ក្រសួងពាណិជ្ជកម្ម៖ ស្វាយ២តោន ដែលពលរដ្ឋគរចោលនោះ គឺខូចគុណភាព មិនមែនគ្មានទីផ្សារព្រោះកូវីដ១៩ទេ

ជាតិ

សង្គមជាតិ

ក្រសួងពាណិជ្ជកម្ម៖ ស្វាយ២តោន ដែលពលរដ្ឋគរចោលនោះ គឺខូចគុណភាព មិនមែនគ្មានទីផ្សារព្រោះកូវីដ១៩ទេ

26, Apr 2020 , 5:59 pm

រូបភាព

ដោយ: ធឿន បញ្ញាឬទិ្ធ

ភ្នំពេញ៖ ផ្លែស្វាយចំនួន២តោន ដែលពលរដ្ឋរស់នៅខេត្តកំពង់ស្ពឺ ចាក់ចោលនោះ គឺជាស្វាយខូចគុណភាព មិនមែនមកពីគ្មានទីផ្សារ ដោយសារជំងឺកូវីដ១៩ទេ។ នេះជាការបកស្រាយរបស់ក្រសួងពាណិជ្ជកម្ម ឆ្លើយតបនឹងម្ចាស់គណនីហ្វេសប៊ុកម្នាក់ ដែលបានបង្ហោះរូបផ្លែស្វាយគរចោលនៅក្នុងចម្ការ នៃឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ កាលពីថ្ងៃទី១៤ មេសា។

ក្រសួងពាណិជ្ជកម្ម ដែលបានបញ្ជូនមន្ត្រីជំនាញខ្លួន ចុះទៅសាកសួរព័ត៌មានពីពលរដ្ឋ នៅចំការស្វាយភូមិផ្សារត្រែងត្រយឹងនោះ បានរកឃើញថា ស្វាយទាំងនោះ គឺជាស្វាយខូចដោយសារទុំក្នុងកញ្ចប់ ទើបអ្នកទិញ មិនអាចទទួលទិញបាន ព្រោះមានបញ្ហាទាក់ទងនឹងគុណភាព។

ក្រសួងពាណិជ្ជកម្ម បានចេញបកស្រាយបំភ្លឺ កាលពីថ្ងៃទី២៥ មេសា ដូច្នេះថា៖«ប្រិយមិត្ត និងសាធារណៈជនក៏អាចសម្គាល់មើលជាក់ស្តែងក្នុងរូបភាព ដែលបង្ហាញរូបស្វាយទុំជោរពណ៌លឿង ដែលពុំអាចនឹងទុកឱកាសឱ្យដឹកជញ្ជូនទៅលក់ឯណាទៀតបាន សូម្បីតែយកទៅរោងចក្រធ្វើតំណាប់ស្វាយ កុំថាឡើយនាំចេញទៅបរទេសដែលត្រូវការរយៈពេលសម្រាប់ដឹកជញ្ជូន ដូច្នេះទាមទារផ្លែស្វាយដែលមានគុណភាពតាមតម្រូវការទីផ្សារ»។

មិនតែប៉ណ្ណោះ ក្រសួងពាណិជ្ជកម្ម បានអះអាងទៀតថា ទោះបីក្នុងកាលៈទេសៈនៃជំងឺកូវីត-១៩ រាតត្បាតក្តី ក៏កសិផលកម្ពុជានៅតែមានទីផ្សារ ទាំងការនាំចេញ និងទីផ្សារក្នុងស្រុក ឱ្យតែទំនិញទាំងនោះមានគុណភាពស្របតាមតម្រូវការទីផ្សារ ។ជាពិសេសផ្លែស្វាយតែម្ដង។

«ផ្លែស្វាយដែលមានគុណភាពល្អ រោងចក្រផលិតដំណាប់ស្វាយទទួលប្រមូលទិញក្នុងតម្លៃពី ៥០០រៀល ទៅ ៥៥០រៀលក្នុងមួយគីឡូក្រាម ចំណែកផ្លែស្វាយដែលខ្ចប់ក្នុងកញ្ចប់សំរាប់នាំចេញគឺ បានថ្លៃដល់ ៩០០រៀលក្នុងមួយគីឡូក្រាម។ ដូច្នេះ ឱ្យតែស្វាយមានគុណភាពល្អ ពុំខ្វះទីផ្សារឡើយ»។ នេះជាការបញ្ជាក់របស់ក្រសួងពាណិជ្ជកម្ម។

បើតាមក្រសួង បច្ចុប្បន្ននៅខេត្តកំពង់ស្ពឺ ពុំមានសល់ស្វាយក្នុងចំការច្រើនទេ ខណៈឈ្មួញកណ្ដាលដឹកស្វាយតាំងពីខេត្តកំពង់ឆ្នាំង កំពង់ធំ កំពង់ចាម និងព្រះវិហារ ដើម្បីយកមកលក់ឱ្យឃ្លាំងធំៗនៅកំពង់ស្ពឺ សម្រាប់នាំចេញ និងបម្រើតម្រូវការរោងចក្រកែច្នៃក្នុងស្រុក។ ក្រសួងពាណិជ្ជកម្ម ក៏សន្យាស្វែងរកកិច្ចសហការ បើកច្រកទីផ្សារនាំចេញកសិផលកម្ពុជា ឱ្យកាន់តែបានច្រើនថែមទៀត ទៅកាន់ទីផ្សារពិភពលោក។

ជាមួយគ្នាក្រសួង ក៏ស្នើឱ្យសាធារណជនពិចារណា និងប្រមូលព័ត៌មានឱ្យបានគ្រប់ជ្រុងជ្រោយមុននឹងបង្ហោះរូបភាព ឫ ខ្លឹមសារណាមួយ ដែលជះឥទ្ធិពលអវិជ្ជមានដល់ការប្រឹងប្រែងរបស់រដ្ឋាភិបាល ដែលបច្ចុប្បន្នកំពុងអនុវត្តគោលនយោបាយលើកស្ទួយវិស័យកសិកម្ម និងគាំទ្រលើកទឹកចិត្តដល់ការនាំចេញកសិផល។

«សូមមេត្តារួមគ្នាលប់បំបាត់ព័ត៌មានមិនពិត (Fake News) ដែលមានចរិតបំពុលសង្គម ហើយធ្វើឱ្យរាំងស្ទះដល់ការរីកចំរើននៃសង្គមជាតិយើង។ ការពិតទើបនាំមកនូវការគាំទ្រ និងការកោតសរសើរ ចំណែកព័ត៌មានក្រឡៃ មិនពិត នឹងនាំមកនូវទុក្ខទោសដល់ខ្លូន»។ ជាការស្នើសុំរបស់ក្រសួងពាណិជ្ជកម្ម៕