រៀនកម្រិតវិទ្យាល័យ យុវជន មូល ចាន់នីន អាចប្រើជំនាញគំនូរ រកប្រាក់ផ្គត់ផ្គង់ការសិក្សា និងគ្រួសារ

ជាតិ

សង្គមជាតិ

រៀនកម្រិតវិទ្យាល័យ យុវជន មូល ចាន់នីន អាចប្រើជំនាញគំនូរ រកប្រាក់ផ្គត់ផ្គង់ការសិក្សា និងគ្រួសារ

25, Apr 2020 , 4:54 pm

រូបភាព

ដោយ: ប៉ូ សាគុន

រៀនឯកទេសគំនូរបុរាណឆ្នាំទី៦ នៅសាលាមធ្យមវិចិត្រសិល្បៈ យុវជន មូល ចាន់នីន អាចរកចំណូលបានចន្លោះ១០០ដុល្លារអាមេរិក ដល់៣០០ដុលា្លរអាមេរិកក្នុងមួយខែ ពីជំនាញគូរគំនូររបស់ខ្លួន។ ប្រាក់ទាំងនោះ ចាន់នីន អាចដោះស្រាយទិញសម្ភារសិក្សា និងទុកចាយវាយខ្លះផង ដោយអាចជួយសម្រាលបន្ទុកគ្រួសារបានមួយចំនួន។

មានអាយុ២២ឆ្នាំលោក មូល ចាន់នីន ទើបតែរៀនថ្នាក់ទី១២ និងរៀនឆ្នាំទី៦ឯកទេសគំនូរបុរាណ នៅសាលាមធ្យមវិចិត្រសិល្បៈ។ ថ្វីដ្បិត ចាន់នីន មិនទាន់បញ្ចប់ថ្នាក់វិទ្យាល័យក្ដី តែលោកអាចរកប្រាក់មកផ្គត់ផ្គង់ការរៀនសូត្រដោយខ្លួនឯងបានខ្លះហើយ។

មានស្រុកកំណើតនៅខេត្តកំពង់ធំ ចាន់នីន ដឹងច្បាស់ថាខ្លួនស្រឡាញ់ការគូរតាំងពីអាយុប្រហែល៦ឆ្នាំ។ រាល់ពេលបានចូលព្រះវិហារ បុរសសម្ដីមួយៗ ហើយមានរាងខ្ពស់ស្រឡះរូបនេះ តែងតែរៀនគូររូបតាមគំនូរនៅលើជញ្ចាំងព្រះវិហារ។ ក្រោយពីបានរកឃើញសាលាមធ្យមវិចិត្រសិល្បៈ ដែលជាគ្រឹះស្ថានបណ្ដុះបណ្ដាលគ្រឹះសិល្បៈរបស់រដ្ឋដ៏ធំតែមួយគត់នៅកម្ពុជា ដែលមានទីតាំងនៅរាជធានីភ្នំពេញ ចាន់នីន បានចាប់យកឯកទេសគំនូរបុរាណ។

តាមពិតទៅជំនាញគំនូរបុរាណមួយនេះ ក៏មិនសូវមានទីផ្សារការងារដូចគ្នានឹងជំនាញបុរាណមួយចំនួនទៀតដែរ ប៉ុន្តែបុរសសម្បុរស្រអែម ចាន់នីន នៅតែជ្រើសរើសយក ព្រោះតែក្ដីស្រឡាញ់ ហើយអ្វីដែលសំខាន់ជាងនេះទៅទៀតនេះ គឺការចង់ថែរក្សាទម្រង់សិល្បៈគំនូរបុរាណ។

ចាន់នីន បញ្ជាក់បន្ថែមដូច្នេះ៖«ខ្ញុំចាប់អារម្មណ៍លើគំនូរបុរាណ ព្រោះតែវាមានភាពលំអិតលើក្បាច់ និងគ្រប់ផ្នែកទាំងអស់។ ជំនាញនេះពេលគូរត្រូវផ្ដោតអារម្មណ៍លើតួអង្គទាំងអស់ ឧទាហរណ៍ ដូចជាគូររូបយក្ស យើងត្រូវស្រម័យថាយក្សនោះកាចយ៉ាងម៉េច ទើបយើងអាចគូរចេញមកពិតជាកាចមែន។ ខ្ញុំឃើញថាឥឡូវនេះ មិនសូវមានអ្នករៀនគំនូរបុរាណទេ ដូច្នេះខ្ញុំចង់ថែរក្សាសិល្បៈមួយនេះ។ ខ្ញុំចង់ឱ្យអ្នកដទៃមករៀនជំនាញនេះ ព្រោះវាជួយឱ្យយើងមានចិត្តអំណត់»។

បើទោះបីជាលោក មូល ចាន់នីន ចាប់យកឯកទេសគំនូរបុរាណក៏ពិតមែន ប៉ុន្តែប្រាក់ចំណូលដែលលោករកបានជារៀងរាល់ខែនោះ គឺបានដោយសារការគូរគំនូរដូច(គំនូរគូរចេញពីរូបថត)ទៅវិញទេ។ ហើយហេតុដែលនាំឱ្យបុរសមកពីខេត្តរូបនេះ មិនហ៊ានទទួលគូរគំនូរបុរាណនោះគឺ៖«ខ្ញុំជាប់រវល់រៀនច្រើន ដូច្នេះខ្ញុំមិនហ៊ានទទួលគូរគំនូរបុរាណទេ ព្រោះគំនូរនេះត្រូវការពេលគូរយូរ ម្យ៉ាងចំណេះដឹងខ្ញុំនៅមានកម្រិតផង។ ម្យ៉ាងទៀតគំនូរបុរាណក៏មិនសូវមានអ្នកចង់គូរប៉ុន្មានដែរ គឺប្រហែលមកពីវាថ្លៃ។ ខ្ញុំហ៊ានទទួលគូរឱ្យគេតែរូបតូចៗ ហើយនៅពេលដែលខ្ញុំទំនេរប៉ុណ្ណោះ។ គំនូរដែលគូរចេញពីរូបថត តម្លៃចាប់ពី២០ដុល្លារ ដល់៣៥ដុល្លារ អាស្រ័យលើការផាត់ពណ៌ឬក៏អត់ ហើយនឹងទៅលើទំហំដែរ។ បើគំនូរបុរាណថ្លៃជាង អាចចូលរាប់រយដុល្លារអាស្រ័យលើទំហំ»។

អនាគតវិចិត្រករ មូល ចាន់នីន មានបំណងបន្តការសិក្សាទៅថ្នាក់ឧត្តមសិក្សាបន្តទៀត ដែលចាប់យកជំនាញឌីហ្សាញ ដោយលោកអះអាងថានឹងខំច្នៃសិល្បៈគំនូរបុរាណ និងសម័យបញ្ចូលគ្នា។ យ៉ាងណាក៏ដោយ ចាន់នីន ដែលនិយាយក្នុងទឹកមុខញញឹមស្រស់ ថាការគូរគំនូរបុរាណដោយដៃ លោកនៅតែមិនបោះបង់៕