COVID-19
កីឡាអន្តរជាតិ
អន្តរជាតិ
ក្លិបអ៊ីតាលី Pescara នឹងប្រើឯកសណ្ឋានថ្មីច្នៃដោយក្មេងប្រុសអាយុ៦ឆ្នាំ នៅរដូវកាលក្រោយ
× ក្មេងប្រុសអាយុ ៦ ឆ្នាំម្នាក់នៅប្រទេសអ៊ីតាលីកំពុងទទួលបានការអបអរសាទរយ៉ាងខ្លាំងបន្ទាប់ពីរចនាម៉ូតអាវរបស់ក្រុមកីឡាបាល់ទាត់មួយ ហើយត្រូវក្រុមជំនាញរបស់ក្លិប Pescara ទទួលយក។ Pescara នឹងប្រើប្រាស់ឯកសណ្ឋានរបស់ក្មេងប្រុសនេះជាផ្លូវការនៅរដូវកាលក្រោយ។
ក្មេងប្រុសឈ្មោះ Luigi D'Agostino បានយកឈ្នះកុមារដទៃទៀតនៅក្នុងការប្រកួតប្រជែងមួយដែរៀបចំដោយក្លិប Pescara នៃលីគលំដាប់ទីពីរអ៊ីតាលី Serie B សម្រាប់អ្នកគាំទ្រវ័យក្មេងរបស់ខ្លួន។ ក្លិបបង្កើតកម្មវិធីនេះឡើង ក្នុងគោលបំណងបន្ធូរបន្ថយភាពធុញទ្រាន់អំឡុងពេលជាប់ក្នុងផ្ទះ ដោយសារជំងឺឆ្លង COVID-19 ក្នុងប្រទេសអ៊ីតាលី។
ក្លិប Pescara ដែលមានឈ្មោះពេញ Pescara Calcio បានកកើតឡើងក្នុងឆ្នាំ ១៩៣៦ ហើយធ្លាប់លេងនៅលីគកំពូលអ៊ីតាលី Serie A រយៈពេល៧រដូវក្នុងប្រវត្តិសាស្ត្រក្លិប។
អំឡុងពេល COVID-19 រាតត្បាត ដែលធ្វើឲ្យកម្មវិធីប្រកួតលីគត្រូវផ្អាកនោះ ក្លិបនេះបានបង្កើតកម្មវិធីសម្រាប់កុមារដែលមានឈ្មោះថា «ទាត់ Covid-19» ឬជាភាសារអង់គ្លេស «give a kick to Covid-19»។
D'Agostino បានគូររូបអាវហើយលើរូបអាវនោះមានត្រីដូហ្វីន (Dolphin) កំពុងលេងជាមួយបាល់ និងមានពណ៌ឆ្នូតៗចំនួន៦ពណ៌ផ្សេងទៀតនៅលើផ្ទៃអាវនោះ។ ក្លិប Pescara បានប្រកាសជ័យជម្នះរបស់ក្មេងប្រុសវ័យ៦ឆ្នាំ D'Agostino នៅលើវេបសាយផ្លូវការរបស់ខ្លួន។
មិនត្រឹមតែប៉ុណ្ណោះ Pescara ដែលមានមានផ្លាកសញ្ញាសម្គាល់ក្រុមជាត្រីដូហ្វីនដែរនោះ បានសម្រេចយកការរចនាឯកសណ្ឋានដោយយកគំរូតាមគំនូររបស់ក្មេងប្រុសនេះ ដើម្បីពាក់ប្រកួតជាផ្លូវការនៅរដូវកាលក្រោយ៕
Tag:
Pescara
Luigi D\'Agostino
COVID-19
© រក្សាសិទ្ធិដោយ thmeythmey.com