ចិន​ប្រកាស​ឲ្យ WHO ៣០​លាន​ដុល្លារ ក្រោយ​អាមេរិក​ផ្អាក​ជំនួយ​
COVID-19
អន្តរជាតិ
ចិន​ប្រកាស​ឲ្យ WHO ៣០​លាន​ដុល្លារ ក្រោយ​អាមេរិក​ផ្អាក​ជំនួយ​
23, Apr 2020 , 11:29 pm        
រូបភាព
ប្រមុខWHO ចាប់ដៃជាមួយប្រធានាធិបីចិន នាពេលកន្លងទៅ (AFP)
ប្រមុខWHO ចាប់ដៃជាមួយប្រធានាធិបីចិន នាពេលកន្លងទៅ (AFP)
​រដ្ឋាភិបាល​ចិន តាមរយៈ​ក្រសួងការបរទេស បានប្រកាស​ផ្ដល់​ថវិកា​៣០​លាន​ដុល្លារ​ទៀត​ទៅកាន់​អង្គការ​សុខភាព​ពិភពលោក (WHO) ក្នុង​គោលដៅ​ជួយ​ប្រយុទ្ធប្រឆាំង​ជំងឺ​រាតត្បាត​សាកល COVID-19 ។ ការប្រកាស​ផ្ដល់ជំនួយ​បែបនេះ​នេះ ធ្វើឡើង​ប៉ុន្មាន​ថ្ងៃ​ប៉ុណ្ណោះ​បន្ទាប់ពី​ក្រុង​វ៉ាស៊ីនតោន​ប្រកាស​ផ្អាក​ផ្ដល់​វិភាគទាន​សម្រាប់​អង្គការ​អន្តរជាតិ​មួយ​នេះ​។​

 
«​ចិន បានសម្រេច​ចិត្ត​បរិច្ចាគ​ប្រាក់​៣០​ដុល្លារ​ផ្សេងទៀត​ជូន​ដល់ WHO ដើម្បី​គាំទ្រ​ការប្រយុទ្ធ​ជា​លក្ខណៈ​សាកល​ប្រឆាំង​COVID-19 និង​ពង្រឹង​ប្រព័ន្ធ​សុខាភិបាល​របស់​ប្រទេស​កំពុងអភិវឌ្ឍន៍​។ អ្នកនាំពាក្យ​ក្រសួងការបរទេស​ចិន Geng Shuang បញ្ជាក់​បែបនេះ​ក្នុង​សន្និសីទ​ព័ត៌មាន នៅ​ថ្ងៃទី​២៣ ខែមេសា ដោយ​បន្ថែមថា នេះ​គឺ​លុយ​ជំនួយ​បន្ថែម​ពីលើ​ការបរិច្ចាគ​លើក​មុន​ចំនួន ២០​លាន​ដុល្លារ​។ 
 
​តាម​ការចុះផ្សាយ​របស់​ទីភ្នាក់ងារ​ព័ត៌មាន AFP លោកអ្នក​នាំពាក្យ Geng បញ្ជាក់ទៀតថា ការផ្ដល់​វិភាគទាន​របស់​ចិន​ដល់​ភ្នាក់ងារ​អង្គការសហប្រជាជាតិ​នេះ ឆ្លុះបញ្ចាំង​ពី​ការគាំទ្រ​និង​ទុកចិត្ត​ពី​សំណាក់​រដ្ឋាភិបាល​ចិន​និង​ពលរដ្ឋ​ចិន​សម្រាប់​អង្គការ​សុខភាព​ពិភពលោក​។​
 
​សហរដ្ឋអាមេរិក ដែល​អ្នកផ្ដល់​វិភាគទាន​ធំ​បំផុត​របស់​WHO កាលពី​សប្តាហ៍​មុន បាន​ចោទប្រកាន់​WHO​ថា​ចាត់ចែង​វិបត្តិ​COVID-19​ពុំ​ត្រឹមត្រូវ ដោយ​ថា​អង្គការ​នេះ​លម្អៀង​ទៅកាន់​ចិន​។ ក្នុង​សេចក្តីប្រកាស​ផ្អាក​ជំនួយ​ដល់​WHO ប្រធានាធិបតី​អាមេរិក ដូ​ណា​ល់ ត្រាំ បាន​ចោទ​WHO​ព្យាយាម​បិទបាំង​ភាព​ធ្ងន់ធ្ងរ​នៃ​ការរីក​រាលដាល COVID-19 ក្នុងប្រទេស​ចិន មុនពេល​វា​រីក​សាយភាយ​។ លោក​ត្រាំ​អះអាងថា អាមេរិក​ផ្ដល់ជំនួយ​ចន្លោះ​ពី​៤០០-៥០០​លាន​ដុល្លារ​រាល់​ឆ្នាំ​ដល់​WHO ខណៈ​ចិន​ផ្ដល់​យ៉ាងតិច​៤០​លាន​ដុល្លារ​ប្រចាំឆ្នាំ​៕ 

Tag:
 ចិន​
  សហរដ្ឋអាមេរិក​
  WHO
  COVID-19
© រក្សាសិទ្ធិដោយ thmeythmey.com