរតែបញ្ចុះតម្លៃអគ្គិសនី៥ភាគរយ ឯតម្លៃពន្ធគយលើប្រេង គួរគណនាតាមការធ្លាក់ចុះតម្លៃប្រេងឆៅសកល៕
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
