COVID-19
កីឡាអន្តរជាតិ
អន្តរជាតិ
នាយករដ្ឋមន្ត្រីអ៊ីតាលី មិនទាន់សម្រេចចិត្តបើក Serie A ឡើងវិញ ទោះ COVID-19 ថមថយ
× នាយករដ្ឋមន្ត្រីអ៊ីតាលីលោក Giuseppe Conte នៅថ្ងៃទី២៦ ខែមេសា នៅតែបន្តពន្យារជុំវិញការចាប់ផ្តើមការប្រកួតលីគកីឡាបាល់ទាត់ Serie A ឡើងវិញ។ ខណៈ COVID-19 ហាក់ថមថយ លើចំនួនអ្នកឆ្លងនៅអ៊ីតាលី នាយករដ្ឋមន្ត្រីរូបនេះ បានផ្តល់ភ្លើងបៃតងសម្រាប់កីឡាករ និងអត្តពលិកកំពូលៗ ដើម្បីបន្តការហ្វឹកហាត់ចាប់ពីថ្ងៃទី៤ ខែឧសភា។
លោក Conte បានបង្ហាញព័ត៌មានលម្អិតដំបូង ពីផែនការដើម្បីបន្ធូរបន្ថយការរឹតបន្តឹងដ៏តឹងរឹងក្នុងប្រទេស ដែលបានដាក់កាលពី៧សប្តាហ៍មុន ដើម្បីទប់ស្កាត់ការរីករាលដាលជំងឺរលាកសួតបង្កដោយកូរ៉ូណាវីរុសប្រភេទថ្មី (COVID-19)។
ចំណាត់ការបិទប្រទេសរបស់រដ្ឋាភិបាលនាយករដ្ឋមន្ត្រី Giuseppe Conte ក្នុងការទប់ស្កាត់ការរាលដាលជំងឺ COVID-19 បានផ្តល់ផលល្អប្រសើរសម្រាប់អ៊ីតាលី។ គិតត្រឹមថ្ងៃទី២៧ ខែមេសា អ៊ីតាលីគ្មានករណីថ្មីឆ្លងឡើយ ខណៈចំនួនអ្នកស្លាប់មានចំនួនជាង២៦០០០នាក់ និងឆ្លងជិត២សែននាក់ដដែល។
ក្រោយប្រកាសពីជោគជ័យ ក្នុងការទប់ស្កាត់ជំងឺរលាកសួតបង្កដោយកូរ៉ូណាវីរុស (COVID-19) នៅភាគខាងត្បូងប្រទេស និងការថមថយចំនួនអ្នកឆ្លងពីមួយថ្ងៃទៅមួយថ្ងៃនៅអ៊ីតាលីទាំងមូល លោក Conte បានអនុញ្ញាតឲ្យអត្តពលិកទាំងអស់ បន្តការហ្វឹកហាត់ឡើងវិញចាប់ពីថ្ងៃទី ៤ ខែឧសភាតទៅ។ ដោយឡែកការហ្វឹកហាត់ជាក្រុម អាចចាប់ផ្តើមនៅថ្ងៃទី១៨ ខែឧសភា។
យ៉ាងណាក៏ដោយ បើទោះអនុញ្ញាតឲ្យមានការហ្វឹកហាត់ឡើងវិញក្តី ប៉ុន្តែលោក Conte មិនបាននិយាយថា ពេលណាទើបក្របខណ្ឌកំពូលអ៊ីតាលី នឹងបន្តរដូវកាលដែលនៅសេសសល់នៅឡើយទេ។ នាយករដ្ឋមន្ត្រី វ័យ៥៥ឆ្នាំរូបនេះគ្រាន់តែ និយាយខ្លីក្នុងសុន្ទរកថាតាមទូរទស្សន៍ថា ការប្រជែងជើងឯក នឹងចាប់ផ្តើមម្តងទៀតនៅពេលដែលប្រទេសមានសុវត្ថិភាព។
ជុំវិញការបើកការប្រកួតលីគឡើងវិញ ប្រធានសហព័ន្ធកីឡាបាល់ទាត់អ៊ីតាលី បានយល់ព្រមជំរុញឲ្យបញ្ចប់រដូវកាល Serie A រដូវកាលនេះ ដោយចាប់ផ្តើមប្រកួតឡើងវិញពីថ្ងៃទី៣០ ខែមិថុនា ដល់ថ្ងៃទី២ ខែសីហា។
ក្របខណ្ឌ Serie A ត្រូវបានផ្អាកតាំងពីថ្ងៃទី៩ ខែមីនា ដោយសារ COVID-19 ក្រោយឆ្លងកាត់ការប្រកួតបាន២៦លើក។ Juventus មាន៦៣ពិន្ទុ ឈរកំពូលតារាង ដោយនាំមុខ Lazio ចំនួន១ពិន្ទុ៕
Tag:
COVID-19
Giuseppe Conte
Serie A
© រក្សាសិទ្ធិដោយ thmeythmey.com