សម្ដេច ទៀ បាញ់៖ កងទ័ពមួកខៀវកម្ពុជានៅម៉ាលី ៣នាក់ ឆ្លងជំងឺកូវីដ១៩

COVID-19

ជាតិ

សម្ដេច ទៀ បាញ់៖ កងទ័ពមួកខៀវកម្ពុជានៅម៉ាលី ៣នាក់ ឆ្លងជំងឺកូវីដ១៩

24, Apr 2020 , 4:31 pm

រូបភាព

ដោយ: រំដួល ចិត្រា (Romdoul Chetra)

ភ្នំពេញ៖ កងទ័ពមួកខៀវកម្ពុជា ចំនួន៣រូប ដែលកំពុងបំពេញបេសកកម្មនៅក្នុងប្រទេសម៉ាលី បានឆ្លងជំងឺកូវីដ-១៩ ។ នេះបើតាមសម្ដេច ទៀ បាញ់ រដ្ឋមន្ត្រីក្រសួងការពារជាតិ ដែលបានប្រាប់សារព័ត៌មានថ្មីៗ នៅថ្ងៃទី២៤ មេសា។

សម្ដេច ទៀ បាញ់ បានបញ្ជាក់ថា សុខភាពកងទ័ពមួកខៀវកម្ពុជាទាំង៣រូបនេះ មិនទាន់មានសភាពធ្ងន់ធ្ងរនៅឡើយទេ ខណៈដែលពួកគេត្រូវបានបញ្ជូនទៅសម្រាកនៅមន្ទីរពេទ្យ។ រដ្ឋមន្ត្រីការពារជាតិរូបនេះ បានបញ្ជាក់ដូច្នេះថា៖«បាទ! ត្រឹមត្រូវហើយ (មានកងទ័ព៣នាក់ឆ្លងកូវីដ) ព្រោះកន្លែងហ្នឹង(ប្រទេសម៉ាលី) គឺមានជំងឺឆ្លង។ ដូច្នេះគឺបណ្ដាកម្លាំងដែលប្រតិបត្តិការនៅហ្នឹង មិនតែកងទ័ពកម្ពុជា កម្លាំងផ្សេងនៅកន្លែងហ្នឹងក៏មានការឆ្លងដែរ»។

សម្ដេច ទៀ បាញ់ កំពុងតាមដានសភាពកងកម្លាំងរក្សាសន្តិភាពកម្ពុជានៅប្រទេសម៉ាលី។ នៅពេលសួរថាតើកម្ពុជានឹងជួយប្រទេសម៉ាលី និងកងទ័ពកម្ពុជា ដែលកំពុងប្រឈមមុខនឹងការឆ្លងនេះដែរទេ? សម្ដេច ទៀ បាញ់ បានបញ្ជាក់ថា កម្ពុជាបានបញ្ជូនសម្ភារមួយចំនួន ដល់ប្រទេសម៉ាលី ដើម្បីការពារ និងប្រយុទ្ធប្រឆាំងនៃការរីករាលដាលជំងឺកូវីដ១៩នេះហើយ។

«យើងបាន(ជួយប្រទេសម៉ាលី)ធ្វើហើយ មិនទើបតែធ្វើទេ យើងបានត្រៀមតាំងពីមុនដំបូង បន្ទាប់ពីរដ្ឋាភិបាលយើងប្រកាសប្រយុទ្ធប្រឆាំងកូវីដ១៩ ក៏យើងមិនមើលរំលងកងកម្លាំងរបស់យើង ដែលនៅឆ្ងាយនោះទេ ជាពិសេសកម្លាំងយោធារបស់យើង គឺយើងយកចិត្តទុកដាក់ យើងបញ្ជូនតាំងពីម៉ាស់ តាំងពីអាល់កុល ទឹកលាងដៃ ហើយយើងក៏បានណែនាំឱ្យពួកគេថែរក្សាសុខមាលភាពរៀងៗខ្លួនផងដែរ»។ នេះជាការបញ្ជាក់របស់សម្ដេច ទៀ បាញ់។

បើតាមរដ្ឋមន្ត្រីការពារជាតិរូបនេះ កងទ័ពមួកខៀវកម្ពុជានៅប្រទេសម៉ាលី មានចំនួន២កង ជាង១០០នាក់ ហើយពួកគេដទៃទៀត ក្រៅពីអ្នកទាំង៣រូប ឆ្លងជំងឺកូវីដ១៩នេះ ក៏ត្រូវបានយកសំណាកទៅពិនិត្យរកជំងឺកូវីដ១៩ដែរ។

បច្ចុប្បន្នកងកម្លាំងរក្សាសន្តិភាពកម្ពុជា ជាង៨០០នាក់ កំពុងបំពេញបេសកម្មនៅប្រទេសចំនួន៨គឺ ស៊ូដង់ ស៊ូដង់ខាងត្បូង លីបង់ ស៊ីប ស៊ីរី ឆាដ ម៉ាលី និងសាធារណរដ្ឋអាហ្វ្រិកកណ្តាល។ សូមបញ្ជាក់ថា ចាប់តាំងពីឆ្នាំ២០០៦ មក កម្ពុជា បានបញ្ជូនកងកម្លាំងរក្សាសន្តិភាពជាង៦ពាន់នាក់ហើយ ទៅបំពេញបេសកកម្មក្នុងប្រទេសទាំង៨នេះ ក្រោមឆត្រអង្គការសហប្រជាជាតិ៕