COVID-19
ជាតិ
រដ្ឋមន្ត្រីការបរទេសអាស៊ាន-អាមេរិក នឹងប្រជុំពាក់ព័ន្ធការប្រយុទ្ធប្រឆាំងកូវីដ១៩ តាមVideo Conference
រដ្ឋមន្រ្តីការបរទេសអាស៊ាន និងអគ្គលេខាធិការអាស៊ានចាប់ដៃនាជំនួបនៅវៀតណាម។ រូបភាព AFP
×![]()
ដោយ: ធឿន បញ្ញាឬទិ្ធ
ភ្នំពេញ៖ រដ្ឋមន្ត្រីការបរទេសអាស៊ាន-អាមេរិក នឹងប្រជុំស្តីពីកិច្ចសហប្រតិបត្តិការប្រយុទ្ធប្រឆាំងនឹងជំងឺឆ្លងកូវីដ១៩ តាមVideo Conference នៅថ្ងៃទី២៣ មេសា នេះ។ លោក ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ នឹងប្រជុំតាមប្រព័ន្ធវីដេអូ ពីទីស្តីការក្រសួង។
លោក Michael R. Pompeo រដ្ឋមន្ត្រីការបទេសអាមេរិក និងរដ្ឋមន្ត្រីការបរទេសអាស៊ាន និងផ្លាស់ប្ដូរទស្សនគ្នាទៅវិញទៅមក រួមទាំងការពិភាក្សាអំពីវិធីសាស្ត្រនានា ដើម្បីពង្រឹងកិច្ចសហការភាពជាដៃគូ ក្នុងការប្រយុទ្ធប្រឆាំងការរីករាលដាលនៃជំងឺកូវីដ១៩ ក្នុងក្របខណ្ឌភាពជាដៃគូយុទ្ធសាស្ត្ររវាងអាស៊ាន-អាមេរិក។
សេចក្តីថ្លែងការណ៍របស់ក្រសួងការបរទេសកម្ពុជា បានបញ្ជាក់ដូច្នេះថា៖«កិច្ចពិភាក្សាក៏នឹងផ្ដោតផងដែរ ទៅលើសកម្មភាពដើម្បីដោះស្រាយគ្រោះអាសន្នវិស័យសុខាភិបាល ដែលជាសេចក្តីកង្វល់អន្តរជាតិ និងការពង្រឹងប្រព័ន្ធសុខាភិបាលសាធារណៈនៅក្នុងតំបន់យូរអង្វែង»។
កិច្ចប្រជុំនេះ នឹងបង្កើតជាព្រឹត្តិការណ៍ថ្មីដ៏សំខាន់មួយ នៅក្នុងទំនាក់ទំនងដៃគូរយុទ្ធសាស្ត្រ រវាងអាស៊ាន និងអាមេរិក សម្រាប់កិច្ចសហប្រតិបត្តិការយូរអង្វែងនៅក្នុងវិស័យសុខាភិបាលសាធារណៈចំពោះនៃបញ្ហាប្រឈមជាសាកលនៃជំងឺឆ្លងកូវីដ១៩ ដែលពុំធ្លាប់មានពីមុនមក។ នេះជាការបញ្ជាក់របស់ក្រសួងការបរទេសកម្ពុជា៕
Tag:
អាស៊ាន
អាមេរិក
COVID-19
© រក្សាសិទ្ធិដោយ thmeythmey.com
