ជាតិ
សង្គមជាតិ
អ្នកលក់អនឡាញ ថៃ ស្រីនាង ជាប់ពន្ធនាគារ១១ថ្ងៃទៀត នឹងត្រូវដោះលែងវិញ
× សាលាដំបូងរាជធានីភ្នំពេញ សម្រេចដាក់ទោសអ្នកនាង វ៉ាន់ រចនា ដែលគេស្គាល់តាមហ្វេសប៊ុកថា ថៃ ស្រីនាង ឲ្យជាប់ពន្ធនាគារ៦ខែ តែអនុវត្តទោសក្នុងពន្ធនាគារ ត្រឹម២ខែ១៥ថ្ងៃ ហើយទោសនៅសល់ ត្រូវព្យួរ។ សាលារាជធានីភ្នំពេញ បានបើកសវនាការនិងចេញដីកាសម្រេចបែបនេះ នៅព្រឹកថ្ងៃទី២៤ ខែមេសា ឆ្នាំ២០២០។
លោក អ៊ី រិន្ទ ប្រធានលេខាធិការដ្ឋានរដ្ឋបាលនៃសាលាដំបូងរាជធានីភ្នំពេញ មិនផ្តល់ព័ត៌មានបន្ថែមឡើយពីករណីអ្នកនាង ថៃ ស្រីនាង ដោយលោក រុញឲ្យទៅសួរលោក សួស វិទ្យារ៉ាឌី ដែលជាអនុប្រធានរបស់លោក។ ប៉ុន្តែ លោក វិទ្យារ៉ាឌី ប្រាប់សារព័ត៌មានថ្មីៗថា លោក មិនទាន់ទទួលបានព័ត៌មាននេះទេ។
អ្នកនាង ថៃ ស្រីនាង ត្រូវបានឃាត់ខ្លួននិងយកទៅឃុំក្នុងពន្ធនាគារជាបណ្តោះអាសន្ន កាលពីថ្ងៃ២១ ខែកុម្ភៈ ឆ្នាំ២០២០ ដោយសមត្ថកិច្ច អះអាងថា អ្នកនាង នៅតែបន្តស្លៀកពាក់សិកស៊ីហួស ហើយផ្សាយលក់ផលិតផលតាមបណ្តាញសង្គម។ អ្នកនាង រងពីបទបង្ហោះរូបភាពធ្វើឲ្យប៉ះពាល់ដល់តម្លៃសង្គម តាមមាត្រា៣៨ និង មាត្រា៣៩ នៃច្បាប់ស្ដីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ។
គិតពីថ្ងៃ២១ ខែកុម្ភៈ មកដល់ថ្ងៃទី២៤ ខែមេសានេះ អ្នកនាង ជាប់ឃុំបាន៦៤ថ្ងៃហើយ ដូច្នេះ នៅសល់១១ថ្ងៃទៀត នឹងគ្រប់រយៈពេល២ខែ១៥ថ្ងៃ (៧៥ថ្ងៃ) ហើយអ្នកនាង នឹងត្រូវចេញពីពន្ធនាគារ។
មាត្រា៣៨ ចែងថា រូបភាព និង សម្ភារអាសអាភាស ជាសម្ភារដែលអាចមើលឃើញនឹងភ្នែកដូចជា រូបថត ខ្សែវីដេអូ រួមទាំងសម្ភារអេទ្បិចត្រូនិច ដែលពិពណ៌នាអំពើកេរភេទ ឬ ភាពអាសអាភាស ប្រហាក់ប្រហែលផ្សេងទៀតដែលធ្វើឲ្យរំភើប ឬ រំជួលដល់ចំណង់ផ្លូវភេទ។
ចំណែកមាត្រា៣៩ សរសេរថា ជនណាចែកចាយ លក់ ជួល ដាក់តាំង បញ្ចាំង ឬ បង្ហាញនៅទីសាធារណៈនូវរូបភាពនិងសម្ភារអាសអាភាស ត្រូវផ្ដន្ទាទោសដាក់ពន្ធនាគារពី៧ថ្ងៃ ដល់ ១ខែនិង ពិន័យជាប្រាក់ពី១សែនរៀល ដល់ ២សែនរៀល។
មាត្រា៣៩ បន្តថា ជនណាកាន់កាប់ ដឹកជញ្ជូន នាំចូល ឬ នាំចេញនូវរូបភាព និងសម្ភារអាសអាភាសក្នុងគោលដៅយកទៅប្រើប្រាស់នៅក្នុងការ ប្រព្រឹត្តបទល្មើសខាងលើ ត្រូវផ្ដន្ទាទោសដូចគ្នានឹងកថាខណ្ឌទី១ ខាងលើ។
មាត្រា៣៩ដដែល បន្ថែមថា ជនណាផលិតរូបភាព និងសម្ភារអាសអាភាសក្នុងគោលដៅយកទៅប្រើប្រាស់នៅក្នុងការប្រព្រឹត្តបទល្មើសណាមួយ ដូចមានចែងនៅក្នុងកថាខណ្ឌទី១ និងទី ២ នៃមាត្រានេះ ត្រូវផ្ដន្ទាទោសដាក់ពន្ធនាគារពី១ខែ ដល់ ១ឆ្នាំ និង ពិន័យជាប្រាក់ពី ២សែនរៀល ដល់ ២លានរៀល៕
© រក្សាសិទ្ធិដោយ thmeythmey.com