COVID-19
កីឡាអន្តរជាតិ
អន្តរជាតិ
×![]()
ដោយ: ទេព ពិទូរ្យ
ព្រឹត្តិការណ៍កីឡាបាល់ទាត់ត្រូវបានផ្អាកបណ្តោះអាសន្ននៅពាសពេញពិភពលោក ដោយសារការឆ្លងរាលដាលនៃជំងឺ COVID-19។ ប៉ុន្តែពេលនេះក្របខណ្ឌ Bundesliga បានបង្ហាញបំណងចង់ត្រឡប់ចូលទៅកាន់ការប្រកួតវិញ ដោយមិនអនុញ្ញាតឲ្យមានអ្នកគាំទ្រ ចាប់ពីថ្ងៃទី៩ ខែឧសភា។
អាល្លឺម៉ង់ ជាប្រទេសមួយដែលទទួលរងការឆ្លងជំងឺរលាកសួតបង្កដោយកូរ៉ូណាវីរុសប្រភេទថ្មីច្រើនជាងគេលើលោកលំដាប់ថ្នាក់ទី៥ បន្ទាប់ពីអាមេរិក អេស្ប៉ាញ អ៊ីតាលី និងបារាំង ហើយក្នុងនោះអ្នកស្លាប់មានចំនួនជាង៥ពាន់នាក់ផងដែរ។
បើទោះកំពុងប្រឈមនឹងជំងឺដ៏កាចសាហាវនេះក្តី សហព័ន្ធកីឡាបាល់ទាត់អាល្លឺម៉ង់ (DFL) ដែលទទួលខុសត្រូវលើដំណើរការការប្រកួតក្នុងក្របខណ្ឌលីគកំពូល Bundesliga និងលីគទីពីរអាល្លឺម៉ង់ បានប្តេជ្ញាថានឹងបញ្ចប់រដូវកាលដែលនៅសេះសល់។ ក្លិបអាជីពចំនួន ៣៦ របស់ DFL នឹងជួបគ្នានៅថ្ងៃទី២៣ ខែមេសានេះ ដើម្បីពិភាក្សាពីការចាប់ផ្តើមរដូវកាលឡើងវិញចាប់ពីខែក្រោយទៅ។
ស្របពេលមានព័ត៌មានលេចលឺបែបនេះ ស្ថាប័នគ្រប់គ្រងកីឡាបាល់ទាត់អាល្លឺម៉ង់បានប្រឈមមុខនឹងសំណួរមួយចំនួនមុនពេលពួកគេទទួលបានភ្លើងបៃតងដើម្បីចាប់ផ្តើមការប្រកួតប្រជែងឡើងវិញនៅក្នុងប្រទេសនេះ។
យ៉ាងណាក៏ដោយ DFL បានលើកហេតុផលថា ការប្រជែងពាននៅរដូវកាល ២០១៩-២០ នេះដែលគ្រោងបញ្ចប់នៅថ្ងៃទី៣០ ខែមិថុនា នឹងត្រូវបញ្ចប់ដោយជោគជ័យទោះស្ថិតក្នុងស្ថានភាពលំបាក ដើម្បីធានាការទូទាត់ប្រាក់ដែលទទួលបានពីការផ្សាយតាមទូរទស្សន៍ដែលមានតម្លៃប្រហែល ៣០០ លានផោន (៣៦៩លានដុល្លារអាមេរិក)។
ប្រសិនបើ Bundesliga ពិតជាអាចត្រឡប់ទៅកាន់ការប្រកួតវិញនៅខែឧសភាមែន នោះលីគកំពូលអាល្លឺម៉ង់មួយនេះនឹងក្លាយជាលីគបាល់ទាត់ដំបូងគេនៅអឺរ៉ុបដែលចាប់ផ្តើមមុនគេ ក្នុងអំឡុងពេលជំងឺរាតត្បាតសកលនេះ៕
Tag:
COVID-19
Bundesliga
© រក្សាសិទ្ធិដោយ thmeythmey.com
