COVID-19
អន្តរជាតិ
នយោបាយអន្តរជាតិ
ហ្វីលីពីន សង្ឃឹមថា ចិនគោរពតាមសន្យា ថា «មិនបន្តសកម្មភាពក្នុងសមុទ្រចិនខាងត្បូងទៀត»
× រដ្ឋាភិបាលក្រុងម៉ានីល បានបង្ហាញការជឿជាក់ថា រដ្ឋាភិបាលក្រុងប៉េកាំង នឹងគោរពពាក្យសន្យាដោយមិនធ្វើសកម្មភាពខុសច្បាប់ ឬឯកតោភាគីនៅក្នុងសមុទ្រចិនខាងត្បូងឡើយ។ សេចក្តីថ្លែងការណ៍ធ្វើឡើងបន្ទាប់ពីមានការចុះផ្សាយពីការបង្កើតតំបន់ថ្មីរបស់ក្រុងប៉េកាំងនៅក្នុងដែនជម្លោះសមុទ្រចិនខាងត្បូងនាពេលថ្មីៗនេះ។
អ្នកនាំពាក្យប្រធានាធិបតីហ្វីលីពីន លោក Harry Roque នៅថ្ងៃ២៣ មេសាកន្លងទៅ បានឲ្យដឹងថា ចិន ធ្លាប់បានសន្យាជាមួយនឹងហ្វីលីពីន ថា នឹងមិនធ្វើសកម្មភាពបន្ថែមនៅក្នុងសមុទ្រចិនខាងត្បូងទៀតឡើយ ជាពិសេសលើតំបន់ដែលហ្វីលីពីនបានទាមទារគ្រប់គ្រងជាតំបន់សេដ្ឋកិច្ចផ្តាច់មុខ។ នេះបើយោងតាមការចុះផ្សាយរបស់សារព័ត៌មានហ្វីលីពីន Philstar។
តាមប្រភពព័ត៌មានដដែល ជាមួយនឹងការរម្លឹកពីការសន្យាទ្វេភាគីជាមួយនឹងគ្នា ថ្មីៗនេះ ក្រសួងការបរទេសហ្វីលីពីន ក៏បានធ្វើកំណត់ទូតតវ៉ាទៅកាន់ស្ថានទូតចិនប្រចាំរដ្ឋធានីម៉ានីលពីរដងរួចផងដែរ បន្ទាប់ពីមានរបាយការណ៍ថា មានសកម្មភាពមិនគប្បីរបស់កងទ័ពចិនទៅកាន់នាវាទាហានជើងទឹករបស់ហ្វីលីពីន និងសកម្មភាពមួយចំនួនក្នុងអធិបតេយ្យរបស់ហ្វីលីពីន ដែលក៏ជាផ្នែកមួយស្ថិតនៅខេត្តហៃណានរបស់ចិន។
គួរកត់សម្គាល់ផងដែរនោះ សេចក្តីថ្លែងការណ៍ការទូតតវ៉ារបស់ហ្វីលីពីន ធ្វើឡើងក្រោយតែមួយសប្តាហ៍ប៉ុណ្ណោះ នៃការបង្ហាញពីភាពជិតស្និទ្ធរវាងហ្វីលីពីន និងចិនរបស់ហ្វីលីពីន បន្ទាប់ពីចិន បានផ្តល់សម្ភារវេជ្ជសាស្ត្រដល់ហ្វីលីពីន សម្រាប់ការការពារ និងទប់ស្កាត់វីរុស Covid-19។ ហ្វីលីពីន ថែមទាំងទើបតែបានពណ៌នា និងចាត់ទុក ចិន ជា «មិត្តជិតស្និទ្ធជាអមត (BFF) » ទៀតផង។
គួរជម្រាបថា សមុទ្រចិនខាងត្បូង គឺជាសមុទ្រមានជម្លោះអធិបតេយ្យមួយដែលមានរដ្ឋអាស៊ានជាប់ពាក់ព័ន្ធដូចជា ព្រុយណេ ម៉ាឡេស៊ី ហ្វីលីពីនិ និងវៀតណាម ជាមួយនឹងចិន។ ទោះបីជាតំបន់កំពុងតែប្រឈមនឹងការគំរាមកំហែងពីវីរុសរាតត្បាត Covid-19 ក៏ដោយ គេសង្កេតឃើញថា ចិន នៅតែមានសកម្មភាពវាតទីនៅក្នុងតំបន់មានជម្លោះរហូតដល់ការបង្កើតតំបន់រដ្ឋបាលផ្សេងៗទៀតផង៕
Tag:
ហ្វីលីពីន
ចិន
សមុទ្រចិនខាងត្បូង
© រក្សាសិទ្ធិដោយ thmeythmey.com