COVID-19
ជាតិ
មហាផ្ទៃ ហាមពលករជាង៨ម៉ឺននាក់វិលទៅក្រៅប្រទេស ហើយលើកទឹកចិត្តឲ្យដាំបន្លែនៅផ្ទះ
× ភ្នំពេញ៖ ក្រសួងមហាផ្ទៃ បានហាមឃាត់ពលករខ្មែរជាង៨ម៉ឺននាក់ មិនឲ្យវិលត្រឡប់ទៅក្រៅប្រទេសវិញ ដើម្បីចូលរួមទប់ស្កាត់ការរីករាលដាលជំងឺកូវីដ-១៩។ ក្រសួងស្នើឱ្យពលករទាំងនោះ ដាំបន្លែនៅតាមផ្ទះវិញ ដើម្បីរកចំណូលបណ្ដោះអាសន្នសិន ទម្រាំតែជំងឺកូវីដ១៩ ស្ងប់ស្ងាត់ទៅវិញ។
លោកស្រី ជូ ប៊ុនអេង រដ្ឋលេខាធិការក្រសួងមហាផ្ទៃ បានបញ្ជាក់ថា ពលករជាង៨ម៉ឺននាក់ ដែលត្រឡប់មកពីក្រៅប្រទេសនេះ មិនទាន់រកឃើញមានឆ្លងជំងឺ កូវីដ-១៩ នៅឡើយទេ។ ប៉ុន្តែក្រសួង ក៏មិនចង់ឱ្យពួកគេត្រឡប់ទៅក្រៅប្រទេសវិញដែរ។
នាយកដ្ឋានព័ត៌មានវិទ្យា បានស្រង់សម្តីលោកស្រី ជូ ប៊ុនអេង នៅក្រោយបញ្ចប់កិច្ចប្រជុំពិគ្រោះយោបល់ ដើម្បីពិនិត្យលទ្ធភាពក្នុងការឆ្លើយតបទៅនឹងតម្រូវការរយៈពេលខ្លី មធ្យម និងវែងរបស់ពលករចំណាកស្រុកក្នុងស្ថានភាពរីករាលដាលនៃជំងឺកូវីដ-១៩ នាថ្ងៃទី២២ ខែមេសា ឆ្នាំ២០២០ យ៉ាងដូច្នេះថា៖«សូមមេត្តាកុំអាលវិលត្រឡប់ទៅរកប្រទេសគោលដៅវិញ ដោយសារប្រទេសគោលដៅហ្នឹង បច្ចុប្បន្ននេះគឺមានអត្រាឆ្លងខ្ពស់ជាងយើងទៀត។ អ៊ីចឹងប្រសិនបើពួកគាត់វិលត្រឡប់ទៅពេលនេះ គឺជួបនឹងហានីភ័យខ្ពស់ណាស់ ហើយខាងប្រទេសគេវិញក៏រឹតបន្ដឹងដែរ អំពីការបិទព្រំដែនដែរ»។
រដ្ឋលេខាធិការ និងជាអនុប្រធានអចិន្ត្រៃយ៍ នៃគណៈកម្មាធិការជាតិប្រយុទ្ធប្រឆាំងការជួញដូរមនុស្ស (គ.ជ.ប.ជ) រូបនេះ ក៏លើកទឹកចិត្តឱ្យពលរដ្ឋទាំងអស់ ត្រូវមានការដាំដុះបន្លែបន្ថែមនៅតាមទីលំនៅរៀងៗខ្លួន ដើម្បីរកប្រាក់ចំណូលក្នុងគ្រួសារបន្ថែមទៀត ។ ជាពិសេសត្រូវមានការអត់ធ្មត់ចំពោះដំណាក់កាលដែលកម្ពុជាកំពុងជួបប្រទះបញ្ហាការរីករាលដាលនៃជំងឺកូវីដ-១៩នេះ។
កន្លងមកក្រសួងសុខាភិបាល ធ្លាប់បញ្ជាក់ថា ពលករខ្មែរជាង៤០០នាក់ ដែលត្រូវបានធ្វើតេស្តសំណាករក រកកូវីដ១៩នោះ គឺមិនមានមេរោគឡើយ។
បើតាមលោកស្រី ជូ ប៊ុនអេង ពលករខ្មែរដែលចូលដល់ព្រំដែនភ្លាមៗ គឺភាគីពាក់ព័ន្ធទាំងអស់បានចុះពិនិត្យ និងសួរប្រវត្តិពួកគាត់ ព្រមទាំងបញ្ជូនទៅធ្វើចត្តាឡីស័កផងដែរ។«បើសិនយើងរកឃើញថា មានពលករយើងណាម្នាក់មានកម្តៅ ខុសពីធម្មតា។ គឺពួកគាត់ស្ថិតនៅការតាមដានបន្ដអត់ទាន់បញ្ជូនគាត់ចេញមកទេ។ អ៊ីចឹងនៅពេលនោះ មានជាបន្ដបន្ទាប់ ដែលយើងស្នើសុំមន្ទីរពេទ្យបង្អែកព្រំដែនត្រូវពិនិត្យបន្ថែម ដើម្បីយកសំណាកក្នុងការពិនិត្យចឹង យើងរកអត់ទាន់ឃើញ យើងគិតថាពួកគាត់មានក្ដៅដោយមូលហេតុផ្សេងៗ»។ នេះជាការបញ្ជាក់របស់រដ្ឋលេខាធិការក្រសួងមហាផ្ទៃ ។
គិតត្រឹមថ្ងៃទី២៣ មេសានេះ កម្ពុជា មានអ្នកជំងឺកូវីដ១៩ ចំនួន១២២នាក់ ក្នុងនោះជាសះស្បើយ១១០នាក់ ខណៈអ្នកកំពុងសម្រាកព្យាបាលនៅសល់តែ១២នាក់ប៉ុណ្ណោះ៕
Tag:
COVID-19
ជូ ប៊ុនអេង
© រក្សាសិទ្ធិដោយ thmeythmey.com