COVID-19
អន្តរជាតិ
ប្រភពរូប៖ AFP
×![]()
ពលរដ្ឋថៃដែលបាត់បង់ការងារធ្វើដោយសារCOVID-19 នៅថ្ងៃទី២២ ខែមេសា បាននាំគ្នាតម្រង់ជួរយ៉ាងវែងអន្លាយដើម្បីទទួលយកម្ហូបអាហារមិនគិតលុយ នៅទូទាំងទីក្រុងបាងកក ។ ពួកគេសង្ឃឹមទទួលប្រាក់ឧបត្ថម្ភពីរដ្ឋាភិបាលដើម្បីដោះទ័លមួយគ្រាសិន ខណៈជំងឺរាតត្បាតCOVID-19 ប៉ះពាល់ធ្ងន់ធ្ងរដល់សេដ្ឋកិច្ចថៃ ដែលធ្វើឲ្យរដ្ឋាភិបាលពិបាកចាត់ចំណាត់ការឆ្លើយតប។
កម្មករក្រៅប្រព័ន្ធថៃប្រមាណ២៧លាននាក់ ដែលបាត់បង់ការងារពួកគេក្នុងវិស័យទេសចរណ៍ កម្សាន្ត សេវាកម្ម និងភោជនីយដ្ឋាន បានដាក់ពាក្យសម្រាប់ការចែកប្រាក់ប្រចាំខែពីរដ្ឋាភិបាលថៃ។ យ៉ាងណាមិញ ត្រឹមពាក់កណ្ដាលនៃសំណើប៉ុណ្ណោះ ទទួលបានការយល់ព្រមសំណើនេះ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP ។
ទាក់ទិនរឿងចែកប្រាក់ជូនពលរដ្ឋរងគ្រោះ នាយករដ្ឋមន្ត្រីថៃ ប្រាយុទ្ធ ចន្ទអូចា បានប្រកាសថា រដ្ឋាភិបាលលោកមានលទ្ធភាពផ្ដល់ប្រាក់ជូនពួកគេត្រឹម៥០០០បាត (១៥៤ដុល្លារ) មួយខែប៉ុណ្ណោះ។ ក្នុងសប្តាហ៍នេះ រដ្ឋាភិបាលថៃ ក៏យល់ព្រមបញ្ចុះតម្លៃអគ្គិសនីពីខែមីនា ដល់ឧសភា ហើយនឹងអនុវត្តនៅទូទាំងប្រទេស ដែលអាចកាត់រហូតដល់៥០ភាគរយ។
ទោះមានការយឺតយ៉ាវ និងចន្លោះប្រហោងពីសំណាក់រដ្ឋាភិបាលបែបនេះ ស្មារតីស្មោះចិត្តនិយមរបស់ពលរដ្ឋថៃ បានចូលមកបំពេញ។ នោះគឺការចែកម្ហូបអាហារជូនដល់អ្នកខ្វះខាតទ័លក្រ។
«រដ្ឋាភិបាលពុំបានជួយអ្វីខ្ញុំឡើយ»។ បុរសថៃវ័យ៤៦ឆ្នាំម្នាក់ ឈ្មោះ Chare Kunwong ដែលអ្នកចម្អិនម្ហូបអាហារដល់អ្នកទេសចរ ហើយចំណូលលោកត្រូវរីងស្ងួតដោយសារ COVID-19 សម្លាប់វិស័យទេសចរណ៍ថៃ។ បុរសរូបនេះបានឈរតម្រង់ជួរក្រោយមនុស្សរាប់រយនាក់ កាលពីថ្ងៃពុធ ទី២២ ខែមេសា នៅក្រុងបាងកក រង់ចាំទទួលអាហារដែលគេបរិច្ឆាគ ដូចជា អង្ករ មី និងទឹកដោះគោជាដើម។ លោកប្រាប់ទីភ្នាក់ងារព័ត៌មាន AFP ថា ប្រសិនលោករង់ចាំជំនួយរបស់រដ្ឋាភិបាល ម្ល៉ោះពេលនេះ លោកដាច់ពោះស្លាប់បាត់ហើយ។
សូមបញ្ជាក់ថា គិតត្រឹមថ្ងៃទី២៣ មេសា ប្រទេសថៃ មានករណីឆ្លងCOVID-19សរុប២៨៣៩ករណី ក្នុងនោះអ្នកជំងឺ២៤៣០នាក់ជាសះស្បើយ ខណៈអ្នកស្លាប់មាន៥០នាក់។ នេះបើតាមទិន្នន័យរបស់វេបសាយ worldometers.info ដែលតាមដានតួលេខCOVID-19 ទូទាំងពិភពលោក៕
សូមទស្សនាវីដេអូរបស់ទីភ្នាក់ងារព័ត៌មាន AFP៖
Tag:
ថៃ
COVID-19
© រក្សាសិទ្ធិដោយ thmeythmey.com
