COVID-19
អន្តរជាតិ
លោក ឌូទើតេ គំរាមប្រើច្បាប់អាជ្ញាសឹកលើក្រុមឧទ្ទាម បើជំនួយ COVID-19 រាំងស្ទះ
លោកប្រធានាធិបតិហ្វីលិពីន រ៉ូឌ្រីហ្គោ ឌូទើតេ (ABS-CBN news)
×![]()
ប្រធានាធិបតីហ្វីលីពីន លោក រ៉ូឌ្រីហ្គោ ឌូទើតេ បានគំរាមប្រកាសច្បាប់អាជ្ញាសឹក ប្រសិនបើក្រុមបះបោរកុម្មុយនីស្តបង្កការរំខានដល់លំហូរសម្ភារជំនួយសម្រាប់ពលរដ្ឋហ្វីលីពីនរងគ្រោះដោយសារការបិទប្រទេសព្រោះ COVID-19 ។ ប្រមុខរដ្ឋាភិបាលរូបនេះ សង្កត់ធ្ងន់ថា លោកបានប្រាប់ឲ្យកងកម្លាំងយោធាត្រៀមលក្ខណៈរួចរាល់ហើយ។ ទន្ទឹមនេះ លោក ឌូទើតេ ក៏សម្រេចប្រកាសពន្យារការបិទក្រុងម៉ានីលរហូតដល់ថ្ងៃទី១៥ ខែឧសភា។
«ឥឡូវ ខ្ញុំព្រមានអ្នករាល់គ្នា។ ខ្ញុំបានជូនដំណឹងដល់កងកម្លាំងយោធា និងប៉ូលិស។ ខ្ញុំប្រហែលជាប្រកាសច្បាប់អាជ្ញាសឹក ហើយវានឹងគ្មានការត្រលប់ក្រោយនោះឡើយ»។ លោកប្រធានាធិបតី រ៉ូឌ្រីហ្គោ ឌូទើតេ បញ្ជាក់បែបនេះ នៅថ្ងៃទី២៤ ខែមេសា នាដើមជំនួបស្តីពីការពន្យារពេលចំណាត់ការទប់ស្កាត់COVID-19 ដែលចាក់ផ្សាយលើកញ្ចក់ទូរទស្សន៍។
មេដឹកនាំវ័យ៧៥រូបនេះ បញ្ជាក់ទៀតថា លោកគ្រាន់តែសុំឲ្យគ្រប់គ្នាមានវិន័យល្អជាងនេះ ហើយបើមិនដូច្នោះទេនោះ យោធា និងប៉ូលិសនឹងចូលចាត់ចែងហើយ។ តាមការចុះផ្សាយរបស់ទីភ្នាក់ងារព័ត៌មាន Reuters លោក ឌូទើតេ សង្កត់ធ្ងន់ថា កងកម្លាំងប៉ូលិសនិងយោធា នឹងអនុវត្តចំណាត់ការគម្លាតសុវត្ថិភាពកាន់តែតឹងតែង ហើយវាគឺដូចជាច្បាប់អាជ្ញាសឹក។
មែនទែនទៅ លោក ឌូទើតេ ពុំមានទំនាក់ទំនងល្អឡើយជាមួយកងទ័ពរបស់ប្រជាជនថ្មី ដែលជាពួកកុម្មុយនីស្ត។ ភាពតានតឹងគឺកាន់តែធ្ងន់ធ្ងរក្រោយពីដំណើរការសន្តិភាពរវាងរដ្ឋាភិបាលហ្វីលីពីន និងក្រុមដែលរដ្ឋាភិបាលចាត់ទុកជា «ក្រុមឧទ្ទាម» នេះ បន្តបរាជ័យ ចាប់តាំងពីលោក ឌូទើតេ ចូលកាន់តំណែងជាប្រធានាធិបតីមក។
នៅថ្ងៃTI២៣ មេសា ប្រទេសហ្វីលីពីន បានរាយការណ៍ករណីស្លាប់ដោយសារ COVID-19 ចំនួន១៦ករណីថ្មី និងករណីឆ្លង ២១៧នាក់បន្ថែម ដែលធ្វើឲ្យអ្នកស្លាប់សរុបឡើងដល់៤៦២នាក់ និងការឆ្លងឡើងដល់ជិត៧ពាន់ករណី។
យ៉ាងណាមិញ នៅថ្ងៃសុក្រ ទី២៤ មេសាដដែល លោកប្រធានាធិបតី ឌូទើតេ បានសម្រេចប្រកាសពន្យារការបិទក្រុងម៉ានីលដែលមានប្រជាជន១៣លាននាក់ រហូតដល់ថ្ងៃទី១៥ ខែឧសភា។ ទន្ទឹមនេះ បើតាមអ្នកនាំពាក្យប្រធានាធិបតីហ្វីលីពីន លោក Harry Roque លោក ឌូទើតេ ក៏បានសម្រេចផ្ដល់ប្រាក់រង្វាន់លើកទឹកចិត្តជិត១លានដុល្លារសម្រាប់ពលរដ្ឋហ្វីលីពីនរូបណាដែលអាចបង្កើតវ៉ាក់សាំង COVID-19 បានជោគជ័យ៕
Tag:
ហ្វីលីពីន
រ៉ូឌ្រីហ្គោ ឌូទើតេ
COVID-19
© រក្សាសិទ្ធិដោយ thmeythmey.com
