COVID-19
អន្តរជាតិ
ជប៉ុន៖ អ្នកផ្ទុក COVID-19 ក្នុងនាវា Costa Atlantica កើនដល់ ៩១ករណី នាវាទេសចរណ៍ Costa Atlantica។ រូបភាព៖ AFP
× មន្ត្រីសុខាភិបាលជប៉ុន នាថ្ងៃទី២៤ ខែមេសា បានអះអាងថា ចំនួនអ្នកផ្ទុកជំងឺរលាកសួត ដែលបង្កដោយកូរ៉ូណាវីរុស (COVID-19) នៅលើនាវាទេសចរណ៍ Costa Atlantica បានកើនដល់ចំនួន ៩១ករណីហើយ។ បញ្ហានេះ ទាមទារឲ្យជប៉ុន ខិតខំរកដំណោះស្រាយថ្មី ដើម្បីបញ្ចៀសបញ្ហាមួយចំនួន ដែលធ្លាប់កើតមានលើនាវាទេសចរណ៍ Diamond Princess។
គិតមកត្រឹមពេលនេះ ចំនួនបុគ្គលិកបម្រើការលើនាវា Costa Atlantica ដែលត្រូវបានគេរកឃើញថាមានផ្ទុក COVID-19 បានកើនឡើងដល់ចំនួន ៩១ករណី។ ដើម្បីបញ្ចៀសបញ្ហាកុំឲ្យកើតមានដដែលនៅលើនាវាទេសចរណ៍ ជប៉ុនបានព្យាយាមរកមធ្យោបាយមួយចំនួន។
កន្លងមកចំណាត់ការរបស់ជប៉ុនទៅលើនាវាទេសចរណ៍ Diamond Princess ត្រូវបានទទួលរងការរិះគន់យ៉ាងខ្លាំងពីសំណាក់បរទេស ដោយជប៉ុនបានសម្រេចចិត្តដាក់ចត្តាឡីស័កអ្នកដំណើរជាច្រើនថ្ងៃនៅក្នុងនាវា ដែលជាហេតុធ្វើឲ្យមនុស្សច្រើនជាង ៧០០នាក់បានឆ្លង COVID-19 ជាបន្តបន្ទាប់។
យ៉ាងណាក្តី ចំណាត់ការលើកនេះ គឺខុសពីលើកមុខ ព្រោះជប៉ុនមិនចង់បាក់មុខជាលើកទីពីរ។ បើតាមការចុះផ្សាយរបស់ទីភ្នាក់ងារព័ត៌មាន Kyodo នាថ្ងៃទី២៤ ខែមេសា រដ្ឋមន្ត្រីសុខាភិបាលជប៉ុន លោក Katsunobu Kato បានលើកឡើងថា អ្នក ដែលធ្វើតេស្តអវិជ្ជមាន នឹងត្រូវគេជម្លៀសចេញពីនាវា។ ប៉ុន្តែលោក មិនទាន់បានបញ្ជាក់ច្បាស់លាស់ទេថា អ្នកដែលត្រូវបានគេជម្លៀសចេញពីនាវាទាំងនោះ នឹងត្រូវយកទៅដាក់នៅទីណា។ យ៉ាងណាក្តី ការលើកឡើងរបស់លោករដ្ឋមន្ត្រីបែបនេះ ត្រូវបានមន្ត្រីក្រុង ណាកាសាគី (Nagasaki) គាំទ្រយ៉ាងខ្លាំង។
ពាក់ព័ន្ធនឹងបញ្ហានេះ មន្ត្រីក្រុងណាកាសាគី បានលើកឡើងនៅក្នុងសន្និសីទសារព័ត៌មានមួយថា ខ្លួនកំពុងដុតដៃដុតជើង ធ្វើកិច្ចការមួយចំនួន ដើម្បីជម្លៀសអ្នកបម្រើការលើនាវាឲ្យកាន់តែឆាប់រហ័ស។ ក្នុងសន្និសីទដដែលនេះ មន្ត្រីខេត្ត បានបញ្ជាក់ថា កិច្ចការនេះ មិនដឹងរួចរាល់នៅពេលណាឡើយ ប៉ុន្តែអាជ្ញាធរ ថ្នាក់តំបន់ កំពុងធ្វើការជិតស្និទ្ធជាមួយរដ្ឋាភិបាលថ្នាក់កណ្តាល។ ពេលនេះអាជ្ញាធរ កំពុងពន្លឿនការធ្វើតេស្តរកមើលCOVID-19 លើបុគ្គលិកចំនួន ២៩០នាក់ ឲ្យបានរួចរាល់ ។
នាវា Costa Atlantica នេះ គឺជានាវាទេសចរណ៍របស់អ៊ីតាលី ដែលមានតែបុគ្គលិកបម្រើការចំនួន ៦២៣នាក់ បានចូលចតនៅកន្លែងជួសជុសនាវាមួយ ក្នុងទីក្រុងណាកាសាគី (Nagasaki) តាំងពីខែកុម្ភៈមកម្ល៉េះ ដោយក្រុមហ៊ុន Mitsubishi។ មុនដំបូង នាវាទេសចរណ៍នេះ ត្រូវគេគ្រោងយកទៅជួសជុលនៅក្នុងប្រទេសចិនទេ ប៉ុន្តែដោយសារការរីកសាយភាយនៃ COVID-19 ទើបគេជួសជុលនៅជប៉ុនវិញ។
គិតមកត្រឹមពេលនេះ ជប៉ុនមានករណីឆ្លងជំងឺរលាកសួត ដែលបង្កដោយកូរ៉ូណាវីរុសប្រភេទថ្មី សរុបចំនួនជាង ១២០០០ករណី អ្នកស្លាប់ចំនួន ៣២៨ករណី និងអ្នកជាសះស្បើយចំនួន ១៤៩៤ករណី៕
© រក្សាសិទ្ធិដោយ thmeythmey.com