COVID-19
ជាតិ
លោក ហេង សួរ៖ រោងចក្រជាង១៣០ ព្យួរការងារ ដែលប៉ះពាល់ដល់កម្មករជិត១០ម៉ឺននាក់ ដោយសារCOVID-19
× ភ្នំពេញ៖ រោងចក្រជាង១៣០ បានព្យួរការងារ ដែលនាំឱ្យប៉ះពាល់ដល់កម្មករ និយោជិតនៅកម្ពុជា ជិត១០ម៉ឺននាក់ ដោយសារការរាតត្បាតនៃជំងឺកូវីដ១៩(COVID-19)។ លោក ហេង សួរ អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ ថ្លែងបែបនេះ នៅក្នុងសន្និសីទកាសែត ស្តីពីបច្ចុប្បន្នភាពនៃការចត្តាឡីស័កកម្មករ នារសៀលថ្ងៃទី២៧ មេសា ។
លោក ហេង សួរ បានបញ្ជាក់ថា ខាងភាគីរោងចក្រចង់បិទទ្វាររោងចក្រតែម្ដង ប៉ុន្តែដោយសារមានការពិភាក្សារកដំណោះស្រាយជាមួយរដ្ឋាភិបាល ទើបថៅកែរោងចក្រសម្រេចចិត្ត ត្រឹមព្យួរការងារកម្មករសិន ដែលវាអាចផ្ដល់អត្ថប្រយោជន៍ខ្លះដល់ពួកគេ។
ក្រៅពីរកដំណោះស្រាយឱ្យភាគីរោងចក្រ រដ្ឋាភិបាលក៏ចូលរួមសម្របសម្រួលជាមួយភាគីអ្នកបញ្ជាទិញ ដើម្បីឱ្យពួកគេ អនុវត្ត និងរក្សានូវកិច្ចសន្យាបញ្ជាទិញ។ បើតាមលោក ហេង សួរ អ្នកបញ្ជាទិញយល់ព្រមបង់នូវអ្វីដែលពួកគេ បានចុះកុងត្រាក្នុងកិច្ចសន្យា ប៉ុន្តែគ្រាន់តែពួកគេ មិនទាន់ឱ្យកម្ពុជា នាំចូលទីផ្សាររបស់ពួកគេប៉ុណ្ណោះ ដោយសារបារម្ភពីបញ្ហាកូវីដ១៩។
មិនមែនតែកម្ពុជាទេ ដែលរងផលប៉ះពាល់ដោយសារជំងឺកូវីដ១៩ ពោលគឺបណ្ដាប្រទេសលើពិភពលោកទាំងអស់។ ដូច្នេះប្រជាពលរដ្ឋ និងកម្មករ ត្រូវរក្សាការងារឱ្យបានល្អ ដើម្បីបញ្ចៀសការបាត់បង់ ក្នុងកាលៈទេសៈដ៏លំបាកនេះ។ នេះជាការបញ្ជាក់របស់លោក ហេង សួរ។
© រក្សាសិទ្ធិដោយ thmeythmey.com